Akeai 2 - Vakavakadewa Makawa

Sa vagumatuataki ira e na vosa ni yalayala e levu ka talei, me tara na vale tabu, 1-9. Sa tukuna na ka ca ena yacovi ira kevaka era gucataka, 10-19. Sa ia na vosa ni veivakacegui vei Serupapeli, 20-23.

¹ E nai kavitu ni vula, e nai karuasagavulu ka dua ni siga ni vula, sa yaco na vosa i Jiova vei Akeai na parofita me tukuna, ka vaka,

² Mo vosa mada vei Serupapeli na luve i Sialitieli, na kovana e Juta, kei Josua na luve i Jiosataki, na bete levu, kei ira na tamata sa vo tiko, ka kaya,

³ O cei vei kemudou sa bula tiko dou a raica na vale oqo e na kena lagilagi eliu? ka sa vakabeka evei na ka dou sa qai raica edaidai? sa sega li ni vaka na ka wale sara e na matamudou?

⁴ Ia mo gumatua mada ga Serupapeli, sa kaya ko Jiova; mo gumatua talega, Josua na luve i Jiosataki, na bete levu; mo dou gumatua kece talega, na lewe ni vanua, sa kaya ko Jiova, ia dou ia na cakacaka, ni'u sa tiko vata kei kemudou, sa kaya ko Jiova ni lewe vuqa.

⁵ Me vaka na noqu vosa ni veiyalayalati kei kemudou, ni dou a lako mai Ijipita, sa tiko ga kei kemudou na Yaloqu: dou kakua ni rere.

⁶ Ni sa kaya vakaoqo ko Jiova ni lewe vuqa; Sa vakadua tale, sa vo e lailai, ka'u na qai vakayavalataki lomalagi, kei vuravura, kei na waitui, kei na vanua mamaca;

⁷ ia ka'u na vakayavalataka na veimatanitu kecega, ena qai yaco mai na ka sa domoni e na veimatanitu kecega; ia ka'u na vakasinaita na vale oqo e nai ukuuku, sa kaya ko Jiova ni lewe vuqa.

⁸ Sa noqu na siliva, ka sa noqu na koula, sa kaya ko Jiova ni lewe vuqa.

⁹ Ena levu nai ukuuku ni vale oqo ki muri ka lailai nai ukuuku ni vale eliu, sa kaya ko Jiova ni lewe vuqa: ia e na yasana oqo ka'u na ia kina na veivinakati, sa kaya ko Jiova ni lewe vuqa.

¹⁰ E nai karuasagavulu ka va ni siga e nai kaciwa ni vula, e nai karua ni yabaki i Taraiase, sa yaco na vosa i Jiova vei Akeai na parofita me tukuna, ka vaka,

¹¹ Sa kaya vakaoqo ko Jiova ni lewe vuqa; Mo tarogi ira mada na bete e na vuku ni vunau, ka kaya,

¹² Ke dua na tamata sa kauta na lewe ni manumanu mei soro tabu e na tutu ni nonai sulu, a sa tara e na tutu ni sulu na madrai, se na su, se na waini, se na waiwai, se dua na kakana, sa na tabu kina na ka oqori se segai? A ra sa kaya na bete, E segai.

¹³ Sa qai kaya ko Akeai, Ke dua sa sega ni savasava e na vuku ni yago ni mate, me tara e dua na ka oqori, ena sega ni savasava li na ka ko ya? A ra sa kaya na bete, Ena sega ni savasava.

¹⁴ Sa baci vosa tale ko Akeai, ka kaya, Sa vakakina ko ira na tamata oqo, ka sa vakakina na matanitu oqo e mataqu, sa kaya ko Jiova; sa vaka talega kina na cakacaka kecega ni ligadra; ia na ka era sa vakacabora maikea sa sega ni savasava.

¹⁵ Ia oqo, dou vakananuma mada e na siga oqo ka yacova na gauna sa oti yani ni sa sega na veivatu e veitaqataqai e na vale tabu i Jiova:

¹⁶ mai na veigauna ko ya, ni sa lako mai e dua ki nai binibini vau sila e ruasagavulu, ia ka sa qai tini ga: ni sa lako mai ki nai keli-waini me takiva e limasagavulu mai nai keli, sa qai ruasagavulu walega.

¹⁷ Au a yaviti kemudou e na cagi todra, kei na bokata, kei na uca-cevata, e na cakacaka kece ni ligamudou; ia dou a sega ga ni lesu vei au, sa kaya ko Jiova.

¹⁸ Dou vakananuma mada e na siga oqo, io nai karuasagavulu ka va ni siga e nai kaciwa ni vula ka yacova na gauna sa oti yani; io ki na siga sa tauyavutaki kina na vale tabu i Jiova, dou vakananuma kina.

¹⁹ Sa vo li na sila e na lololo? ia na vaini, kei na lolo, kei na pomekaraneti, kei na olive, sa sega sara ni vua mai; Tekivu vata kei na siga oqo ka'u na vakalougatataki kemudou.

²⁰ Sa baci yaco tale na vosa i Jiova vei Akeai e nai karuasagavulu ka va ni siga ni vula, ka vaka,

²¹ Mo kaya vei Serupapeli, na kovana e Juta, Au na vakayavalata na lomalagi kei vuravura;

²² ia ka'u na vukica nai tikotiko vakaturaga ni veimatanitu, ka vakarusa na kaukauwa ni veimatanitu e na veivanua; ka vukica na qiqi-ni-valu, kei ira era vodo kina: a ra na dui bale sobu na ose kei ira era vodo kina, na tamata yadua e nai seleiwau ni wekana.

²³ E na siga ko ya, sa kaya ko Jiova ni lewe vuqa, au na kauti iko, Serupapeli na luve i Sialitieli, na noqu tamata, sa kaya ko Jiova, ia ka'u na cakava mo tautauvata kei na mama ni taba: ni sai iko ka'u sa digitaka, sa kaya ko Jiova ni lewe vuqa.