Aisea 64 - Vakavakadewa Makawa

Sa ia tiko na Mesaia na nona masulaki ira na nona lewe ni lotu, 1-12.

¹ Mo ni dresulaka mada na lomalagi, ka lako sobu mai, me yavala e matamuni na veiulu-ni-vanua,

² me vaka na bukawaqa sa tutuvaka na kau vuca, ka vaka na bukawaqa sa kere kina na wai, me vakarogoya kina na yacamuni vei ira na nomuni meca; me ra sautaninini e matamuni ko ira na veimatanitu:

³ Ni kemuni sa cakava kina na ka rerevaki keimami a sega ni nanuma kina ko ni a lako sobu mai, sa yavala e matamuni na veiulu-ni-vanua.

⁴ Ia mai nai vakatekivu era sa sega ni rogoca, sa sega ni rogo ki na daligadra, sa sega na matadra sa kunea e dua na Kalou, koi kemuni duaduaga, sa cakacaka e na vuku i koya sa waraki koya.

⁵ Ko ni sa mai tavaki koya na tamata sa marau ka cakava nai valavala dodonu, ko ira era sa vakananumi kemuni e na nomuni sala; Raica, ko ni sa cudru, ni keimami sai valavala ca; e na sala oqori sa tu na bula tawa mudu, ia keimami na vakabulai.

⁶ Ia keimami sa vaka na ka sa sega ni savasava koi keimami kecega; ka sa vaka nai sulu qeleqelewa na neimami valavala dodonu kecega; Keimami sa daumalai me vaka na drau ni kau kecega; ia na neimami caka cala sa vaka na cagi sa kauti keimami tani:

⁷ ka sa sega e dua sa masuta na yacamuni, se uqeti koya me tauri kemuni: ni kemuni sa tabonaka na matamuni maivei keimami, ka sa vakawaicalataki keimami e na neimami valavala ca.

⁸ Ia oqo, kemuni Jiova, ko ni sa tamai keimami; koi keimami na tete, ia koi kemuni na keimami dautuli kuro; ia koi keimami kecega na cakacaka ni ligamuni:

⁹ Mo ni kakua ni cudru vakalevu, Jiova, ia mo ni kakua ni nanuma ka tawa mudu na neimami caka cala: mo ni raica, ni kila mada, ni keimami sa nomuni tamata koi keimami kecega:

¹⁰ a nomuni veikoro tabu, sa lekutu; ko Saioni, sa veikau; ko Jerusalemi sa lala;

¹¹ a neimami vale tabu ka vakaiukuuku, sa ra dauia kina na vakavinavinaka vei kemuni ko ira na tamai keimami, sa kama e na bukawaqa; ia na neimami ka talei kecega sa vakarusai:

¹² Ko ni na vosota tiko, Jiova, ni sa yaco na ka kece oqo? ko ni na galu tiko beka, ka vakararawataki keimami vakalevu sara?