Dauveilewai 11 - Vakavakadewa Makawa

O Jefica na tamata qaqa, era sa cati koya ko ira na wekana, 1-3. Sa qai digitaki koya ko ira na kai nona me nodra turaga ni valu, 4-11. A nona talai vei ira na luve i Amoni, 12-29. Sa bubului vei Jiova, 30,31. Sa veivala kei ira, ka sa gumatua, 32,33. Sa dinata na nona bubului vei Jiova, 34-40.

¹ Ia sa tamata kaukauwa ka qaqa ko Jefica na kai Kiliati, ka sa luve ni dua na yalewa dautagane; a sa tama i Jefica ko Kiliati.

² A sa vakasucuma vei Kiliati ko koya na watina eso na luvena tagane; ia ni ra sa tubu cake na luve i na watina, era sa qai vakasevi Jefica, ka kaya vua, Ko na sega ni taukei e na vale nei tamadatou, ni ko sa luve ni yalewa tani.

³ A sa drotaki ira na tacina ko Jefica, ka la'ki tiko e na vanua ko Topi: a sa soqoni vata vei Jefica na tamata vakasausa eso, a ra sa lako voli vata kaya.

⁴ Ia sa dua na gauna era sa mai vala kina ko ira na luve i Amoni kei ira na Isireli.

⁵ Ka ni sa ia na nodra i valu na luve i Amoni kei ira na Isireli, eratou sa qai lako na qase ni Kiliati, me kauti Jefica mai na vanua ko Topi:

⁶ a ratou sa kaya vei Jefica, Mo lako mai, mo neimami turaga, me da veivala kei ira na luve i Amoni.

⁷ A sa kaya vei iratou na qase ni Kiliati ko Jefica, Dou a sega beka ni cati au, ka vakasevi au mai na vale nei tamaqu? ia ka cava dou sa lakovi au mai kina edaidai, ni dou sa vakasaurarataki?

⁸ A sa kaya vei Jefica ko iratou na qase ni Kiliati, O koya oqo keitou sa qai golevi iko kina, mo lako kina kei keitou, me veivala kei ira na luve i Amoni, ka mo liu ga vei keimami na kai Kiliati kecega.

⁹ A sa kaya vei iratou na qase ni Kiliati ko Jefica, Kevaka dou sa vakalesui au tale, me'u veivala kei ira na luve i Amoni, ka sa soli ira vei au ko Jiova, au na qai nomudou turaga, se segai?

¹⁰ A ratou sa kaya vei Jefica, ko iratou na qase ni Kiliati, Sa rogoci keda tiko ko Jiova, kevaka keitou sa sega ni kitaka me vaka na nomu vosa.

¹¹ A sa lako vata kei iratou na qase ni Kiliati ko Jefica, a ra sa buli koya ko ira na tamata me nodra turaga levu ka me nodra i liuliu: a sa cavuta ko Jefica na nona vosa kecega e na mata i Jiova mai Misipe.

¹² A sa tala eso na tamata ko Jefica vua na nodra tui na luve i Amoni, ka kaya, A cava beka na vuna, ko sa lako mai kina vei au, mo ia nai valu e na noqu vanua?

¹³ A sa kaya na nodra tui na luve i Amoni vei iratou na tamata nei Jefica, Ni ra sa suguta na noqu vanua ko ira na Isireli, ni ra sa lako cake mai Ijipita, sa tekivu mai Arinoni, ka yaco ki Japoki kei na Joritani: ia mo vakasuka tale mada vakavinaka.

¹⁴ A sa tala tale eso na tamata ko Jefica vei koya na nodra tui na luve i Amoni:

¹⁵ ka kaya vua, sa vosa vakaoqo ko Jefica, Sa sega ni suguta na vanua nei Moapi, se na nodra vanua na luve i Amoni, ko ira na Isireli:

¹⁶ ia ni ra sa lako cake mai Ijipita ko ira na Isireli, ka lako e loma ni veikau ka yaco ki na Wasa Damudamu, ka yaco ki Ketesa:

¹⁷ sa ra qai tala eso na tamata ko ira na Isireli vua na tui Itomi, ka kaya, Me keimami lako sara yani e nomu loma ni vanua: a sa sega ni via vakarorogo ko tui Itomi: a ra sa talatala talega vua na tui Moapi ko ira, a sa sega ni vinakata ko koya: a sa tiko ga mai Ketesa ko ira na Isireli.

¹⁸ A ra sa lako voli e veikau, ka volita na vanua ko Itomi, kei na vanua ko Moapi, ka ra lako mai ki na yasana vaka ki na tu-i-cake ki na vanua ko Moapi, a ra sa la'ki tiko ki tai kadua ni Arinoni, ka sega ni lako ki loma ni nodra i yalayala na Moapi: ni sai yalayala kei Moapi ko Arinoni.

¹⁹ A ra sa tala eso na tamata ko ira na Isireli vei Sioni, na nodra tui na Amoraiti, o koya ko tui Esiponi; a sa kaya vua ko ira na Isireli, Me keimami lako sara yani e nomu loma ni vanua, ki na noqu yasana.

