Aisea 9 - Vakavakadewa Makawa

Ni sa ka levu sara na butobuto, ena qai sucu mai na Karisito me rarama levu, 1-7. Era na cudruvi na Isireli e na vuku ni nodra viavialevu, 8-12, kei na nodra lotu vakailasu, 13-17, kei na nodra sega ni veivutuni, 18-21.

¹ Ia ena sega ni butobuto vua sa vakararawataki, me vaka sa beci eliu na vanua ko Sepuloni kei na vanua ko Nafitalai, ia ena vue na kena totoka e na gauna maimuri na yasayasa vakawaitui, na bati ni Joritani, ko Kalili ni veimatanitu.

² Ko ira na tamata ka lako e na butobuto, era sa raica na rarama levu; sa cadra cake na rarama vei ira era sa tiko e na vanua ni yaloyalo ni mate.

³ Ko ni sa vakalewevuqataka na matanitu, ko ni sa vakaikuritaka na nodra marau; era sa marau e matamuni me vaka na marau ni sa cava na yabaki, ka vaka na nodra marau era sa vota nai toki ni valu.

⁴ Ia na nonai savenaki bibi, kei nai vua ni domona, kei nai titoko i koya ka vakasaurarataki koya, ko ni sa musuka me vaka e na siga i Mitiani.

⁵ Ia na nodra i yaya kecega era sa vakaiyaragi tu ki nai valu kei na kaila ni valu, kei nai sulu sa lomoci e na dra, ena visa ga, me kena buka ni bukawaqa.

⁶ Ni sa sucu mai e dua na gone me noda, sa soli mai vei keda e dua na gonetagane: ena vakatau kivei koya na lewa; ena vakatokai na yacana ko Veivakurabuitaki, nai Vakavuvuli, na Kalou kaukauwa, na Tama ni gauna tawa mudu, na Tui ni Sautu.

⁷ Ena sega ni oti na kena tubu na nona lewa kei na sautu, e nai tikotiko vakaturaga i Tevita, kei na nona matanitu, me vakataudeitaka, ka vakaukauwataka e na lewa dodonu kei nai valavala dodonu mai na gauna oqo ka yacova na gauna kecega. A lomakatakata i Jiova ni lewe vuqa ena vakayacora na ka oqo.

⁸ Sa dua na nona vosa na Turaga kivei ira na Jekope, a sa tau kivei ira na Isireli.

⁹ Era na kila kina ko ira na tamata kecega, na Ifireimi kei na kai Samaria, era sa kaya e na nodra viavialevu kei na kaukauwa ni lomadra,

¹⁰ Sa lutu sobu na vatu-buli, ia e na vatu sa ta eda na qai tara tale kina: sa ta sobu na lolo, ia eda na qai vakaisosomitaka e na sitari.

¹¹ Ia ko Jiova ena qai vakalevulevui ira na meca i Risina me vala kei ira, ena vakauqeti ira talega na nodra meca me ra to vata kei ira.

¹² Ko ira na kai Siria mai na tu-i-cake, kei ira na kai Filisitia mai ra; ka ra na tilomi ira sara na Isireli. Ia ni sa caka na ka kece oqo sa sega ga ni mudu kina na nona cudru, ka sa dodo tikoga na ligana.

¹³ Ia ko ira na tamata era sa sega ni lesu kivei koya sa yaviti ira, a ra sa sega talega ni qaravi Jiova ni lewe vuqa:

¹⁴ Ena muduka tani kina ko Jiova maivei ira na Isireli na uludra kei na buidra, na ulu ni niu kei na taria, e na dua bauga na siga.

¹⁵ A qase kei koya na tamata sa rogo, sai koya na uludra; a parofita sa vakavulica na ka lasu, ko koya ga na buidra.

¹⁶ Io ko ira sa tuberi ira na tamata oqo, era sa vakacalai ira; ko ira era sa tuberi, era sa tilomi sara.

¹⁷ Ia na Turaga ena sega kina ni rekitaki ira na nodra cauravou, ena sega talega ni yalololoma vei ira na gone era luveniyali kei na nodra yada: ni ra sa dui veivakaisini kai valavala ca, a gusudra kece sa daucavuta ga na ka lialia. Ia ni sa caka kece oqo sa sega ga ni mudu kina na nona cudru, ka sa dodo tikoga na ligana.

¹⁸ Ni sa waqa na yaloca me vaka na bukawaqa; ena kania na kau vakavotona kei na soni; ena vakacaudreva na kau ni veikau, ka na kuvu cake me vaka na kubou.

¹⁹ Sa vakabutobutotaki na vanua e na cudru i Jiova, ia na tamata era na vaka na buka ni bukawaqa: ena sega e dua me yalololoma vua na tacina.

²⁰ Ena kaliraka mai nai matau e dua, ka na viakana ga; ena kana mai nai mawi, ka na sega ni mamau: era na dui kania na lewe ni ligana:

²¹ ena kani Ifireimi ko Manasa, kei Manasa ko Ifireimi: ka rau na to vata me cati Juta. Ia ni sa caka na ka kece oqo sa sega ni mudu kina na nona cudru, ka sa dodo tikoga na ligana.