Cakacaka 19 - Vakavakadewa Makawa

Sa soli na Yalo Tabu vei ira eso sa lotu mai Efeso, 1—7. Sa tiko mai Efeso ko Paula ka dauvunau, ka cakava na ka-mana e vuqa, 8—12. Eso na Jiu, era tamata vakatevoro, sa vakatovolea me ra vakaseva tani e dua na tevoro e na yaca i Jisu, a ra sa dredreta, ka sa tubu kina na lotu, 13—20. Sa qai vakacacani ira na tamata lotu ko ira eso, 21—41.

¹ Ia ni sa tiko mai Korinica ko Apolosa, sa lako ko Paula ki na yasana vaka ki colo ka yaco ki Efeso: a sa kunea eso sa lotu,

² a sa kaya vei ira, Sa yaco vei kemudou na Yalo Tabu ni dou sa qai vakabauta, se segai? A ra sa kaya vua Keitou sa sega mada ni rogoca se sa soli na Yalo Tabu, se segai.

³ A sa kaya vei ira ko koya, Dou sa papitaisotaki beka e na cava? A ra sa kaya, E na papitaiso i Joni.

⁴ Sa qai kaya ko Paula, E dina ga sa dauveipapitaisotaki ko Joni e na papitaiso ni veivutuni, ka kaya vei ira na tamata, me ra vakabauti koya ena muri koya mai, ko koya oqo ko Jisu.

⁵ Ia ni ra sa rogoca era sa papitaisotaki e na yaca ni Turaga ko Jisu.

⁶ Ia ni sa tabaki ira ko Paula e na ligana, sa yaco kivei ira na Yalo Tabu; a ra sa vosataka na vosa ni veivanua tani, ka dauvakatavuvuli.

⁷ Ko ira kecega na tagane era sa lewe tinikarua beka.

⁸ A sa lako ko koya ki na vale ni lotu, a sa vosa doudou tikoga ka vula tolu, a sa vakavuvuli ka vakadinadinataka na veika ni matanitu ni Kalou.

⁹ Ia ni ra sa vakalomaqataki eso, ka sega ni vakabauta, ka sa vosavakacacataka na Lotu e na matadra na lewe vuqa, sa qai lako tani maivei ira ko koya, ka tawasei ira tani era sa lotu, a sa dauvakatavuvuli tiko e na veisiga e na vale ni wili vola nei Tirano.

¹⁰ A sa kitaka vakakina ka yabaki rua; ia era sa rogoca kina na vosa ni Turaga ko Jisu ko ira kecega era sa tiko mai Esia, ko ira na kai Jutia, kei ira talega na kai Kirisi.

¹¹ A sa kitaka na Kalou na ka-mana vakaidina eso e na liga i Paula:

¹² a ra sa kauta tani mai na yagona nai tavoi eso kei nai sulu eso vei ira era tauvi-mate, a sa takali kina na nodra mate, a sa lako tani maivei ira ko ira na yalo ca.

¹³ Ia ka so na kai Jutia era sa dauveilakoyaki, ka dauia me vakasevi ira na tevoro, eratou sa bolea me ratou cavuta na yaca ni Turaga ko Jisu vei ira ka curumi ira na yalo ca, a ratou sa kaya, Keitou sa vakatalai kemudou tani e na yaca i Jisu, ko koya sa vunautaka ko Paula.

¹⁴ A ratou sa lewe vitu na luve i Siva na kai Jutia, ka bete levu, eratou sa kitaka vakakina.

¹⁵ Sa qai vosa na yalo ca, ka kaya, Ko Jisu ka’u sa kila, ko Paula talega ka’u sa kila; ia ko cei koi kemudou?

¹⁶ A sa rika vei iratou na tamata sa tiko vua na yalo ca, a sa rawai iratou, ka sa kaukauwa vei iratou, a ratou sa dro tani kina mai na vale ko ya, a ratou sa luvawale ka mavoa.

¹⁷ A sa kila na ka oqo ko ira kecega, na kai Jutia kei na kai Kirisi talega, era sa tiko mai Efeso; a sa kani ira kecega na rere, a sa vakabekabei na yaca ni Turaga ko Jisu.

¹⁸ A sa lewe vuqa vei ira sa vakabauta era sa lako mai, ka vakatusa, ka vakatakila na nodrai valavala.

¹⁹ A sa lewe vuqa talega vei ira era daukitaka eliu nai lawaki vakatevoro eso, era sa kumuna vata na nodrai vola, ka visa e na matadra kecega; a ra sa wilika vata na kedrai voli, a ra sa kunea ni sa limasagavulu na udolu nai lavo siliva.

