Cakacaka 8 - Vakavakadewa Makawa

Era sa vakacacani vakalevu na tamata lotu, a ra sa veiseyaki kina ki na veikoro, ia sa tubu kina na lotu, 1—4. Sa laki vunau mai Samaria ko Filipi, a ra sa lewe vuqa sa veivutuni ka papitaisotaki, 5—13. Sa talai ko Pita kei Joni vei ira, a sa yaco kina vei ira na Yalo Tabu, 14—17. Sa via volia na kaukauwa me solia na Yalo Tabu ko Saimoni, a sa vunauca ko Pita, 18—24. A kenai tukutuku na matanivanua ni Iciopea, 25—40.

¹ A sa vinakata na nona mate ko Saula. Ia e na gauna ko ya era sa vakacacani vakalevu kina nai soqosoqo lewe ni soro era sa tiko mai Jerusalemi; a ra sa veiseyaki kina ki na veiyasana i Jutia kei Samaria, ko ira ga nai apositolo e segai.

² A ra sa buluti Sitiveni eso na tamata daulotu, a ra sa cakava na somate levu e na vukuna.

³ Ia ko Saula, sa vakacacani ira vakalevu nai soqosoqo lewe ni soro, ni sa curu ki na veivale kecega, ka yarataki ira na tagane kei ira na yalewa, ka biuta ki na vale ni veivesu.

⁴ Ia ko ira era sa veiseyaki, era sa lako ki na veiyasana kecega ka vunautaka na vosa.

⁵ Sa qai lako sobu ko Filipi ki na koro ko Samaria, a sa vunautaki Karisito kivei ira.

⁶ Ia ko ira na tamata era sa lomavata me ra vakarogoca na ka sa tukuna ko Filipi, ni ra sa rogoca ka raica na veika-mana sa kitaka ko koya.

⁷ Ni sa lako tani maivei ira na lewe levu eso na yalo velavela sa curumi ira, ni ra sa qoqolou tiko e na domo levu; kei ira talega era lewe vuqa sa tauvi ira na mate sautaninini, kei na lokiloki, era sa vakabulai.

⁸ A sa levu kina na marau e na koro ko ya.

⁹ A sa dua na tamata, ko Saimoni na yacana, sa daucakai sausau makawa e na koro ko ya, a sa vakidacalataki ira vakalevu kina na kai Samaria, ni sa dautukuni koya ni sa dua ka uasivi sara:

¹⁰ a ra sa vakarogoci koya ko ira kecega, ko ira e lalai kei ira e lelevu, a ra sa kaya, O koya oqo na kaukauwa levu ni Kalou.

¹¹ A ra sa vakarogoci koya, ni sa vakidacalataki ira vakadede ko koya e na nonai sausau.

¹² Ia ni ra sa vakadinati Filipi ni sa vunautaka na veika ni matanitu ni Kalou, kei na yaca i Jisu Karisito, era sa qai papitaisotaki, ko ira na tagane kei ira na yalewa.

¹³ Sa qai vakadinata talega ko Saimoni; ia ni sa papitaisotaki oti, erau sa dautiko vata kei Filipi; a sa kidacala ko koya, ni sa raica nai vakatakilakila kei na cakacakamana levu sa caka tiko.

¹⁴ Ni ra sa qai rogoca ko ira nai apositolo era sa tiko mai Jerusalemi, era sa vakadinata na vosa ni Kalou ko ira na kai Samaria, era sa talai Pita kei Joni vei ira:

¹⁵ ia koi rau, ni rau sa lako sobu, erau sa masulaki ira, me ra rawata na Yalo Tabu;

¹⁶ ni sa sega ni yaco vua e dua vei ira ko koya: era sa papitaisotaki walega e na yaca ni Turaga ko Jisu.

¹⁷ A rau sa tabaki ira e na ligadrau, a sa yaco kina kivei ira na Yalo Tabu.

¹⁸ Ia ni sa raica ko Saimoni sa soli na Yalo Tabu e na veitabaki ni ligadrau nai apositolo, sa qai via solia vei rau nai lavo,

¹⁹ ka kaya, Solia talega mai vei au na kaukauwa oqo, me yaco kina na Yalo Tabu vei ira yadua ka’u na tabaka e na ligaqu.

