Aisea 6 - Vakavakadewa Makawa

Sa raica ko Aisea nai ukuuku i Jiova, a sa rere ka veivutuni mai, ka sa qai vakaukauwataki koya na Kalou ki na nona cakacaka, 1-8. A nodra dautalaidredre, kei na nodra daucudruvi na Juta, 9-12. Ena bula ga na kedra vo, 13.

¹ E na yabaki sa mate kina ko Usaia na tui ka'u a raica na Turaga ni sa tiko e nai tikotiko vakaturaga, sa cecere ka toka sara ki cake, a sa robota na vale ni soro na nonai tini yara.

² Era sa tu e cake vua ko ira na serafimi: sa yaono na tabadratou; e rua sa tabonaka kina na matana, e rua sa tabonaka kina na yavana, ka rua sa vuka kina.

³ A ra sa veikaciyaki, ka kaya, E dodonu, e dodonu, e dodonu, ko Jiova ni lewe vuqa: sa sinai ko vuravura taucoko e na nona serau.

⁴ A sa yavala nai lago ni katuba e na domo i koya sa kaci, ka sa curuoso na vale e na kubou.

⁵ Au a qai kaya, Isa koi au! ni'u sa ca; ni'u sa tamata tebenigusu qeleqelewa, au sa tiko talega kei ira na tamata tebenigusu qeleqelewa: ni sa raica na Tui ko Jiova ni lewe vuqa na mataqu.

⁶ Sa qai vuka mai vei au e dua vei ira na serafimi, a sa taura e ligana na qilaiso sa waqa tu, sa kauta e nai saga-ni-buka mai nai cabocabo-ni-soro:

⁷ a sa tara kina na gusuqu, ka kaya, Raica, sa tau oqo ki na tebenigusumu; a sa takali na nomu caka cala, ka sa bokoci na nomu i valavala ca.

⁸ Au a qai rogoca na domo ni Turaga, ni sa kaya, Ko cei me'u tala, ia ko cei ena lako e na vuku i keitou? Au a qai kaya, Koi au oqo; mo ni talai au.

⁹ A sa kaya ko koya, Mo lako, ka kaya vei ira na tamata oqo, Dou na rogoca tiko, ka lecava ga; ia dou na raica tikoga, ka sega ga ni kunea.

¹⁰ Mo vakabibitaka na yalodra na tamata oqo, ka vakadidivarataka na daligadra, ka vakabobotaka na matadra; de ra rai e matadra, ka rogo e na daligadra, ka kila e na lomadra, ka saumaki mai, ka ra vakabulai.

¹¹ Au a qai kaya, Kemuni na Turaga, Me cava na kena dede? A sa kaya ko koya, Me lala mada na veikoro me sega na lewena, kei na veivale me sega na tamata e tiko kina, kei na vanua me lala didi,

¹² Ka me na kauti ira vakayawa tani na tamata ko Jiova, me sa levu na tikina e biu laivi e loma ni vanua.

¹³ Ia ke sa na vo tu kina na kenai katini, a ra na lesu mai, me vakarusai tale: me vaka na paini, kei na oki, ni sa tavakabalei no sa bula tu na vuna: sa na vakakina na kawa tabu e na vuna na kena bula tu.