²⁰ Sa tubu vakaukauwa vakaoqo na vosa ni Turaga, ka sa gumatua.

²¹ Ia ni sa oti na veika oqo, sa nakita ko Paula e lomana, me lakovi Masitonia mada kei Akaia, ka qai lako ki Jerusalemi, a sa kaya, Ni ka’u sa tiko mada kikea, e dodonu me’u qai raici Roma talega.

²² A sa qai tala ki Masitonia e lewe rua vei ira sa dauqaravi koya, ko Timoci kei Irasito; a sa tiko vakadede vakalailai ko koya mai Esia.

²³ Ia e na gauna ko ya sa tubu vakalevu na ue e na vuku ni Lotu.

²⁴ Ni sa dua, na yacana ko Timitirio, a matai ni siliva, sa daucakava e na siliva nai vakatakarakara ni bure kalou nei Taiana, a sa vakalevutaka kina na nodrai yau na matai;

²⁵ ni sa kacivi ira vata, kei ira na tamata era sa daucakacaka vakakina, sa kaya ko koya, Oi kemudou na turaga, dou sa kila sa cakacaka oqo eda sa vakaiyau kina.

²⁶ Ia dou sa qai raica ka rogoca, ni sa segai e Efeso duaduaga, sa vo e lailai ga me otivi Esia taucoko, ko Paula oqo, ka sa lewe vuqa sara sa rawa, ka sa saumaka tani, ni sa kaya, sa sega ni kalou na ka sa caka e na liga:

²⁷ ia sa voleka ni beci kina na noda cakacaka oqo, ka sega ni koya duaduaga oqo, sa voleka talega me vakawaletaki na bure i Taiana na kalouyalewa levu, ka me lutu mai na nonai tutu lagilagi, ko koya sa soro vua ko Esia taucoko kei vuravura.

²⁸ Ia ni ra rogoca, sa ka tani sara na nodra cudru, a ra sa qoqolou, ka kaya, Sa levu ga ko Taiana na kalou ni kai Efeso.

²⁹ A sa ka levu na ue e na koro taucoko; a ra sa tauri Keio vakaukauwa kei Arisitako, erau sa kai Masitonia, erau sa daulako kei Paula, a ra sa curu vakaukauwa vata ki na bure levu.

³⁰ Ia ni sa via curu ko Paula, vei ira na tamata, era sa tarova ko ira era sa lotu.

³¹ O ira talega eso era sa turaga mai Esia, era sa nonai to, era sa talaki vua, ka masuta me kakua ni doudou me curu ki na bure levu.

³² A ra sa dui qoqolou: ni ra sa ue nai soqosoqo era lewe vuqa; ia sa lewe levu vei ira era sega ni kila se cava era a soqoni vata kina.

³³ Ia eso vei ira na lewe vuqa era sa vakaturi Alekisada cake, ni sa cikevi koya ko ira na Jiu. A sa vakatabataba ko Alekisada, a sa via tusanaki koya vei ira na tamata.

³⁴ Ia ni ra sa kila e kai Jutia ko koya, sa sosoraki vata na domodra ka oti e rua na aua, ka qoqolou vaka, Sa levu ga ko Taiana na nodra kalou na kai Efeso.

³⁵ Ia ni sa tarovi ira na lewe vuqa na vunivola ni koro, sa kaya, Oi kemudou na kai Efeso, ko cei na tamata sa sega ni kila ni sa vakatau ki na lewe ni koro ko Efeso na bure kalou ni kalouyalewa levu ko Taiana, kei na matakau sa lutu sobu maivei Jupita?

³⁶ Ia ni sa sega ni vakatitiqataki rawa na veika oqo, sa dodonu mo dou tiko malua, ka kua ni kitaka vakailoa e dua na ka:

³⁷ ni dou sa kauti ira mai kike na tamata oqo, era sa sega ni daubutako mai na vale ni soro, se vosavakacacataka na noda kalouyalewa.

³⁸ Ia kevaka sa via beitaka e dua ko Timitirio, kei ira na matai era sa nonai to, sa ia na veilewai, a sa tiko na turaga ni lewa: me ra laki veibeitaki.

³⁹ Ia kevaka sa dua tani na ka dou sa taroga, ena lewai e na dua na soqoni me vaka na vunau.

⁴⁰ Ni na beitaki beka vei keda na ue, e na vuku ni ka sa yaco edaidai, ka ni da sa sega ni tukuna rawa e dua na ka e vuna na soqoni vata oqo.

⁴¹ Ia ni sa vosa oti vakaoqo, sa qai vakasukai ira nai soqosoqo.