Cakacaka 17 - Vakavakadewa Makawa

Sa laki vunau mai Cesalonaika ko Paula, a sa vakabauta ko ira eso, ka cudru eso, 1—9. Era sa vakatalai koya kei Sailasa ki Peria, a ra sa vakabauta kina na kai Peria e lewe vuqa, 10—15. Sa lako ki Aceni ko Paula ka vunau, a sa vakabauta ko ira eso, 16—34.

¹ Ia ni ratou a lakovi Amifipoli kei Apolonia, eratou sa yaco ki Cesalonaika, a sa tu kina e dua na nodra vale ni lotu na kai Jutia:

² a sa curu kina vei ira ko Paula, me vaka na nonai valavala, ka sa tolu na siga ni vakacecegu sa vakavulici ira kina mai nai Vola Tabu,

³ ni sa vakatakila ka vakadinadina, ni sa kilikili kei na Karisito me vosota na mate, ka tu cake tale mai na mate; ka vaka, Ni sai koya na Karisito, ko Jisu oqo, ko koya ka’u sa vunautaka vei kemudou.

⁴ A sa vakabauta ko ira eso, ka laki veitokani kei Paula kei Sailasa; kei ira e lewe vuqa na kai Kirisi era a lotu vaka-Jiu, kei ira na marama era sa sega ni lewe lailai.

⁵ Sa qai vuvu ko ira na Jiu, a ra sa kauta eso vei ira na kaisi botoboto, a ra sa vakasoqoni ira vata na lewe vuqa, ka vakatubu ue e na koro; a ra sa cici vakaukauwa ki na vale i Jesoni, a ra sa segata me ra kauti iratou vei ira na lewe ni koro.

⁶ Ia ni ra sa sega ni kunei iratou, era sa yarataki Jesoni kei ira na veiwekani eso vei ira na turaga ni koro, ka kaci, O iratou oqo eratou sa vukici vuravura me ca, eratou sa tadu talega mai kike;

⁷ ka sa kauti iratou ko Jesoni ki nona vale; ka ra sa talaidredre ko ira kecega oqo ki na vunau i Sisa, a ra sa kaya sa dua tale na tui, ko Jisu.

⁸ A ra sa vakidroataki ira na lewe ni koro kei ira na kena turaga, ni ra sa rogoca na veika oqori.

⁹ Ia ni ra sa vakabauta na yalayala i Jesoni kei ira na tani, era sa sereki ira me ra lako.

¹⁰ Ia ko ira na veiwekani era sa kusarawa me ra talai Paula kei Sailasa ki Peria e na bogi; ia ni rau sa yaco kina, erau sa lako ki na nodra vale ni lotu na kai Jutia.

¹¹ A ra sa uasivi vei ira na kai Cesalonaika ko ira oqo e na yalo vakaturaga, ni ra sa vakarogoca na vosa e na loma e vinakata sara, a ra sa dauvakasaqaqara e nai Vola Tabu e na veisiga, se sa vakakina na ka oqori, se segai.

¹² O koya ga oqo era sa lewe vuqa kina era sa vakabauta; kei ira talega na marama ni Kirisi, kei ira na tagane, era sa sega ni lewe lailai.

¹³ Ia ni ra sa kila ko ira na Jiu mai Cesalonaika ni sa vunautaka na vosa ni Kalou ko Paula mai Peria, era sa lako talega kina, ka vakayavalati ira na lewe vuqa.

¹⁴ A ra sa kusarawa kina na veiwekani me ra talai Paula yani me lako vaka ki na wasawasa: a rau sa tiko laivi ga maikea ko Sailasa kei Timoci.

¹⁵ Ia ko ira sa vakaraici Paula era sa kauta ki Aceni: ia ni sa tau vei ira nai vakaro vei Sailasa kei Timoci me rau lako kusarawa mai vua, era sa qai lako.

¹⁶ Ia ni sa waraki rau tiko mai Aceni ko Paula, sa katakata vakalevu na lomana, ni sa raica sa oso na koro e na veimatakau.

