Cakacaka 28 - Vakavakadewa Makawa

Sa yalovinaka vei ira ko ira na lewe ni vanua era sa cabe bula kina. Sa dua na gata sa vivica na liga i Paula, ia sa sega kina ni ca, 1—6. Sa laki vakabula na turaga ni vanua ko Paula kei ira tale eso sa tauvi-mate, 7—10. Era sa qai soko vaka ki Roma, 11—15. Ni sa tadu ko Paula, sa vakasoqoni ira vata na Jiu, a sa dauvakavulici ira, 16—31.

¹ Ia ni keimami sa cabe bula, keimami sa qai kila sa yaca ni yanuyanu ko ya ko Melita.

² A ra sa lomani keimami vakalevu ko ira nai taukei; ni ra sa vakawaqa nai binibini buka, a ra sa kauti keimami yadua ki vale, e na vuku ni uca sa qai tau, kei na liliwa.

³ Ia ni sa cava mai e dua nai vaubuka ko Paula, a sa laki tuva ki na buka sa waqa tu, sa dolo mai na katakata e dua na gata, ka vivica na ligana.

⁴ Ia ni ra sa raica ko ira nai taukei, ni sa lili e na ligana na gata, era sa veikayaka vakai ira, E dina sa tamata daulaba oqo, ia ni sa cabe bula mai na waitui, sa sega ni laivi koya ko Sauma me bula.

⁵ A sa qai kuretaka na gata ki na bukawaqa ko koya, a sa sega ni ca kina.

⁶ Ia era sa nanuma ena vuce mai ko koya, se bale sobu vakasauri ka ciba: ia ni ra sa waraka vakadede, ka sega ni kunea e dua na ka ca sa yaco vua, sa qai vuki na lomadra ka ra kaya sa dua na kalou ko koya.

⁷ Ia sa tiko e na yasana ko ya eso na tiki ni vanua sa nona na turaga ni yanuyanu, o Pupiliu na yacana; a sa vakacegui keitou ko koya, ka vakani keitou vinaka ka bogi tolu.

⁸ Ia sa tauvi-mate na tama i Pupiliu, a sa katakata ka vekacaki dra; a sa curu vua ko Paula, ka masu ka sa tabaka e na ligana, ka vakabula.

⁹ Ia ni sa caka oqo, sa lako mai ko ira tale era sa tauvi-mate e na yanuyanu, a ra sa vakabulai:

¹⁰ a sa levu na ka era sa vakarokorokotaki keitou kina; ia ni keitou sa soko tani, era sa kauta ki waqa na veika e yaga vei keitou.

¹¹ Sa oti e tolu na vula, keimami sa soko e na dua na waqa ni Alekisadria, ka kele e na yanuyanu ko ya e na vula i liliwa, a kena matakau na Drua tagane.

¹² A keimami sa sobu ki Sairakuse, ka tiko kina ka bogi tolu.

¹³ Ia keimami sa lako tani eke, ka veicavuyaki, ka yaco ki Rijio; ia sa bogi dua sa qai liwa na ceva, ka keimami sa yaco e na mataka ki Putioli:

¹⁴ ia keitou sa kunea kina na veiwekani eso, a ra sa masuti keitou me keitou tiko ga ka bogi vitu: keitou sa qai lako ki Roma.

¹⁵ A ra sa rogoca maikina na keitoui tukutuku ko ira na veiwekani, ka sa lako mai ki Na rara i Apio kei Na Bure e Tolu, me ra mai tavaki keitou: ia ni sa raici ira ko Paula, sa vakavinavinaka vua na Kalou, a sa taudei mai.

¹⁶ Ia ni keimami sa curu ki Roma, sa biu ko Paula me tiko duaduaga kei na dua na sotia sa vakatawai koya.

¹⁷ Ia sa bogi tolu, sa qai vakasoqoni ira vata na nodra turaga na Jiu ko koya: ia ni ra sa soqoni vata mai, sa kaya ko koya vei ira, Oi kemudou na veiwekani, au sa sega ni cakava e dua na ka ca vei ira na kai noda, se ki na nodrai valavala na noda qase, ia ka’u a vesuki ga ka soli yani ki na ligadra na kai Roma mai Jerusalemi.

¹⁸ Ia ko ira, ni ra sa lewai au, era sa vinakata me ra sereki au, ni sa sega na ka vei au me’u mate kina.

¹⁹ Ia ni ra sa kaya ko ira na Jiu me kakua, sa uqeti au na lomaqu me’u cavuti Sisa me lewai au; e segai ni dua na ka me’u beitaki ira kina na kai noqu.

²⁰ O koya oqo ka’u sa vakasoqoni kemudou vata kina, mo dou raici au ka vosa kina vei au ni’u sa vesu e na sinucodo oqo e na vuku ni nodrai nuinui na Isireli.

²¹ A ra sa kaya vua, Sa sega e dua mai Jutia sa volai iko vei keitou, e sega talega e dua vei ira na veiwekani sa lako mai sa vakatakila se tukuna e dua na ka ca e na vukumu:

²² ia keitou sa via rogoci iko se cava ko sa nanuma: ni keitou sa kila sa vosavakacacataki na lotu tani oqo e na veivanua kecega.

²³ A ra sa lokuca vua e dua na siga, a ra lewe vuqa sa lako mai ki na nona vale; a sa sereka vei ira ko koya ka tukuna na matanitu ni Kalou, ka vakadinadinataki Jisu vei ira mai na vunau i Mosese, kei ira na parofita, sa vakatekivu e na mataka, ka yacova na yakavi.

²⁴ Ia sa vakadinata ko ira eso na veika sa vosataki, ka so sa sega ni vakadinata.

²⁵ Ia ni ra sa sega ni lomavata vakai ira, era sa lako tani, ni sa vosataka oti ko Paula e dua na vosa: Sa vosa dina na Yalo Tabu ni sa tukuna ko Aisea na parofita vei ira na nomudou qase,

²⁶ ka kaya, Lako vei ira na tamata oqo, ka kaya, Dou na daurogoca tikoga, ka lecava tu; Ia dou na dauraica tikoga, ka sega ni kunea:

²⁷ Ni sa uro mai na lomadra na tamata oqo, A sa didivara na daligadra, A sa bobo na matadra; De dua na siga ena rai na matadra, Ka rogo na daligadra, Ka kila na lomadra, A ra saumaki mai, Ia ka’u na vakabulai ira.

²⁸ O koya oqo mo dou qai kila, ni sa kau na bula mai vua na Kalou vei ira na veimatanitu tani; ia era na vakarogoca.

²⁹ Ia ni sa vosataka oti ko koya na veika oqo, era sa lako tani ko ira na Jiu, a ra sa veileti vakalevu vakai ira.

³⁰ A sa tiko ko Paula ka yabaki rua taucoko e na vale sa volia tiko ko koya, ka sa vakacegui ira kecega era sa lako vua,

³¹ ka sa vunautaka na matanitu ni Kalou, ka sa vakatavuvulitaka vakadoudou sara na ka kei Jisu Karisito na Turaga, ka sa sega na tamata sa tarova.