Dauveilewai 1 - Vakavakadewa Makawa

A nodra i valu ko ira na Juta, ko ira talega na Simioni, 1-15. A ka era kitaka na veimataqali eso, 16-36.

¹ Ia ni sa mate ko Josua, era sa tarogi Jiova, ko ira na Isireli, ka kaya, O cei vei keimami me liu cake kivei ira na kai Kenani, me vala kei ira?

² A sa kaya ko Jiova, Me lako cake ko ira na Juta: dou kila, au sa solia na vanua ki na ligadra.

³ A ra sa kaya na Juta vei ira na Simioni na wekadra, Me da lako cake ki na neimami votavota, me da vala kei ira na kai Kenani; ia eda na qai lako vata talega kei kemudou ki na nomudou i votavota. A ra sa lako vata kei ira ko ira na Simioni.

⁴ A ra sa lako cake ko ira na Juta, ka sa soli ira na kai Kenani kei ira na lewe ni Veikoro lalai ki na ligadra ko Jiova; a ra sa mokuta mai Peseki e lewe tini na udolu na tamata.

⁵ A ra sa kunei Etoni-peseki mai Peseki: ka ra vala kaya, ka mokuti ira na kai Kenani kei ira na lewe ni Veikoro lalai:

⁶ ia sa dro ko Etoni-peseki, a ra sa vakasavi koya, ka taura, ka muduka na nonai dovidovi-ni-kakana kei nai qaqalo levu ni yavana:

⁷ a sa kaya ko Etoni-peseki, Era a vakatotomi e ruku ni noqu tepeli e lewe vitusagavulu na tui sa mudu na nodra i dovidovi-ni-kakana kei nai qaqalo levu ni yavadra: ia me vaka na ka ka'u a kitaka, sa saumi au vakakina na Kalou. A ra sa kauti koya ki Jerusalemi, ka sa mate kina ko koya.

⁸ Ia sa vala ko ira na Juta kei Jerusalemi, ka rawata, ka samuta e nai seleiwau, ka vakama na koro.

⁹ Sa oti, era sa qai lako sobu ko ira na Juta, me vala kei ira na kai Kenani, era sa tiko e na ulu-ni-vanua, kei na mata ni ceva, kei na vanua cecelevu.

¹⁰ Sa la'ki vala talega ko ira na Juta kei ira na kai Kenani era sa tiko mai Epironi: (ia na yaca i Epironi eliu ko Kiriaci-aripa:) a ra sa mokuti Sesei, kei Eiimani, kei Talimei.

¹¹ A ra sa lako tani maikea ka vala kei ira na kai Tipira: (ia na yaca i Tipira eliu ko Kiriaci-seferi.)

¹² A sa kaya ko Kelepi, o koya sa samuti Kiriaci-seferi, ka rawata, ka'u na solia vua na luvequ yalewa ko Akesa me watina.

¹³ A sa rawata ko Ocinieli na luve i Kinasi, na taci i Kelepi: a sa solia vua ko koya na luvena yalewa ko Akesa me watina:

¹⁴ ia, ni sa lako mai na yalewa, sa vakauqeta na watina me kerea e dua na tiki ni vanua mai vua na vugona: a sa sobu mai na asa na yalewa, a sa kaya vua ko Kelepi, Sa vakaevei?

¹⁵ A sa kaya vua ko koya, Mo solia vei au na ka me'u kalougata kina; ni ko sa solia oti vei au e dua na vanua ki na mata ni ceva; mo solia talega vei au eso na mata ni wai. A sa solia vua ko Kelepi na mata ni wai ki cake, kei na mata ni wai ki ra.

¹⁶ Ia ko ira na Kenaiti, na vugo i Mosese, era lako cake kei ira na Juta mai na koro ni veibalabala ki na lekutu nei Juta, ko ya mai na mata ni ceva sa donui Arati; ka ra sa lako ka tiko e na kedra maliwa na tamata.

¹⁷ Era sa qai lako ko ira na Juta kei ira na Simioni na wekadra, ka ra mokuti ira na kai Kenani era tiko mai Sifaci, ka vakarusa sara. A sa vakatokai na yaca ni koro ko Orima.

¹⁸ Era sa rawai Kesa talega kei na kena vanua ko ira na Juta, kei Asikiloni kei na kena vanua, kei Ekironi kei na kena vanua.

