Aisea 62 - Vakavakadewa Makawa

Na Mesaia, ena gumatuataka na nona cakacaka e na vukudra na lewe ni lotu, me ra vinaka sara kina, 1-5. Sa vakarota vei ira me ra makututaka na dauyadra kei na masu, me yaco na ka sa yalataki, 6-9; me ra tukuna voli talega nai rogorogo vinaka ki nai yalayala kei vuravura, 10-12.

¹ E na vuku i Saioni ka'u na sega ni tiko lo, e na vuku talega i Jerusalemi ka'u na sega ni vakacegu, ka me lako mada yani na nona veivakadonui me vaka na ka sa serau, kei na nona veivakabulai me vaka na cina sa caudre tiko.

² Ia na veimatanitu, era na raica na nomu veivakadonui; kei ira kecega na tui, na nomu lagilagi: ia ko na vakayacani e na yaca vou, o koya ena cavuta na gusu i Jiova.

³ Ia ko na yaco mei sala vakaiukuuku e na liga i Jiova, kei nai sala vakatui e na liga ni nomu Kalou.

⁴ Ko na sega ni vakatokai tale, ko koya sa Biu; ia na nomu vanua ena sega ni vakatokai tale, na vanua Lala; ia ko na vakatokai ga, ko koya sa Marautaki, kei na nomu vanua, ko koya sa Vakawati: ni sa marautaki iko ko Jiova: ia na nomu vanua ena vakawati.

⁵ Ni sa vaka e dua na cauravou sa rau veiwatini kei na gone yalewa, ena veiwatini vakakina kei iko ko ira na luvemu; ia me vaka sa marautaka na watina na tagane sa qai vakawati, ena marautaki iko vakakina na nomu Kalou.

⁶ Ko iko Jerusalemi, ka'u sa lesia nai vakatawa e dela ni nomu bai, ka ra na sega ni tiko lo e na siga se na bogi; koi kemudou sa dauvakananumi Jiova, dou kakua ni vakacegu,

⁷ kakua talega ni laivi koya me vakacegu, ka me vakataudeitaki Jerusalemi mada, ka qisia talega me vakacaucautaki e vuravura.

⁸ Sa bubului ko Jiova e na ligana i matau kei na ligana kaukauwa, Ka'u na sega sara ni solia tale na nomu sila me kedra na nomu meca, ia ko ira na kai tani era na sega sara ni gunuva na memu waini, o koya ko sa oca kina:

⁹ ko ira ga era sa kumuna era na kania, ka vakavinavinaka vei Jiova; kei ira era sa binia era na gunuva e na noqu lomanibai tabu.

¹⁰ Dou curu yani, dou curu yani e na veimatamata-ni-koro; caramaka na nodra sala na tamata; vakacerea, vakacerea na salatu; biuta tani na vatu; vakaduria na kuila vei ira na tamata.

¹¹ Raica, ko Jiova sa vakarogoya ki nai yalayala kei vuravura, ka vaka, Dou kaya vua na goneyalewa ni Saioni, Raica, sa lako mai na nomu i Vakabula; raica, na kenai sau ena solia sa tiko ga vua, kei na ka ni nona cakacaka sa tu e matana.

¹² A ra na vakatokai ira, Na mataqali yalosavasava, Ko ira sa vakabula ko Jiova: ia ko na vakatokai, Ko koya sa Domoni, na Koro sa sega ni biu.