Cakacaka 25 - Vakavakadewa Makawa

Sa beitaki Paula ko ira na Jiu e na mata i Fesito, a sa tukuni koya vua ko Paula; a sa vosataka ko Fesito na nona laki lewai mai Jerusalemi, a sa kaya ko Paula me lewai koya ko Sisa, 1—12. Sa qai lewai koya ko Akaripa kei Fesito, 13—27.

¹ Ni sa tadu mai ki na vanua ko Fesito, ka sa oti e tolu na bogi, sa qai cavu tu e Sisaria me lako cake ki Jerusalemi.

² Sa qai beitaki Paula vua ko ira na bete levu kei ira na nodra turaga na Jiu, a ra sa vakamasuta,

³ ka kerekere vua me lomani ira e na vukuna, me talakitaki me lako mai ki Jerusalemi ko koya, a ra sa lawavaka me ra vakamatea e na gau ni sala.

⁴ Ia sa kaya ko Fesito, ni sa vakatawai tiko mai Sisaria ko Paula, a sa vakarau me lako yani kina ko koya.

⁵ A sa kaya, Oi kemudou na turaga, me da lako sobu vata, ia ke dua na ca sa tu vua na tamata oqo, mo dou qai beitaki koya kina.

⁶ A sa tiko vata ga kei ira ko koya ka bogi walu se bogi tini sa qai lako sobu ki Sisaria; e na mataka cake sa tiko ko koya e nai tikotiko ni veilewai, a sa kaya me kau mai ko Paula.

⁷ Ia ni sa yaco mai ko koya, era sa tu vakavolivolita ko ira na Jiu era a lako sobu mai Jerusalemi, a ra sa beitaki Paula e na ka ca sara e vuqa, ia era sa sega ni vakadinadinataka rawa.

⁸ Ia sa tukuni koya ko Paula, Au sa sega ni kitaka e dua na ka ca, ki na nodra vunau na Jiu, se ki na vale ni soro, se kivei Sisa.

⁹ Ia ni sa vinakata ko Fesito me vakayalovinakataki ira na Jiu, sa vosa vei Paula, ka kaya, O sa vinakata mo lako cake ki Jerusalemi, mo lewai kina e mataqu e na veika oqo, se segai?

¹⁰ Sa qai kaya ko Paula, Au sa tu e na mata ni tikotiko ni veilewai nei Sisa, a tikina e dodonu me’u lewai kina: au a sega ni kitaka e dua na ka ca vei ira na Jiu, oqo ko sa kila vinaka sara.

¹¹ Kevaka ka’u sa tamatai valavala ca, se’u kitaka e dua na ka e dodonu me’u mate kina, au sa sega ni bese ni mate: ia kevaka e sega na veika oqo era sa beitaki au kina, sa sega e dua e rawata me soli au vei ira. Au sa cavuti Sisa me lewai au.

¹² Ia ko Fesito, ni sa veivosaki oti kei ira na mataveilewai, sa kaya, O sa qai cavuti Sisa, ia ko na kau vei Sisa.

¹³ Sa bogi vica, erau sa qai lako mai ko Akaripa na tui kei Perinaise ki Sisaria, me rau veikidavaki kei Fesito.

¹⁴ Ia ni rau sa bogi vuqa kina, sa tukuni Paula ko Fesito vei koya na tui, ka kaya, Sa dua na tamata sa vesu tu, ko koya ka vakalaiva ko Filikesa:

¹⁵ ia ni’u a tiko mai Jerusalemi, era sa beitaki koya ko ira na bete levu kei ira na nodra qase na Jiu, a ra sa kaya me’u lewai koya me cudruvi.

¹⁶ Au sa qai kaya vei ira, E sega ni nodrai valavala na kai Roma me solia walega e dua na tamata me vakamatei, ka malua me veirai mada kei ira sa beitaka, me sa rawa talega na nona tukuni koya e na vuku ni ka ca sa beitaki vua.

¹⁷ Ia ni ra sa yaco mai kike, au sa sega ni vakaberabera, ia e na mataka cake ka’u sa tiko e nai tikotiko ni veilewai, ka kaya me kau mai na tamata oqo.

¹⁸ Ia ni ra sa tu cake ko ira era sa beitaka, era sa sega ni beitaki koya e na ka ca me vaka na ka ka’u a nanuma:

¹⁹ ia ka so ga na ka sa veiletitaki kaya e na nodra lotu, kei na dua na tamata ko Jisu, ko koya sa mate, ia ka kaya ko Paula sa bula tiko ko koya.

²⁰ Ia ni ka’u sa sega ni kila vinaka me’u lewa na veika oqo, au sa taroga se via lako cake ki Jerusalemi ko koya, me lewai kina e na veika oqo, se segai.

²¹ Ia ni sa vaka ko Paula, me tiko mada me lewai koya ko Akusito, au sa qai kaya me vakatawai tiko ka malua me’u vakatalai koya yani vei Sisa.

²² Sa qai kaya vei Fesito ko Akaripa, Oi au talega, ka’u sa via rogoca na tamata oqo. Sa kaya ko koya, E na mataka ko na rogoci koya.

²³ E na mataka, ni rau sa lako mai ko Akaripa, kei Perinaise, erau ukucavu mai, a rau curu ki na vale ni veitarogi, kei ira vata na turaga levu ni valu, kei ira na turaga ni koro, ia ni sa vakarota ko Fesito, sa kau mai ko Paula.

²⁴ A sa kaya ko Fesito, Kemuni Akaripa na tui, kei kemudou kecega na tamata sa tiko kei keitou eke, dou sa raica na tamata oqo, e na vuku i koya era sa cikevi au ko ira na Jiu e lewe levu, mai Jerusalemi, eke talega, ka ra sa kaya e sega ni dodonu me bula ko koya.

²⁵ Ia ni ka’u sa kunea sa sega ni cakava ko koya e dua na ka ca sa dodonu me mate kina, a sa cavuti Akusito ko koya me lewai koya, au sa qai lewa me’u vakatalai koya kina.

²⁶ Ia ka sega na ka e macala me’u volai koya kina vua na noqu turaga. O koya ga oqo ka’u sa kauta mai kina ki na matamudou, ia ka vakaidina vei kemuni, Akaripa na tui, me tarogi mada me macala kina na ka me’u vola.

²⁷ Ni sa rairai vei au me ka lialia me tala e dua sa vesu, ka sega ni vakatakila talega na ka ca sa beitaki vua.