²⁰ A sa kaya vua ko Pita, Mo drau rusa vata kei na nomu siliva, e na vuku ni ko sa nanuma sa voli rawa nai solisoli ni Kalou e nai lavo.

²¹ Sa sega na nomu tikina se nomui votavota e na ka oqo, ni sa sega ni dodonu na yalomu e na mata ni Kalou.

²² O koya oqo mo qai veivutunitaka na nomui valavala ca oqo, ka masu vua na Kalou, de sa rawa beka mo sega ni cudruvi e na nanuma ni yalomu.

²³ Ni’u sa kunea ko sa tu ga e na ka gaga sara, ka ko sa vesuki e nai valavala ca.

²⁴ Sa qai vosa ko Saimoni, ka kaya, Drau masulaki au vua na Turaga, me kakua ni yaco vei au e dua na ka drau sa vosa kina.

²⁵ Ia koi rau, ni rau sa tukuna oti ka vunautaka na vosa ni Turaga, erau sa lesu tale ki Jerusalemi, ka rau sa vunautaka nai tukutuku-vinaka e na veikoro lalai e vuqa mai Samaria.

²⁶ A sa vosa vei Filipi e dua na agilose ni Turaga, ka kaya, Mo ia ka lako vaka ki na mata ni ceva, e na sala sa lako mai Jerusalemi vaka ki Kesa, ko ya e veikau.

²⁷ Sa qai ia ko koya ka lako: ka raica, e dua na kai Iciopea, a matanivanua, a tamata levu i Kadasi na nodra ranadi na kai Iciopea, a sa nona dauniyau ko koya, sa lako ki Jerusalemi me soro,

²⁸ ka sa lesu tu, ka sa wilika nai vola i Aisea na parofita, ni sa tiko e na nona qiqi-ni-turaga.

²⁹ Sa qai kaya vei Filipi na Yalo Tabu, Lako voleka, mo drau la’ki tiko kaya e na qiqi-ni-turaga ko ya.

³⁰ Sa qai cici yani ko Filipi, a sa rogoci koya ni sa wilika nai vola i Aisea na parofita; a sa kaya, O sa kila na ka ko sa wilika, se segai?

³¹ A sa kaya ko koya, Au sa rawata vakaevei, kevaka sa sega e dua me tuberi au? A sa masuti Filipi me cabe cake me rau tiko kaya.

³² Oqo na tiki ni Vola Tabu sa wilika ko koya, Sa tuberi ko koya me vaka na sipi me vakamatei; Ia me vaka na lami sa galu e na mata i koya sa kotiva, Sa vakakina ko koya, ni sa sega ni vosa.

³³ Ni sa malumalumu tiko ko koya, sa sega ni lewai vakadodonu: Ia ko cei ena tukuna na nonai tubutubu? Ni sa kau tani e vuravura na nona bula.

³⁴ Sa qai vosa vei Filipi na matanivanua, ka kaya, Au tarogi iko mada, se sa vosataki cei na parofita e na vosa oqo: ko koya ga, se dua tani?

³⁵ Sa qai dalaga ko Filipi, ka sa vakatekivu e na tiki ni Vola Tabu ko ya, a sa vunautaki Jisu vua.

³⁶ Ia ni rau sa lako tu e na sala, erau sa yaco ki na dua na wai: a sa kaya na matanivanua, Raica, sa tu na wai; a cava sa tarovi au me’u kua ni papitaisotaki?

³⁷ A sa kaya ko Filipi, Kevaka ko sa vakadinata e na yalomu taucoko, sa tara ga. A sa vosa ko koya, ka kaya, Au sa vakadinata ni sa Luve ni Kalou ko Jisu Karisito.

³⁸ Sa qai kaya ko koya me tu vakadua mada na qiqi-ni-turaga: a rau sa lako sobu ruarua ki na wai, ko Filipi kei na matanivanua, a sa papitaisotaki koya.

³⁹ Ia ni rau sa cabe cake mai na wai, sa kauti Filipi tani na Yalo ni Turaga, a sa sega ni raica tale na matanivanua: a sa lako e nona sala ko koya ka reki tiko.

⁴⁰ A sa kune ko Filipi mai Asoto: a sa lakova na veikoro kecega ka vunautaka nai tukutuku vinaka, a sa yaco sara ki Sisaria.