¹⁹ A sa tiko vata kei na Juta ko Jiova, a ra sa vakasava tani nai taukei ni ulu-ni-vanua; ia sa sega ni vakasavi ira rawa era sa tiko ena vanua cecelevu, ni ra sa vakaqiqi-ni-valu kaukamea.

²⁰ A ra sa soli Epironi vei Kelepi, me vaka ka kaya ko Mosese: a sa vakasavi iratou tani maikina na tagane tolutolu era luve i Anaki ko koya.

²¹ Ia ko ira na Penijamini, era sa sega ni vakasavi ira tani na Jepusaiti era sa tiko mai Jerusalemi; ia sa tiko vata ga e Jerusalemi ko ira na Jepusaiti kei ira na Penijamini, ka yacova na siga oqo.

²² Ia na mataqali i Josefa, era sa lako cake talega ki Peceli; a sa tiko vata kei ira ko Jiova.

²³ A ra sa tala eso ko ira na mataqali i Josefa me yamata ki Peceli: (ia na yaca ni koro eliu ko Lusa.)

²⁴ Ia ko ira sa lawakoto era sa kunea e dua na tamata sa lako tiko mai na koro, a ra sa kaya vua, Mo vakatakila mada vei keitou nai curucuru ki na koro, ia keitou na vakabulai iko.

²⁵ Ia ni sa vakatakila vei ira ko koya nai curucuru ki na koro, era sa samuta na koro e nai seleiwau: ia era sa vakabula na tamata ko ya kei ira kecega na kai nona.

²⁶ A sa toki na tamata ko ya ki na nodra vanua na Itaiti, ka tara kina e dua na koro, ka vakayacana ko Lusa; ka sa yacana tiko ka yacova na gauna oqo.

²⁷ O ira talega na Manasa, era sa sega ni vakasavi ira tani nai taukei i Peci-siani kei na kena veikoro se ko ira na kai Teenaki kei na kena veikoro, se na kai Toa kei na kena veikoro, se na kai Ipiliami kei na kena veikoro, se na kai Mekito kei na kena veikoro: ia era sa gu na kai Kenani me ra tiko ga e na vanua ko ya.

²⁸ Ia ni sa kaukauwa mai ko ira na Isireli, era sa rawai ira na kai Kenani me ra qali vei ira, ka ra sega ni vakasavi ira tani sara.

²⁹ O ira talega na Ifireimi, era sa sega ni vakasavi ira tani na kai Kenani era a tiko mai Keseri; ia era tiko vata ga kei ira mai Keseri ko ira na kai Kenani.

³⁰ O ira na Sepuloni, era sa sega ni vakasavi ira tani na kai Kitironi, se ko ira na kai Neeloli; era sa tiko vata ga kei ira ko ira na kai Kenani, ka ra mai qali vei ira.

³¹ O ira na Aseri, era sa sega ni vakasavi ira tani na kai Ako, se ko ira na kai Saitoni, se ko ira mai Alapi, se ko ira mai Ekisipi, se ko ira mai Elipa, se ko ira mai Efiki, se ko ira mai Riopi:

³² ia era sa tiko vata ga na kawa i Aseri kei ira na kai Kenani, nai taukei ni vanua, ni ra sa sega ni vakasavi ira tani.

³³ O ira na Nafitalai era sa sega ni vakasavi ira tani na kai Peci-semesi, se ko ira na kai Peci-anaci; ia era sa tiko e na kedra maliwa na kai Kenani, nai taukei ni vanua: ia sa qali vei ira ko ira na kai Peci-semesi kei ira na kai Peci-anaci.

³⁴ Ia ko ira na Amoraiti, era sa vakayalani ira na mataqali i Tani ki na ulu-ni-vanua, ni ra sa sega ni laivi ira me ra lako sobu ki na vanua cecelevu:

³⁵ ia era sa gu na Amoraiti me ra tiko e na ulu-ni-vanua ko Eresi mai Eijaloni, ka mai Seelipimi: ia sa gumatua cake na ligadra na mataqali i Josefa, era sa mai qali kina.

³⁶ Ia sa vakatekivu na nodra i yalayala na Amoraiti mai nai cabecabe ki Akirapimi, mai na vatu levu, ka lako vaka ki cake.