Aisea 59 - Vakavakadewa Makawa

Era sa ca na Juta e na vukudra ga, 1-3. Sa ka levu na nodra i valavala ca, 4-8. O koya ga oqo era sa ca kina, 9-15. Ni sa sega e dua na dautataro, sa qai ia na Kalou na veivakabulai kei na veicudruvi, 15-19. A veiyalayalati sa ia kaya nai Vakabula, 20-21.

¹ Raica, sa sega ni lekaleka na liga i Jiova, me dredre kina ni ia na veivakabulai, ka sa sega ni bibi na daligana, me dredre kina ni rogoca:

² ia na nomudou caka cala ga sa tawasei kemudou tani mai vua na nomudou Kalou, ka sa nomudou i valavala ca sa tabonaka kina na matana maivei kemudou, me sega ni rogoca.

³ Ni sa dukadukali na ligamudou e na dra, kei nai qaqalo ni ligamudou e na caka cala; a tebenigusumudou sa vosa lasu; ka sa cavuta na ka ca na yamemudou.

⁴ Sa sega e dua e tagica na veilewai e na yalododonu, ka sa sega e dua sa vakadinadina e na yalodina: era sa vakararavi e nai lawaki, ka ra vosa lasu; era sa kunekunetaka na ca, ka ra vakasucuma na caka cala:

⁵ na yaloka ni gata daukata era sa saulaka, ka ra sa talia na viritalawalawa; ko koya sa kania na kedra yaloka ena mate, ia na ka sa butuvoroki sa saulaki mai me gata loa.

⁶ A nodra viritalawalawa ena sega ni yaco mei sulu, a ra na sega ni tutuvitaka na ka era sa cakava; a nodra cakacaka na cakacaka ca, ka sa tu ga e na ligadra nai valavala kaukauwa:

⁷ a yavadra sa ciciva na ka ca, ka ra sa kusarawa me ra vakadavea na dra sa sega ni cala; a nodra vakanananu na vakanananu ca; na rusa kei na rarawa sa tu e na nodra sala.

⁸ A sala ni veivakacegui era sa sega ni kila; ka sa sega na ka dodonu e na nodra i lakolako: era sa vakavevetaka na nodra sala; ko koya sa muria sa na lecava na veivakacegui.

⁹ O koya oqo sa yawa kina vei keda na veilewai, ka sa sega ni vauci keda na veivakadonui: eda sa vakanananu ki na rarama, ka raica, sa butobuto; ki na serau ni siga, ia eda sa lako tu e na butobuto loaloa.

¹⁰ Eda sa vakayayamo voli ki na bai me vakataki ira na mataboko, ka me vakataki ira sa sega na matadra eda sa vakayayamo ga: eda sa tarabe e na siga levu me vaka e na bogi; ka me vakataki ira na mate, e na bogi loaloa.

¹¹ Eda sa kudrukudru me vaka na pera koi keda kece, ka vaka na ruve eda sa tagi tiko: eda sa vakanananu ki na veilewai, ka sa sega; ki na veivakabulai, ka sa yawa vei keda.

¹² Ni sa levu cake e matamuni na neimami talaidredre, ia na neimami valavala ca sa tukuni keimami: ni sa tiko kei keimami na neimami talaidredre, ia na neimami caka cala, keimami sa kila ga:

¹³ keimami sa talaidredre ka lasu vei Jiova, ka sa lesu tani me vakanadakui koya na neimami Kalou; ka sa vosataka na veivakasaurarataki kei na vuki, ka sa vakananuma ka cavuta mai na vu ni yalo i keimami na vosa lasu:

¹⁴ ka sa vakasukai ki muri na lewa dodonu, ka sa tu vakayawa nai valavala dodonu; ni sa bale sobu na dina e na saqata ni koro, a sa sega ni curu rawa na ka dodonu:

¹⁵ ia sa yali na dina, ia ko koya sa lako tani mai na ca sa qai koveraki. Ka sa raica ko Jiova, ka sa ca vua, ni sa sega na lewa dodonu.

¹⁶ A sa raica ko koya ni sa sega e dua na tamata, ka sa kurabui sara ni sa sega e dua na dauveisorovi; sa qai vakayacora vua na veivakabulai e na ligana dina; ia na nona yalododonu, sa tokoni koya:

¹⁷ ka sa sulumaka ko koya nai valavala dodonu me vaka nai sasabai, a sa vakaisala e nai sala ni veivakabulai; ka sa vakaisulutaki koya e nai sulu ni veisausaumi, ka sa tutuvitaki koya e na lomakatakata.

¹⁸ Me vaka na nodra cakacaka, ena sauma vakakina ko koya; na cudru vei ira na nona meca, nai sau dodonu vei ira sa cati koya; ki na veiyanuyanu ena ia na veisausaumi.

¹⁹ Ko ira mai ra era na rerevaka na yaca i Jiova, kei ira mai nai cadracadra ni mata-ni-siga na nonai ukuuku: ni sa lako vakawaluvu mai na meca, ena vakaduria na Yalo i Jiova na kuila me tarovi koya.

²⁰ Ia ena lako mai ki Saioni nai Vakabula, io vei ira na Jekope era sa saumaki mai na talaidredre, sa kaya ko Jiova.

²¹ Ia koi au, sa vakaoqo na noqu veiyalayalati kei ira, sa kaya ko Jiova; Na Yaloqu, o koya sa tu vei iko, kei na noqu vosa ka'u sa tauca ki na gusumu, ena sega ni lako tani e na gusumu, se na gusudra na nomu kawa, se na gusudra na kawa ni nomu kawa, mai na gauna oqo ka sega ni mudu, sa kaya ko Jiova.