²⁰ A sa sega ni vakabauti ira na Isireli ko Sioni, me ra lako eloma ni nonai yalayala: sa vakasoqoni ira vata na nona tamata kecega ko Sioni, ka la'ki tiko mai Jeasa, ka veivala kei ira na Isireli.

²¹ Ia sa soli Sioni kei ira kecega na nona tamata ko Jiova na Kalou ni Isireli ki na ligadra na Isireli, a ra sa mokuti ira: a sa rawata ko ira na Isireli na nodra vanua taucoko na Amoraiti ko ira nai taukei ni vanua ko ya.

²² A ra sa taukena na nodra i yalayala kecega na Amoraiti, mai Arinoni ka kauta sara ki Japoki, mai na veikau talega ka yaco ki na Joritani.

²³ Ia oqo, sa vakasevi ira na Amoraiti ko Jiova na Kalou ni Isireli, e na matadra na nona tamata na Isireli, ia ko na qai taukeni ira beka ko iko?

²⁴ O na sega beka ni taukena oqori sa solia vei iko ko Kimosi na nomu kalou mo kenai taukei? Ia ko ira kecega sa vakaseva tani e na mataimami ko Jiova na neimami Kalou, keimami na taukena.

²⁵ Ia oqo, a cava ko sa vinaka cake kina vua na tui Moapi, ko Pelaki, na luve i Sipori? sa veileti li ko koya kei ira na Isireli, se veivala kei ira,

²⁶ ni sa tiko ko ira na Isireli mai Esiponi kei na kena veikoro, kei Aroeri kei na kena veikoro, kei na veikoro kece sa tu e na bati ni Arinoni, ka yabaki tolu na drau? ia a cava dou a sega kina ni tauri ira tale e na gauna ko ya?

²⁷ Ia koi au, au sa sega ni cala vei iko, ia ko sa cala ga vei au, ni ko sa mai veivala kei au: ko Jiova, o koya sa Daulewa, me lewa edaidai vei ira na Isireli kei ira na luve i Amoni.

²⁸ Ia na nodra tui na luve i Amoni sa sega ni vakarogoca na vosa i Jefica, ka tukuna yani vua.

²⁹ Sa qai curumi Jefica na Yalo i Jiova, a sa lako yani ko koya e Kiliati, kei Manasa, ka lako yani e Misipe mai Kiliati, ka mai Misipe mai Kiliati sa lako ko koya vei ira na luve i Amoni.

³⁰ A sa cavuta e dua na bubului vei Jiova ko Jefica, ka kaya, Kevaka ko ni na soli ira vakaidina na luve i Amoni ki na ligaqu,

³¹ na ka sa curu mai na katuba ni noqu vale me mai tavaki au, ni'u sa lesu vakacegu maivei ira na luve i Amoni, ena nei Jiova, ia ka'u na vakacabora mei soro kama.

³² A sa lako yani ko Jefica vei ira na luve i Amoni me veivala kei ira; a sa soli ira ko Jiova ki na ligana.

³³ A sa mokuti ira ko koya mai Aroeri, ka yaco sara ki Minici, e ruasagavulu na koro, ka kauta sara ki Epeli-kiramemi, e na moku levu sara. Sa qai vakamalumalumutaki ira na luve i Amoni ko ira na Isireli.

³⁴ A sa lesu mai ki Misipe ko Jefica ki na nona vale, ka raica, sa lako mai me tavaki koya na luvena yalewa, ka taura na tibereli ka meke lako: ia sa luvena e dua bauga ko koya; sa sega tale na luvena tagane, se na luvena yalewa.

³⁵ Ia ni sa raici koya ko koya, sa dresulaka na nonai sulu, ka kaya, Ulei, na luvequ yalewa! ko sa vakamalumalumutaki au sara, ia ko sa yaco me ka rarawa vei au: ni'u sa vosa oti vei Jiova, ia ka'u sa sega ni vuki tani rawa.

³⁶ A sa kaya vua ko koya, Na tamaqu, ko sa vosa oti vei Jiova; mo cakava ga vei au me vaka na ka ko a kaya; ni sa qai cudruvaki iko ko Jiova vei ira na nomu meca na luve i Amoni.

³⁷ Sa kaya talega vei tamana ko koya, Me vakabau e na vukuqu na ka oqo: mo laivi au mada ka vula rua, me'u la'ki gade voli mai na veiulu-ni-vanua, me'u tagicaka na noqu goneyalewa, koi au kei ira vata na noqu i caba.

³⁸ A sa kaya ko koya, Mo lako ga. A sa talai koya yani me la'ki vula rua: a sa lako ko koya kei ira era sa nonai caba, a sa tagicaka na nona goneyalewa mai na veiulu-ni-vanua.

³⁹ Ia ni sa oti na vula rua, sa lesu mai ko koya vei tamana, a sa ia vua ko koya me vaka na nona bubului ka cavuta eliu ko koya: a sa sega ni veiyacovi kei na dua na tagane ko koya. A sa vakabau me kenai valavala e Isireli,

⁴⁰ e na veiyabaki kecega, me ra lako na goneyalewa ni Isireli ka vakacaucautaka na goneyalewa na luve i Jefica, na kai Kiliati, ka bogi va e na veiyabaki.