Aisea 65 - Vakavakadewa Makawa

Sa ra kacivi me ra lotu na lewe ni veivanua, ka sa biu laivi na matanitu vaka-Juta e na vuku ni nodra i valavala ca, 1-7. Sa na vakavo eso ni ra vakabauta, 8-10. Sa ca sara ko ira na vakatitiqa, sa vinaka sara ko ira na vakabauta, 11-16. A gauna ni Mesaia sa vaka ni sa buli na lomalagi vou kei na vuravura vou ena tubu mai kina na ka vinaka sara, 17-25.

¹ Sa qarai au mai ko ira era a sega ni tarogi au: sa kunei au ko ira era a sega ni vakasaqarai au: au a kaya, Koi au oqo, koi au oqo, ki na matanitu sa sega ni masuta na yacaqu.

² Au a dodoka na ligaqu e na veisiga ki na dua na mataqali dautalaidredre, era lakova na sala sa sega ni vinaka, ka muria na ka era dui nanuma;

³ na mataqali sa vakacudrui au ki mataqu e na veisiga; era vakacaboi soro e na veiwere, ka vakama nai madrali boi vinaka e na vatu buli:

⁴ era tiko ga e nai bulubulu, ka moce e na veiqara; era kana vuaka tiko, ia na waibuta ni ka sa vakasisila sa tu e na medra bilo;

⁵ a ra kaya, Mo tiko tani ko iko; kakua ni ko sudra mai vei au; ni'u sa yalosavasava cake vei kedaru. Ko ira oqo era sa kubou e na ucuqu, na buka sa waqa tu e na veisiga.

⁶ Raica, sa volai tu e mataqu; ka'u na sega ni cegu, ka'u na sauma io ka'u na sauma ki na lomaseredra

⁷ na nomudou caka cala, sa kaya ko Jiova, kei na nodra caka cala na tamamudou, era sa vakama nai madrali boi vinaka e na veiulu-ni-vanua, ka vosavakacacataki au e na veiulu-ni-koro: ia ka'u na sauma na nodra cakacaka eliu ki na lomaseredra.

⁸ Sa kaya vakaoqo ko Jiova; Me vaka sa kune na waini vou e nai soso vua ni vaini, ka sa kaya e dua, Mo kakua ni vakacataka, ni sa tu kina na ka ni veivakalougatataki; ka'u na kitaka vakakina e na vukudra na noqu tamata, me'u kakua ni vakacataki ira kecega:

⁹ Ia ka'u na kauta maivei Jekope e dua na kawa, ka maivei Juta e dua nai taukei ni noqu ulu-ni-vanua; ia ko ira ka'u sa digitaka era na taukena, ko ira talega na noqu tamata era na tiko maikina.

¹⁰ Ia ko Seroni ena yaco me bai ni sipi, kei na buca i Akori mei kotokoto ni qele ni pulumokau, me nodra na noqu tamata era sa qaravi au.

¹¹ Ia koi kemudou, sa biuti Jiova, ka guilecava na noqu ulu-ni-vanua tabu, ka tau kakana ki na tepeli vei Kata, ka tu yaqona nai sevu mei Meni,

¹² ka'u na lesi kemudou ki nai seleiwau, ia koi kemudou kece dou na cuva ga me vakamatei: ni dou sa sega ni rogo mai ni'u sa kaci; ni'u sa vosa yani, dou sa sega ni rogoca; ia dou a cakava na ka sa ca e mataqu: ka dou sa digitaka na ka ka'u sa sega ni vinakata.

¹³ O koya oqo sa kaya kina na Turaga ko Jiova, Raica, ko ira na noqu tamata era na kana, ia dou na viakana; raica, ko ira na noqu tamata era na gunu, ia dou na viagunu; raica, ko ira na noqu tamata era na reki, ia dou na madua;

¹⁴ raica, ko ira na noqu tamata era na sere ni sa marau na lomadra, ia dou na tagi ni sa rarawa na lomamudou; ia dou na qoqolou ni sa ramusu na yalomudou.

¹⁵ Ia na yacamudou sa na tiko ga me sa cavuti ni sa ia na veivatonaki vei ira ka'u sa digitaka, ia na Turaga ko Jiova ena vakamatei iko, ka vakayacani ira na nona tamata e na dua na yaca tani:

¹⁶ Ia ko koya sa vosavakalougatataki koya e vuravura me vosavakalougatataki koya e na yaca ga ni Kalou dina; ko koya talega sa bubului e vuravura me bubului e na yaca ga ni Kalou dina; ka ni sa guileca na ka rarawa eliu, ka ni sa tabonaki talega mai na mataqu.

¹⁷ Raica, ka'u sa bulia na lomalagi vou kei na vuravura vou; ia ena sega ni nanumi na ka eliu, ena sega ni curu tale ki na lomamudou.

¹⁸ Ia dou reki ka marau ka sega ni mudu e na ka ka'u sa cakava: raica, ka'u sa qisi Jerusalemi me ka ni marau, kei na nona tamata me ka ni reki.

¹⁹ Ia ka'u na marautaki Jerusalemi, ka rekitaki ira na noqu tamata; ena sega ni rogoci tale kina na tagi, se na qoqolou.

²⁰ Ena sega tale maikea e dua na gone sa bogi vica wale na nona bula, se dua na qase sa sega ni tamata qase sara: ia ko koya sa gone ni sa mate sa na dua na drau na nona yabaki; ia na tamata i valavala ca sa dua na drau na nona yabaki ena ka ni veivakarusai.

²¹ A ra na tara vale, ka tiko kina; era na tea eso na were-ni-vaini, ka kania na vuana;

²² era na sega ni tara, ka tiko kina na tamata tani, era na sega ni tea, ka kania na tamata tani: ia me vaka na kena dede e dua na kau ena vakakina na nodra gauna na noqu tamata, ia era na rekitaka vakadede na cakacaka ni ligadra ko ira na tamata ka'u sa digitaka.

²³ Era na sega ni oca walega, se vakasucu gone me ka ni rarawa vei ira; ni ra sa nodra kawa na tamata era sa vakalougatataki maivei Jiova, ko ira kei na luvedra talega.

²⁴ Ia ena yaco ni sa bera na nodra masu vei au, ka'u na rogo yani; ni ra sa vosa tiko, ka'u na rogoci ira.

²⁵ A wolifa kei na lami, erau na kana vata; ia na laioni, ena kania na lolo ni sila me vaka na pulumokau; ia na kuvu-ni-soso ena kena kakana na gata. Era na sega ni ia na veivakacacani se na veivakarusai e na noqu ulu-ni-vanua tabu kecega, sa kaya ko Jiova.