¹⁷ O koya sa veileti kina ko koya kei ira na kai Jutia e na nodra vale ni lotu, kei ira talega na tani era sa lotu, kei ira talega era sa sota kaya e na rara ni veivoli e na veisiga.

¹⁸ Sa qai veileti kaya, eso na nodra vuku nai tokani i Epikuro, kei ira na Sitoike. Ka sa kaya eso, A cava mada sa via kaya o la na dauvosa oqo? eso tani, Ko koya oqo sa vaka e dua sa vakatakila mai eso na kalou vou: ni sa vunautaki Jisu vei ira ko koya, kei na tu cake tale mai na mate.

¹⁹ A ra sa qai taura, ka tubera ki na vanua-cecere nei Arisi, ka kaya, Ena rawa beka me keimami kila se cava nai vakavuvuli vou oqo ko sa mai tukuna?

²⁰ ni ko sa kauta mai eso na veika e veivakurabuitaki ki na daligaimami: keimami sa via kila kina, se cava nai balebale ni veika oqo. (

²¹ Ni sa sega na ka tani era sa daukitaka ko ira kecega na kai Aceni, kei ira na vulagi era sa tiko kina, me ra veitukutukunitaka ga se rogoca, e dua na ka vou.)

²² Sa qai wavu tu ko Paula e na loma ni vanua-cecere nei Arisi, ka kaya, Oi kemuni na kai Aceni, au sa kunea e na ka kecega ni kemuni sa dausoro vakalevu.

²³ Io, ni’u sa lako voli, ka raica na veika kemuni sa soro kina, au sa kunea talega e dua nai cabocabo-ni-soro sa volai kina VUA NA KALOU E TAWA KILAI. Ia ko koya ko ni sa soro kina ni kemuni sa sega ni kila, au sa qai tukuna vei kemuni.

²⁴ A Kalou ka buli vuravura kei na ka kecega sa tu kina, sa Turaga ga ko koya mai lomalagi kei vuravura, a sa sega ni tiko e na veivale ni soro sa caka e na liga;

²⁵ a sa sega talega ni qaravi e na liga ni tamata, me vaka e bau yaga vua e dua na ka, ni sa solia ga ko koya vei keda kecega na bula, kei na cegu, kei na ka kecega;

²⁶ a sa buli ira, era sa dra vata, na lewe ni veivanua kecega, me ra tiko e na dela i vuravura taucoko, a sa lesia na veigauna ka digitaki eliu, kei nai yalayala ni nodra veiyasana;

²⁷ me ra vakasaqara na Kalou, de ra vakayayamo beka vua, ka kunea, ia sa sega ga ni yawa ko koya vei keda yadua;

²⁸ ni da sa bula vei koya, ka yavala, ka rawata mai vua na noda bula; me vaka talega sa kaya ko ira na nomuni dau-ni-vucu eso, Sa nona kawa talega koi keda.

²⁹ Oqo, ni da sa kawa ni Kalou, e sega ni dodonu me da nanuma sa tautauvata na Kalou kei na koula, se na siliva, se na vatu, sa ceuta na matai se na tamata vuku.

³⁰ Ia na gauna ni lialia sa vosota oti na Kalou; a sa vakarota e na gauna edaidai vei ira na tamata kecega e na veivanua kecega me ra veivutuni;

³¹ ni sa lokuca ko koya na siga, ena lewai vuravura kina e na lewa dodonu, vei koya na tamata sa lesia ko koya; a sa vakadinadina kina vei ira na tamata kecega, e na nona vakaturi koya cake tale mai na mate.

³² Ia ni ra sa rogoca na tu cake tale mai na mate, sa vakalialia ko ira eso; ka so sa kaya, Keitou na rogoci iko tale e na ka oqo.

³³ Sa qai lako tani yani e na kedra maliwa ko Paula.

³⁴ A sa kabiti koya eso na tamata, a ra sa vakabauta; e dua vei ira ko Taionisio mai na mataveilewai mai na vanua-cecere nei Arisi, kei na yalewa sa vakatokai ko Tamarisi, koi rau kei ira tale eso.