Cakacaka 15 - Vakavakadewa Makawa

Sa tubu e dua na veileti e na vuku ni veicili kei na ka tani eso, 1—5. Era sa soqoni vata ko ira nai apositolo kei ira na qase, me ra bosea na ka oqo; a ra sa volavola vei ira na lewe ni lotu e na veikoro eso, 6—35. Erau sa kauta nai vola ko Paula kei Panapasa; a rau sa veileti e na vuku i Marika, 36—41.

¹ Ia sa lako sobu mai Jutia eso, ka vakavulici ira na veiwekani, Kevaka dou sa sega ni cili me vaka nai valavala i Mosese, dou sa sega ni vakabulai rawa.

² Ia ni ra sa veileti vakalevu ka veiba kei rau ko Paula kei Panapasa, era sa lesi Paula kei Panapasa, kei iratou tale eso maivei ira, me ratou lako cake ki Jerusalemi vei iratou nai apositolo, kei ira na qase, e na vuku ni ka oqo.

³ A ra sa talatala vei ira nai soqosoqo lewe ni lotu, a ratou sa lakovi Finaisi kei Samaria, ka tukuna tiko ni sa saumaki mai ko ira sa matanitu tani: a ra sa vakamarautaki ira vakalevu na veiwekani kecega.

⁴ Ia ni ratou sa yaco ki Jerusalemi, sa mai vakacegui iratou ko ira nai soqosoqo lewe ni lotu, kei ira nai apositolo, kei ira na qase, a ratou sa tukuna na ka kecega sa cakava na Kalou ni sa veivuke kei iratou.

⁵ A sa tu cake eso na nodrai tokani na Farisi era sa vakabauta, ka kaya, Sa dodonu me cilivi ko ira oqori, me vakaroti talega vei ira me ra talairawarawa ki na vunau i Mosese.

⁶ A ra sa soqoni vata mai ko ira nai apositolo, kei ira na qase me ra bosea na ka oqo.

⁷ Ia ni sa levu na veileti, sa tu cake ko Pita, ka kaya vei ira, Oi kemuni na veiwekani, kemuni sa kila sa digitaki au maivei keda na Kalou, e na gauna sa oti makawa yani, me ra rogoca kina na vosa ni tukutuku-vinaka ko ira na veimatanitu tani, me ra vakabauta.

⁸ Ia na Kalou ko koya sa kila na yaloda, sa vakadinadina vei ira, ni sa solia vei ira na Yalo Tabu, me vaka ga vei keda;

⁹ a sa sega ni vinakati keda cake vei ira, ia sa vakasavasavataka na yalodra e na vakabauta.

¹⁰ Ia ka cava kemuni sa qai vakatovolea vakaca kina na Kalou mo ni vakataqara nai vua ki na domodra era sa lotu, eda sa sega ni colata rawa koi keda se ko ira na noda qase?

¹¹ Ia eda sa vakadinata ni da na bula e na loloma ni noda Turaga ko Jisu Karisito, me vaka talega kina ko ira oqori.

¹² Sa qai galu ko ira vakaaduaga na lewe vuqa, me ra rogoci Panapasa kei Paula, ni rau sa tukuna na veivakatakilakila, kei na veika e veivakurabuitaki, sa cakava na Kalou e na ligadrau, e na kedra maliwa na veimatanitu tani.

¹³ Ia ni rau sa tinia na nodraui tukutuku, sa vosa ko Jemesa, ka kaya, Oi kemuni na veiwekani, ni rogoci au mai:

¹⁴ Sa tukuna oti ko Saimoni se sa laki kauta vakaevei eliu na Kalou eso na tamata maivei ira na veimatanitu tani, me tiko vei ira na yacana.

¹⁵ Ia na ka oqo sa bale vata kei na nodra vosa na parofita; me vaka na ka sa volai,

¹⁶ Ni sa oti na veika oqo ka’u na lesu mai, Ka vakatura tale na vale i Tevita, ko koya sa bale sobu; Ia ka’u na vakatura tale na kena ka sa rusa, Au na vakaduria talega mai:

¹⁷ Me ra vakasaqara na Turaga ko ira na tamata sa vo, Kei ira kecega na veimatanitu, era sa vakatokai e na yacaqu,

¹⁸ Sa kaya vua na Turaga, ko koya sa vakatakila na ka kecega oqo mai nai vakatekivu kei vuravura.

