Cakacaka 22 - Vakavakadewa Makawa

Sa vakatusa ko Paula na vu ni nona lotu; sa tukuna talega ni sa lesi koya na Turaga mei talatala, 1—21. Ni ra sa rogoci koya ni sa tukuna na nona lako vei ira na veimatanitu tani, era sa cudru vakalevu, ka ia me ra vakacacani koya, a sa vakabulai koya na turaga ni valu, 22—30.

¹ Oi kemuni na veiwekani, kei na qase, ni vakarorogo mai ni ka’u sa tukuni au vei kemuni:

² Ia ni ra sa rogoca sa vosa ko koya vei ira e na vosa vaka-Iperiu, era sa tiko lo sara, a sa kaya ko koya:

³ Oi au dina na Jiu, au a sucu mai Tarisu mai Silisia, ia ka’u a susugi e na koro oqo, ka sa vakatavulici au vakadodonu ko Kamalieli me vaka na nodra vunau na qase, ia ka’u a gumatua e na vuku ni Kalou, me vakataki kemuni kecega e na siga oqo:

⁴ ia ka’u a vakacacani ira sa Lotu vakaoqo me ra mate, ia ka’u a vesuka ka biuta ki na vale ni veivesu na tagane eso ka so na yalewa.

⁵ A sa noqui vakadinadina na bete levu, kei ira kecega na qase: ni ka’u a taura na nodrai vola vei ira na veiwekani, ka lako ki Tamasiko, me’u kauti ira era sa tiko kina ki Jerusalemi ni ra sa vesuki, me ra cudruvi.

⁶ Ia sa yaco, ni ka’u sa lako yani, ka toro voleka ki Tamasiko e na siga levu tutu, sa dua na rarama levu sa cila vakasauri mai lomalagi ka vakavolivoliti au.

⁷ Au sa qai bale ki na qele, ka rogoca e dua na vosa sa kaya vei au, I Saula, i Saula, ko sa vakacacani au e na vuku ni cava?

⁸ Au sa qai taroga, O cei beka koi kemuni Turaga? A sa kaya vei au ko koya, Oi au ko Jisu na kai Nasareci, ko koya ko sa vakacacana.

⁹ A ra sa raica dina na rarama ko ira sa lako vata kei au; a ra sa sega ni rogoca na vosa i koya sa vosa mai vei au.

¹⁰ Au sa qai taroga, A cava me’u kitaka, noqu Turaga? A sa kaya mai vei au na Turaga, Cavu tu, ka lako ki Tamasiko; ia ena tukuni kina vei iko na ka kecega sa lesi vei iko mo kitaka.

¹¹ Ia ni ka’u sa sega ni rai rawa e na vuku ni kena remoremo na rarama ko ya, era sa tuberi au ko ira sa lako vata kei au, ka’u sa yaco kina ki Tamasiko.

¹² A sa dua ko Ananaiasa, a tamata lotu dina me vaka na vunau, a sa rogo vinaka vei ira kecega na Jiu era sa tiko maikina,

¹³ sa lako mai vei au, a sa tu, ka kaya vei au, Na wekaqu Saula, mo rai vinaka mai. Ia, e na tiki-ni-siga ko ya, ka’u sa rai cake vua.

¹⁴ A sa kaya ko koya, Sa digitaki iko na nodra Kalou na noda qase, mo kila na lomana, ka raici Koya na Yalododonu, ka rogoca na vosa ni gusuna:

¹⁵ ni ko na dautukuni koya vei ira na tamata kecega e na ka ko sa raica ka rogoca.

¹⁶ Ko sa qai vakaberabera tale e na vuku ni cava? tu cake, mo papitaisotaki, ka vuya laivi na nomui valavala ca, ni ko sa masuta na yaca ni Turaga.

¹⁷ Ia ka yaco, ni ka’u sa lesu tale mai ki Jerusalemi: ni ka’u sa masu tiko e na vale ni soro, au sa raica na raivotu:

¹⁸ ia ka’u sa raici koya ni sa kaya vei au Kusarawa mo lako tani e Jerusalemi: ni ra na sega ni vakabauta na nomui tukutuku e na vukuqu.

¹⁹ Au sa qai kaya, Kemuni na Turaga, era sa kila ni ka’u a biuti ira ki na vale ni veivesu era sa vakabauti kemuni ka vakanakuitataki ira e na vale ni lotu kecega:

²⁰ ia ni sa vakadavei na dra kei Sitiveni ko koya ka dautukuni kemuni, au a tu voleka talega kina, ka vinakata na nona mate, ka maroroya na nodrai sulu era sa vakamatea.

²¹ Sa qai kaya vei au ko koya, Lako tani yani: ni ka’u na talai iko vakayawa vei ira na veimatanitu tani.

²² Ia era sa rogoci koya ka yacova mada na vosa oqo, era sa qai tabalaka cake na domodra, ka kaya, Me kau tani e vuravura na tamata sa vakaoqo: ni sa sega ni dodonu me bula.

²³ Ia ni ra sa qoqolou, ka veibiuyaka na nodrai sulu, ka biuta na kuvu-ni-soso ki na cagi,

²⁴ sa kaya na turaga levu ni valu me ra kauti koya ki na bure ni valu, a sa kaya me tarogi ni sa vakanakuitataki, me kila ko koya se cava era sa qolouvaki koya kina vakaoqo.

²⁵ Ia ni ra sa vesuka tiko e na wa, sa taroga ko Paula vua na turaga sa tu kina, E tara beka vei kemudou mo dou vakanakuitataka na kai Roma, ka sega mada ni lewai?

²⁶ Ia ni sa rogoca na turaga ko ya, sa laki tukuna vua na turaga levu ni valu, ka kaya, Mo lewai iko vinaka e na ka ko kitaka: ni sa kai Roma na tamata oqo.

²⁷ Sa qai lako mai na turaga levu ni valu, ka kaya vua, Tukuna mai vei au, se ko sa kai Roma se segai. Sa kaya ko koya, Io.

²⁸ Sa qai kaya na turaga levu ni valu, Sa ka levu nai lavo ka’u sa volia kina me’u lewe ni koro ko ya. A sa kaya ko Paula, Ia koi au, ka’u a sucu kina.

²⁹ Era sa qai lako tani sara ko ira sa lesi me ra tarogi koya; a sa rere talega na turaga levu, ni sa kila e kai Roma ko koya, e na vuku talega ni nona vesuki koya.

³⁰ Ia e na mataka ni sa via kila ko koya na kena dina ni ka era sa beitaki koya kina ko ira na Jiu, sa sereka na kenai vesu ko koya, a sa kaya vei ira na bete levu kei na nodra mataveilewai kecega me ra lako mai; a sa qai kauti Paula sobu, ka vakatura e matadra.