Aisea 58 - Vakavakadewa Makawa

Sa ra vakalaivi na Juta ni ra sega ni lotu dina, 1-7. Ke ra sa lotu dina, ke ra sa vinaka tikoga, 8,9. Era sa vunauci me ra veivutuni, me ra vinaka kina, 9-14.

¹ Mo kaci vakadomoilevu, kakua ni vakacegu, tabalaka na domomu me vaka na davui, ka vakatakila vei ira na noqu tamata na nodra talaidredre, ia ki na mataqali i Jekope na nodra i valavala ca.

² Ia era sa vakasaqarai au tiko e na veisiga; era sa reki ni ra kila na noqu sala, me vaka na matanitu sa daucaka dodonu, ka sa sega ni biuta na lewa ni nodra Kalou; era sa tarogi au e na vuku ni veilewai dodonu, era sa marau me ra torovi koya na Kalou.

³ Era kaya, A cava keimami sa lolo kina, ka ko ni sa sega ni raica? ka vakararawataki keimami kina, ka ko ni sa sega ni kila? Raica, e na nomudou siga ni lolo dou sa goleva na marau, ia dou sa vakasaurarataka na nomudou tamata cakacaka kecega.

⁴ Raica, dou sa lolo ka sa tubu kina na veileti kei na veicudruvi, ka me veivacu kina e na ligai valavala ca: dou na sega ni lolo me vaka e na siga edaidai, me rogo kina ki cake na domomudou.

⁵ Me vaka li oqo na lolo ka'u sa vinakata, na siga me vakamalumalumutaki koya kina na tamata? me sa vakacuva li na uluna me vaka na kuta, ka tevuka nai sulu taga kei na dravusa me nonai davodavo? ko na vakatoka li na ka oqo na lolo, na siga sa vinakata ko Jiova?

⁶ Sa sega li ni vakaoqo na lolo ka'u sa vinakata? mo dou sereka nai vesu sa sega ni dodonu, ka luvata nai kaukau bibi, ka sereki ira na bobula me ra lalaga, ka mo dou musuka kece talega nai vua?

⁷ Sa vaka ne, se segai, me soli madrai vua sa viakana? ia ko ira sa rarawa ka luveniyali mo kauta ga ki na nomu vale; ni ko sa kunea e dua sa luvawale, mo vakasulumi koya, ia mo kakua ni vunitaki iko mai vua na wekamu dina?

⁸ Ena qai kida mai na nomu rarama me vaka na mataka; ka na tubu vakasauri mai na nomu bula vinaka: ena qai liutaki iko na nomu cakacaka dodonu, ia nai ukuuku i Jiova ena kemui murimuri:

⁹ ko na qai masu, ka na rogoci iko ko Jiova; ko na qai tagi, ka na kaya mai ko Jiova, Koi au oqo! Kevaka ko biuta tani e na kemudou maliwa nai vua, na dusi qaqalo, kei na vosa ca;

¹⁰ ia kevaka ko daulomasoli vua sa viakana, ka sa vakamamautaka na yalo i koya sa rarawa; ena qai cadra na nomu rarama e na butobuto, kei na nomu bogi loaloa me vaka na siga levu:

¹¹ ia ko Jiova ena tuberi iko tikoga, ka vakamamautaka na yalomu e na dausiga; ka vakaukauwataka na suimu; ia ko na vaka na were sa vakasuasuataki, ka vaka nai vurevure sa sega ni yali na kena wai.

¹² Ia ko ira na nomu era na tara tale na veikoro sa lala makawa; ko na tauyavutaka tale na yavu ni tabatamata eliu sara; ia ko na vakatokai, O koya ka vakavinakataka na tikina sa kabasu, O koya ka vakavinakata tale, na sala me tawa na vanua.

¹³ Kevaka ko na tarova na yavamu e na siga tabu, mo kakua ni cakava na ka ko sa vinakata ga e na noqu siga tabu; ka sa vakatoka na siga tabu me ka e rekitaki, na siga tabu sa nei Jiova na siga me dokai; ka dokai koya, ka sega ni cakava kina na nomu cakacaka, se muria kina na ka ko sa vinakata, se vosa wale kina;

¹⁴ ko na qai rekitaki Jiova; ia ka'u na kauti iko mo lako voli e na veiyasana cecere kei vuravura, ka vakani iko e nai votavota i Jekope na tamamu: ni sa cavuta na ka oqo na gusu i Jiova.