¹⁹ O koya ka’u sa lewa kina, me da kakua ni vakaocataki ira, era sa saumaki mai vua na Kalou, maivei ira na veimatanitu tani:

²⁰ me da volavola ga vei ira, me tabu vei ira na qarava na matakau, na daudara talega, kei na ka sa kuna kei na dra.

²¹ Ni ra sa tiko makawa e na veikoro kecega ko ira sa vunautaki Mosese, ni ra sa wilika e na veivale ni lotu e na veisiga ni vakacecegu.

²² Sa ra qai vinakata ko ira nai apositolo kei ira na qase, kei ira kecega nai soqosoqo lewe ni lotu, me digitaka na tamata eso maivei ira, ka vakatala me ratou lako vata kei Paula kei Panapasa ki Anitioki; koi rau ko Jutasa na yacana talega ko Parisapa, kei Sailasa, a tamata erau sa liu vei ira na veiwekani:

²³ a ra sa volavola vakaoqo me ratou kauta: Oi keimami nai apositolo kei na qase, keimami sa loloma yani vei kemuni na veiwekani sa matanitu tani mai Anitioki kei Siria kei Silisia:

²⁴ Ni keimami sa rogoca, era sa lako tani vei keimami eso era sa vakidroataki kemudou e na nodra vosa, a ra sa vukica tani na lomamudou, ia keimami sa sega ni talai ira:

²⁵ sa qai vinaka vei keimami, ni keimami sa soqoni vata ka lomavata, me digitaka eso na tamata, ka tala vei kemudou me ratou lako vata kei rau na daulomani ko Panapasa kei Paula,

²⁶ a tamata erau sa bolea na mate e na vuku ni yacana na noda Turaga ko Jisu Karisito:

²⁷ o koya keimami sa talai Jutasa kei Sailasa, erau na tukuna talega na veika oqo e na gusudrau.

²⁸ Ni sa vinaka vua na Yalo Tabu, vei keimami talega, me keimami kakua ni tauca vei kemudou nai colacola levu, oqo ga ni sa ka dodonu:

²⁹ Me tabu vei kemudou na veika sa cabo ki na veimatakau, na dra talega, kei na ka sa kuna, kei na daudara: ia kevaka dou qarauni kemudou mai na veika oqo, dou na caka vinaka. Sa loloma.

³⁰ Ia ni ratou sa talai, eratou sa lako ki Anitioki; ia ni ratou sa vakasoqoni ira vata na lewe vuqa, eratou sa solia nai vola:

³¹ ia ni ra sa wilika oti, era sa reki e na vuku ni veivakacegui.

³² Ia ko Jutasa kei Sailasa, koi rau sai vakavuvuli talega, erau sa vakavulici ira na veiwekani e na vosa e vuqa, ka vakataudeitaka.

³³ Ia ni ratou sa tiko bogi vica, era sa qai vakatalai iratou ko ira na veiwekani e na vakacegu kivei ira nai apositolo.

³⁴ Ia sa vinakata ko Sailasa me tikotiko ga maikea.

³⁵ Ia ko Paula kei Panapasa, erau sa tiko mai Anitioki ka rau sa vakavuvuli ka vunautaka na vosa ni Turaga, kei ira na tani e lewe vuqa.

³⁶ Sa bogi vica, sa qai kaya ko Paula vei Panapasa, Me daru lako tale me raica se ra sa vakaevei ko ira na wekada e na veikoro kecega edaru a vunautaka kina na vosa ni Turaga.

³⁷ A sa nanuma ko Panapasa me rau kauti Joni, a yacana talega ko Marika.

³⁸ A sa sega ni vinakata ko Paula me rau kauti koya, ni sa biuti rau eliu mai Pamifilia ko koya, ka sega ni lako vata kei rau ki na cakacaka.

³⁹ A sa katakata kina na veileti, a rau sa dui lako kina: a sa kauti Marika ko Panapasa, a rau sa soko ki Kipiro:

⁴⁰ a sa digitaki Sailasa ko Paula, a sa lako yani, ni sa vatonaki rau ki na loloma ni Kalou ko ira na veiwekani.

⁴¹ A sa lako voli ko koya e Siria kei Silisia, a sa vakataudeitaki ira kina na veisoqosoqo lewe ni lotu.