Aisea 61 - Vakavakadewa Makawa

A nona cakacaka na Mesaia, 1-3. Era na lewe vuqa mai na nona lewe ni lotu, a ra na vakalougatataki, 4-9. Sa reki vakalevu ko koya e na vuku ni ka dina ka dodonu ena tubu cake mai e vuravura, 10,11.

¹ Sa tu vei au na Yalo ni Turaga ko Jiova, ni sa lumuti au ko Jiova, me'u vunautaka nai rogorogo vinaka vei ira era sa yalomalumalumu; sa talai au mai me'u vakabulai ira sa ramusu na yalodra; me'u vunautaka na veisereki vei ira na bobula, kei na veisereki vei ira era tiko e na vale ni veivesu;

² me'u vunautaka na yabaki vinaka i Jiova; kei na siga sa ia kina na veisausaumi na noda Kalou; me vakacegui ira kecega era sa tagi;

³ me solia vei ira era sa tagi e Saioni nai sala vakaiukuuku mei sosomi ni dravusa; kei na waiwai ni reki mei sosomi ni tagi; kei nai sulu ni vakavinavinaka mei sosomi ni lomabibi; ka ra na vakatokai na kau dauvuataka nai valavala dodonu, ka tea ko Jiova, me vakacaucautaki kina ko koya.

⁴ Ka ra na tara tale na veikoro sa rusa makawa; ka ra na vakaduria tale na ka sa vakacacani eliu; ka vakavouya na veikoro sa lala tu, na veiyasana ka ca e nai tabatamata e vuqa.

⁵ Ka ra na mai tiko na kai tani me ra vakania na nomudou qele ni sipi; ia na luvedra na vulagi era na cakava na nomudou were, ka samaka na nomudou veivaivaini.

⁶ Ia koi kemudou, dou na vakatokai na bete i Jiova, dou na vakayacani nai talatala ni noda Kalou: dou na kania na nodra i yau na veimatanitu, ia dou na taukena talega na nodra lagilagi.

⁷ Ena rua na nomudou i votavota, me kenai sosomi ni nomudou madua, ka ra na marautaka na nodra i votavota me kenai sosomi ni taqaya: ia e na nodra vanua dina era na taukena e rua nai votavota, ka na nodra kina na marau e sega ni mudu.

⁸ Ni sai au ko Jiova ka'u sa vinakata na lewa dodonu; ka'u sa cata na ka sa kau tani vaka tawa dodonu; ka'u na solia dina na nodra i voli, ia ka'u na cakava vata kei ira na veiyalayalati e sega ni mudu.

⁹ Ena qai kilai e na veimatanitu tani na nodra kawa, kei na luvedra e na kedra maliwa na veimataqali: Ko ira kece era raici ira era na kilai ira, ni sai ira na kawa sa vakalougatataka ko Jiova.

¹⁰ Au na rekitaki Jiova vakaidina; na yaloqu ena rekitaki koya na noqu Kalou; ni sa vakasulumi au e nai sulu ni bula: ka vakaitutuvitaki au e nai tutuvi ni yalododonu, me vaka na tagane sa qai vakawati sa vakaisalataki koya e nai sala vakabete, ka vaka na yalewa sa qai vakawati sa vakaiukuukutaki koya e na nona ka talei.

¹¹ Me vaka na qele sa tubura na kena buroro, ka vaka na were sa tubura na ka e tei kina; ena vakatubura vakakina ko koya na Turaga ko Jiova, nai valavala dodonu kei na vakavinavinaka, e na matadra na veimatanitu kecega.