Aisea 63 - Vakavakadewa Makawa

Sa gumatua na Mesaia vei ira na nona meca, 1-6. Sa qai vakananuma na yalololoma ni Kalou vei ira na nona tamata eliu, kei na nodra dautalaidredre vua, 7-14. Sa qai ia na masu e na vukudra na kena vo era vakabauta tiko, 15-19.

¹ Ko cei oqo sa lako tiko mai Itomi? ka sa vakaisulu damudamu tu mai Posira? o koya sa vakaiukuuku na nonai sulu, ka sa lako tiko vakaturaga mai e na nona kaukauwa levu? Koi au ka vosa dodonu, ka kaukauwa me'u ia na veivakabulai.

² A cava sa damudamu kina na nomu i sulu, ka vakaevei na nomu i tutuvi, ni sa vaka na nona sa sikaraka nai keli-ni-waini?

³ Nai keli-ni-waini ka'u sa sikaraka vakataki au ga, ia vei ira na veimataqali sa sega e dua me keirau lewe rua kaya: ia ka'u na sikaraka ga e na noqu cudru, ka butuka e na noqu cudru katakata; ia na kedra dra sa kureitaki mai ki na noqu i sulu, na noqu i tutuvi talega ka'u a lomoca sara kina.

⁴ Ni'u sa nakita na siga ni veisausaumi, ia sa qai yaco na nodra yabaki na tamata, ka'u sa vakabula.

⁵ Ia ka'u a vakararai voli ka sa sega e dua nai vukevuke; ia ka'u a kurabui ni sa sega e dua sa tokona mai; sa qai ia na veivakabulai na ligaqu dina, e na vukuqu, ia sa tokoni au na noqu cudru katakata.

⁶ Ia ka'u sa butuki ira na veimataqali e na noqu cudru, ka'u sa vakamatenitaki ira e na noqu cudru katakata, ka'u sa vakadavea ki na qele na kedra dra.

⁷ Au na tukuna na yalololoma levu i Jiova, ka'u na vakacaucautaki Jiova, me vaka na ka kecega sa vakayacora vei keimami ko Jiova; kei na nona loloma levu sa vakayacora vei ira na mataqali i Isireli; me vaka na nona daulomani ira, ka vaka na kena levu ni nona yalololoma.

⁸ Ni sa kaya ko koya, E dina ga era sa noqu tamata, era sa luvequ era na sega ni lasu: ka sa yaco ko koya me nodra i Vakabula:

⁹ e na nodra rarawa kecega sa rarawa kina ko koya, ia na agilose sa tiko e matana sa dauvakabulai ira: ni ra sa yalololoma ko koya, ka daulomani ira, sa dauvakabulai ira kina ko koya: ka sa keveti ira, ka kauti ira e na veisiga kece eliu:

¹⁰ ia ko ira, era talaidredre ga, ka vakararawataka na nona Yalo Tabu; ka sa vuki kina ko koya me nodra meca; ka sa veivala kei ira ko koya.

¹¹ A ra sa qai nanuma na veisiga eliu, na gauna i Mosese kei ira na nona tamata, a ra kaya, Sa evei ko koya ka kauti ira cake mai na waitui, kei ira nai vakatawa ni nona sipi? sa evei ko koya ka solia ki na lomadra na nona Yalo Tabu?

¹² ka kauti ira e na liga i matau i Mosese, e na ligana vakaturaga; ka wasea na wai e matadra me rogo kina na yacana ka sega ni mudu?

¹³ Ka tuberi ira yani e na wasa titobu, me vaka na ose mai na veikau, me ra sega ni tavutu?

¹⁴ Me vaka na manumanu sa lako sobu ki na buca, sa vakacegui ira vakakina na Yalo i Jiova: sa vakakina na nomuni tuberi ira na nomuni tamata, mo ni cakava kina na yacamuni me vakacaucautaki.

¹⁵ Mo ni rai sobu mai lomalagi, ka vakaraica mai na nomuni tikotiko tabu sa vakaiukuuku: sa evei na nomuni lomakatakata, kei na nomuni kaukauwa? na yavavala ni lomamuni kei na nomuni yalololoma vei au, sa kinoci beka tu?

¹⁶ Koi kemuni na tamai keimami; ia ko Eparaama sa lecavi keimami, ka sa sega ni kilai keimami ko Isireli; sai kemuni Jiova, na tamai keimami, na neimami vakabula; sa mailiu sara na yacamuni:

¹⁷ A cava ko ni sa vakasesei keimami tani kina, Jiova, mai na nomuni sala, ka vakaukauwataka na yalo i keimami me kakua ni rerevaki kemuni? Mo ni lesu mai e na vukudra na nomuni tamata, na veimataqali era sa nomuni votavota:

¹⁸ Sa bogi vica ga sa ra taukena ko ira na nomuni tamata tabu; ia na neimami meca era sa buturaka sobu na nomuni vale tabu:

¹⁹ Keimami sa qai yaco me vakataki ira na tamata ko ni a sega ni daulewa vei ira mailiu, ko ira era sa sega ni vakayacani e na yacamuni.