Aisea 8 - Vakavakadewa Makawa

Sa tukuni ni na rawai Siria kei ira na Isireli ko Asiria, 1-4; ena rawai ira talega na Juta e na vuku ni nodra sega ni vakabauta, 5-8. Ena sega ni vakadaroi rawa na lewa ni Kalou, 9-16; ko ira era sa rerevaki koya era na vakacegui, 17,18; Ena vakararawataki ko ira sa vakararavi ki na kalou lasu, 19-22.

¹ A sa kaya vei au ko Jiova, Mo taura mada e dua na papa ni volavola levu, ka vola vakamacala kina E na vuku i Measalali-asi-pasi.

² Ia ka'u a kauta vata kei au e le rua na tamata dina me rau vakadinadinataka, ko Uraija na bete, kei Sakaraia na luve i Jeperekaia.

³ Ia ka'u a lako vua na parofita yalewa; ka sa kunekune ko koya, ka vakasucuma e dua na gonetagane. Sa qai kaya vei au ko Jiova, Mo vakayacani koya ko Measalali-asi-pasi.

⁴ Ka ni na sa sega ni vuku na gone me kaci, Tamaqu, kei Tinaqu, ena kau tani nai yau mai Tamasiko, kei nai toki ni valu mai Samaria kivei tui Asiria.

⁵ Sa baci vosa tale vei au ko Jiova, ka kaya,

⁶ Ni ra sa beca na wai ni Sailoa sa drodro malua ko ira na tamata oqo, ka ra marautaki Risina kei koya na luve i Rimalaia;

⁷ raica, na Turaga ena vakauta cake mai vei ira na wai ni Uciwai, sa kaukauwa ka levu, io na tui Asiria, kei na nona kaukauwa vakaturaga kece: ia na uciwai oqo ena tubu cake e na kena dreke-ni-wai kecega, ka vuabale e na batina kecega:

⁸ Ena dave yani ki Juta; ena luvuca voli; ena yala ki domodra; ia ni sa vakatetaba ko koya ena ubi kece sara kina na nomuni vanua, Imanueli.

⁹ Dou soqoni vata vakaivalu, na veimataqali, ia dou na vakataqayataki ga; dou rogoca, na lewe ni veivanua vakayawa: dou vauci kemudou, dou na vakataqayataki ga; dou vauci kemudou, ia dou na vakabalei sobu ga.

¹⁰ Dou bose vata mada, ena vukici ga; dou tukuna na vosa, ena sega ga ni yaco: ni sa tiko vata kei keimami na Kalou.

¹¹ Ni sa rawai au na kaukauwa i Jiova ka vosa vakaoqo vei au ko koya, ka vakasalataki au me'u kakua ni muria na nodra sala na tamata oqo, ka sa kaya,

¹² Dou kakua ni kaya sa dua na vere e na vuku ni ka kece era sa kaya kina na tamata oqo sa dua na vere; dou kakua talega ni rerevaka na ka era rerevaka, kakua talega ni kidroa kina.

¹³ Ia ko Jiova ni lewe vuqa, o koya ga mo dou doka; sai koya ga mo dou rerevaka, sai koya ga mo dou kidroa kina.

¹⁴ Ia sa na yaco ko koya me vale tabu; ka na yaco talega me vatu era na tarabe kina, kei na vatu era na bale kina na mataqali ruarua i Isireli; ka mei cori talega ka tudai kivei ira na kai Jerusalemi.

¹⁵ Ia ena tarabe kina na lewe vuqa, era na bale, ka ramusu, ka coriti, ka tauri.

¹⁶ Mo viviga nai vola ni tukutuku, dregata na vunau me nodra na noqu tisaipeli.

¹⁷ Ia ka'u na waraki Jiova, ko koya sa tabonaka na matana mai na mataqali i Jekope, ka'u na waraki koya tiko.

¹⁸ Raica, koi au kei ira na gone sa solia mai vei au ko Jiova, keitou sa solia mei vakatakilakila kei na ka e veivakurabuitaki vei ira na Isireli maivei Jiova ni lewe vuqa, ko koya sa tiko mai na ulu-ni-vanua ko Saioni.

¹⁹ Ia ni ra na kaya vei kemudou, Dou la'ki tarogi ira sa curumi, kei ira na rairai era sa tagi ka kudru: me ra kakua li ni tarogi koya na nodra Kalou ko ira na tamata? me ra lako li vei ira na mate e na vukudra na bula?

²⁰ Qara mada e na vunau kei nai tukutuku: kevaka era sa sega ni vosa me vaka na vosa oqo, sa ka ga ni sa sega dina vei ira na rarama.

²¹ A ra na lako voli yani, ka vakararawataki ka viakana: ia ena yaco, ni ra sa viakana, era na nuinuica tiko, ka vosacataki rau na nodra tui kei na nodra Kalou, a ra na rai ki cake.

²² A ra na rai talega ki vuravura; ka kunea na ka rarawa kei na butobuto, na butobuto kei na yaluma; ka ra na vakasavi tani ki na butobuto loaloa.