Dauveilewai 10 - Vakavakadewa Makawa

Sa lewai ira na Isireli ko Tola, 1,2; kei Jairi, 3-5. Sa ra vuki tale ko ira na Isireli ka soro ki na kalou lasu eso, a sa cudruvi ira ko Jiova, 6-9. Era sa veivutuni, ka sa vunauci ira ko Jiova, ka qai lomani ira tale, 10-16. Sa mai vala kei ira ko ira na luve i Amoni, 17,18.

¹ Ia sa taravi Apimeleki ko Tola na luve i Pua, na luve i Toto, e dua vei ira na Isakari me vakabulai ira na Isireli; a sa tiko mai Samiri mai na ulu-ni-vanua ko Ifireimi.

² A sa lewai ira na Isireli ko koya ka yabaki ruasagavulu ka tolu, sa qai mate ko koya, ka sa bulu mai Samiri.

³ A sa taravi koya ko Jairi, na kai Kiliati, a sa lewai ira na Isireli ko koya ka yabaki ruasagavulu ka rua.

⁴ A sa le tolusagavulu na luvena tagane, era dauvodoka na asa tagane e tolusagavulu, a sa tolusagavulu na nodra koro, a sa vakatokai, Na veikoro i Jairi, ka yacova na siga oqo: era sa toka mai na vanua ko Kiliati.

⁵ A sa mate ko Jairi, ka sa bulu mai Kamoni.

⁶ A ra sa kitaka tale na ka ca e na mata i Jiova ko ira na Isireli, a ra sa qaravi ira na Peali, kei Aseteroci, kei na veikalou ni Siria, kei na veikalou ni Saitoni, kei na veikalou ni Moapi, kei na nodra kalou na luve i Amoni, kei na nodra kalou na kai Filisitia; ka ra sa biuti Jiova, ka sega ni qaravi koya.

⁷ A sa tubu na cudru i Jiova vei ira na Isireli, ka sa volitaki ira ko koya ki na ligadra na kai Filisitia, kei na ligadra na luve i Amoni.

⁸ Ia e na yabaki ko ya era sa vakararawataki ira na Isireli, ka vakasaurarataka: ka yabaki tinikawalu, ko ira kecega na Isireli era sa tiko mai tai kadua ni Joritani, e na nodra vanua na Amoraiti, mai Kiliati.

⁹ A ra sa lako ki tai kadua ni Joritani ko ira na luve i Amoni, me veivala kei ira talega na Juta, kei ira na Penijamini, kei ira na Ifireimi: a ra sa vakaloloma sara ko ira na Isireli.

¹⁰ A ra sa tagi vei Jiova ko ira na Isireli, ka kaya, Keimami sai valavala ca vei kemuni, ni keimami sa biuta na neimami Kalou, ka qaravi ira na Peali.

¹¹ A sa kaya vei ira na Isireli ko Jiova, Au sa sega li ni vakabulai kemudou maivei ira na kai Ijipita, kei ira na Amoraiti, kei ira na luve i Amoni, kei ira na kai Filisitia,

¹² kei ira na kai Saitoni, kei ira na Amalekaiti, kei ira na kai Maoni, ko ira era sa vakararawataki kemudou; ni dou a tagi vei au?

¹³ Ia dou sa biuti au ga, ka qaravi ira na kalou tani; o koya ka'u na sega kina ni vakabulai kemudou tale.

¹⁴ Dou la'ki tagi ki na veikalou dou sa digitaka: me ra vakabulai kemudou ko ira e na gauna dou sa vakararawataki kina.

¹⁵ A ra sa kaya vei Jiova ko ira na Isireli, Keimami sai valavala ca: mo ni cakava vei keimami na ka kece e vinaka e matamuni; ia mo ni vakabulai keimami mada ga e na gauna oqo.

¹⁶ A ra sa biuta tani na nodra kalou na kai tani mai na kedra maliwa, ka qaravi Jiova: a sa bitaki na yalona e na vuku ni nodra rarawa na Isireli.

¹⁷ A ra sa soqoni vata na luve i Amoni, ka la'ki tiko mai Kiliati. A ra sa soqoni vata na Isireli, ka tiko mai Misipe.

¹⁸ A ra sa veikayaka vakai ira ko ira na turaga mai Kiliati, O cei na tamata ena liutaka nai valu kei ira na luve i Amoni? sai koya ena qai nodra tui kecega na kai Kiliati ko koya.