Aisea 57 - Vakavakadewa Makawa

Era sa mate na yalododonu, me ra vakacegu kina, 1,2. Sa ka vakasisila na nodra i valavala era sa qarava na kalou lasu, era na cudruvi ga, 3-13. Ko ira era sa veivutuni dina era na vakabulai, 14-21.

¹ Sa yali na tamata yalododonu, ka sa sega e dua sa vakasara ki lomana; ia na tamata yalololoma era sa kau tani, ka sa sega e dua sa vakananuma ni sa kau tani kina na yalododonu mai na ca sa bera mai.

² Ena curu ki nai vakavakacegu ko koya; era na vakacegu no e na nodra i kotokoto, ko ira yadua era sa lako vakadodonu.

³ Ia koi kemudou, dou toro mai ki ke, na luvena na yalewa daucakai sausau, na kawa ni dauyalewa kei na dautagane.

⁴ Vei cei dou sa ia kina na veivakalialiai? Vei cei dou sa vakabegusu, ka dara yame kina? dou sa sega li ni luve ni dautalaidredre, na kawa daulasu?

⁵ Koi kemudou dou sa vagaganotaki kemudou kei na matakau e ruku ni kau bulabula kecega, ka sa vakamatei ira na gone e na vanua qiqilo e ruku ni uluvatu.

⁶ E na vatu yagoyagovinaka ni wai drodro ko sa votai kina; sai koya, sai koya ga, ka nomu i votavota: ia ki na ka ko ya ko sa sova kina nai sevu, ka vakacabora nai madrali. Me'u sega li ni cudru e na ka oqo?

⁷ E dela ni ulu-ni-vanua cecere ka rewa-i-cake ko sa cakava na nomu i mocemoce, io ko sa cabe kina mo vakacaboi soro;

⁸ ia mai daku ni sogo kei na duru ni katuba ko sa vakaduria kina na nomu i vakananumi; ni ko sa biuti au ka la'ki vakaraitaki iko vua e dua tani, ka sa cabe cake kina; ko sa vakalevutaka na nomu i mocemoce, ka ia na veiyalayalati kei ira; ko sa vinakata na nodra i mocemoce, e na vanua ko sa raica kina.

⁹ Ia ko a lako vua na tui ni ko sa lumuti tu, ka sa vakalevutaka na nomu i lumu; ka sa talai ira na nomu i talaki ki na vanua vakayawa, ka sa vakasisilataki iko sobu ki etesi.

¹⁰ Ko sa oca e na nomu daulako, ia ko sa sega ni kaya, Au sa oca walega: ko sa qai kunea na kaukauwa ni ligamu; o koya oqo ko sa sega kina ni yalolailai.

¹¹ Ko cei ko a domobula kina, ka rerevaka, mo lasu kina? ia ka sa sega ni nanumi au, ko sa sega talega ni vakasara ki lomamu. Ni'u a galu ga, io mailiu sara, sai koya ga ko sa sega ni rerevaki au kina, ne?

¹² Au na vakatakila na nomu yalododonu, kei na nomu cakacaka, ia na ka oqori ena sega ni yaga vei iko.

¹³ Ni ko sa tagi, me ra qai vakabulai iko ko ira ko sa vakasoqona vata: ena kauti ira kece tani ga na cagi: ia na mudremudre ena kauti ira tani: ia ko koya sa vakararavi vei au ena rawata na vanua, ka na taukena na noqu ulu-ni-vanua tabu.

¹⁴ Ena qai kaya ko Koya, Dou vakacerea, dou vakacerea, caramaka na sala; kauta tani mai na nodra sala na noqu tamata na ka era tarabe kina.

¹⁵ Ni sa kaya vakaoqo ko Koya sa cecere ka levu, ka sa tikotiko ga e na gauna tawa mudu, na yacana ko Koya ka Yalosavasava; Au sa tiko e na tikina cecere ka tabu, kei koya talega sa ramusu ka malumalumu na yalona, me vakabula na yalo i koya sa yalomalumalumu, ka vakabula na lomadra sa bibivoro.

¹⁶ Ni'u na sega ni veileti ka tawa mudu, ka'u na sega talega ni cudru tikoga: ni na qai ceguoca ga e mataqu na yalo, kei na yalo ni tamata ka'u sa bulia.

¹⁷ E na vuku ni nona ca ni sa daukocokoco ka'u sa cudru, ka'u sa yaviti koya kina; ka'u sa vunitaki au, ka'u sa cudru ga; ka sa vuki tani tiko ko koya ki na sala sa yalona kina.

¹⁸ A nonai valavala ka'u a raica, ia ka'u na vakabulai koya; ka'u na tuberi koya, ka vakasuka tale vua na vakacegu, vei ira talega na kai nona era sa tagi:

¹⁹ Ka'u sa vakatubura na vua ni tebenigusu; na veivinakati tale, na veivinakati tale kei koya sa yawa, kei koya talega sa voleka, sa kaya ko Jiova; ia ka'u sa vakabulai koya ga.

²⁰ Ia ko ira na tamata ca era sa vaka na wasawasa seuseua, ni sa sega ni cegu rawa; na kena wai sa uana tiko mai na qele kei na lolobo:

²¹ sa sega na vakacegu, sa kaya na noqu Kalou, vei ira na tamata i valavala ca.