Aisea 7 - Vakavakadewa Makawa

Ni sa rerevaki Risina kei Peka ko Easi, 1-4, sa vakacegui koya ko Aisea, 4-9. Ni sa bese ni taroga ko Easi e dua nai vakatakilakila, sa qai yalataka vua na Mesaia mei vakatakilakila, 10-16. A sa tukuna ni na yaco mai na nona cudruvi ko Easi mai na vanua ko Asiria, 17-25.

¹ A sa yaco e na gauna i Easi, na luve i Jocame, na luve i Usaia, na tui Juta, ni rau sa qai lako cake ki Jerusalemi, ko Risina na tui Siria, kei Peka na luve i Rimalaia, na tui Isireli, me rau kaba, a rau sa sega ni rawata.

² A sa tukuni ki na mataqali i Tevita, ka vaka, Sa to vata ko Siria kei Ifireimi. Sa qai yavala na lomana, kei na lomadra na nona tamata, me vaka sa yavala na kau ni veikau ni sa liwa na cagi.

³ Sa qai kaya vei Aisea ko Jiova, Mo drau lako mada, ko iko kei Siari-yasupi na luvemu me tavaki Easi, ki na salisali ni drano maicake ka koto mai na salatu e na nodratou vanua na dausavai sulu,

⁴ ka kaya vua, Mo qarauni kemuni, ka mo ni vakacegu; ni kakua ni rere, se yalolailai e na vukudrau na bui ni kau oqo sa kubou tu, io e na vuku ni nodratou cudru waqawaqa ko Risina kei Siria, kei na luve i Rimalaia.

⁵ Ka ni ratou sa bosea na ka ca vei iko ko Siria, kei Ifireimi, kei koya na luve i Rimalaia, a ratou sa kaya,

⁶ Me datou lako cake ki Juta, ka vakararawataka, ia me datou basuka me noda, ka lesia kina e dua na tui, io na luve i Tapeli:

⁷ Sa vaka na Turaga ko Jiova, Ena sega ga ni rawa, se yaco:

⁸ ni sa ulu i Siria ga ko Tamasiko, ka sa ulu i Tamasiko ga ko Risina; ia ena sega ni oti na yabaki e onosagavulu ka lima, ena vakabalei sobu mada eliu ko Ifireimi, me kakua ni matanitu.

⁹ Ia na ulu i Ifireimi ga ko Samaria, kei na ulu i Samaria na luve i Rimalaia. Kevaka dou na sega ni vakadinata, dou na sega ni vakataudeitaki.

¹⁰ Sa vosa tale vei Easi ko Jiova, ka kaya,

¹¹ Mo kerea mada e dua nai vakadinadina vei iko maivei Jiova na nomu Kalou; mo kerea e dua mai na tikina titobu, se na tikina cecere sara.

¹² A sa kaya ko Easi, Au na sega ni kerea, ia ka'u na sega ni vakatovolei Jiova vakaca.

¹³ Ka sa kaya ko Aisea, Dou rogoca mada na mataqali i Tevita; A ka lailai beka na nomudou vakaocataki ira na tamata, mo dou sa vakaocataki koya talega na noqu Kalou?

¹⁴ Ia ko Jiova vakataki koya ga ena solia vei kemudou e dua nai vakadinadina; Raica, ena bukete e dua na goneyalewa, ena vakasucuna e dua na gonetagane, ena vakayacani koya ko Imanueli:

¹⁵ Na pata kei na oni ena kania ko koya, ni sa kila me biuta na ka ca, ka digitaka na ka vinaka:

¹⁶ Ia ni sa bera ni kila ko koya na gone me biuta na ka ca, ka digitaka na ka vinaka, ena lala mada na nodrau vanua na tui ruarua ko sa rerevaka.

¹⁷ Ena vakayacora vei kemuni ko Jiova vei ira talega na nomuni tamata, kei na mataqali i tamamuni, na gauna sa sega tale e vakakina, mai na siga sa lako tani kina mai Juta ko Ifireimi; io na tui Asiria.

¹⁸ Ia ena yaco e na siga ko ya, ena kalu ko Jiova ki na lago sa tiko mai na vu ni uciwai ni Ijipita, kei na pi mai na vanua ko Asiria:

¹⁹ Ia era lako mai, ena tiko kece e na veibuca e lala, kei na veiqara ni uluvatu, kei na kau vakavotona kecega, kei na veico kecega.

²⁰ E na siga ko ya ena tasia ko Jiova e nai tasi sa voli mai na tai kadua ni uciwai, io ko tui Asiria, na ulu, kei na vutika ni yavana; ia na kumina talega ena tasia laivi.

²¹ Ia ena yaco e na siga ko ya ena dua na tamata sa na vakania e dua na pulumokau yalewa ka rua na sipi;

²² ka na yaco, e na vuku ni kena levu ni wai-ni-sucu ena rawa kina ena kana pata ko koya: ni ra na kania na pata kei na oni ko ira kecega era vo tiko e na vanua.

²³ Ia ena yaco e na siga ko ya, na tikina kece sa tu kina na vaini e udolu sa dau kenai voli e dua na udolu na sikeli siliva, ena yaco ga me veikau vakavotona ka veisoni.

²⁴ Era na vakagasau ka vakadakai titi na tamata era lako yani kina; ni na veikau vakavotona ka veisoni na vanua taucoko.

²⁵ Ia na veiulu-ni-koro kecega sa dauwereci e nai sivi, sa dredre mo lako kina e na vuku ni kau vakavotona kei na soni e rerevaki; ena kedra yasana ga na pulumokau me ra lako tu kina, kei na vanua era na lako voli kina na manumanu lalai.