Aisea 56 - Vakavakadewa Makawa

Ena vakavotui sara na lewa dodonu i Jiova, o koya me ra yalodina kina na nona tamata, 1,2, Ena sega ni vinakati se cati loa e dua na tamata, era na vinakati kece era lotu dina, 3-8. Ko ira na tamata lotu vakailasu era na cudruvi ga, 9-12.

¹ Sa kaya vakaoqo ko Jiova, Dou vakabauta na lewa, ka cakava nai valavala dodonu: ia sa voleka ni yaco na veivakabulai ka'u na cakava; kei na noqu lewa dodonu sa voleka ni vakatakilai.

² Sa kalougata na tamata ena cakava oqo; kei na luve ni tamata sa na taura matua, ni sa vakatabuya na siga tabu, me kakua ni vakacacana; ni sa tarova talega na ligana, me kakua ni cakava e dua na ka ca.

³ Ia na kai tani sa torovi Jiova, me kakua ni vosa ko koya, ka kaya, Ena tawasei au tani sara ko Jiova maivei ira na nona tamata: me kakua talega ni kaya ko ira na matanivanua, Raica, koi au ka'u sa kau madu.

⁴ Ni sa kaya vakaoqo ko Jiova vei ira na matanivanua era sa vakatabuya na noqu siga tabu, ka digitaka na ka ka'u sa rekitaka, ka taura matua na noqu veiyalayalati;

⁵ ka'u na solia me nodra e na noqu vale kei na noqu lomanibai na tikina kei na yaca e vinaka ka ca me so na luvedra tagane kei na luvedra yalewa; ka'u na solia vei ira na yaca rogo ka sega ni mudu, ena sega ni takali.

⁶ Ia ko ira na kai tani era sa torovi Jiova, me ra qaravi koya, ka lomana na yaca i Jiova, me ra nona tamata, ka ra dui vakatabuya na siga tabu, me kakua ni vakacacana, ka ra taura matua na noqu veiyalayalati:

⁷ ka'u na kauti ira mai ki na noqu ulu-ni-vanua tabu, ka vakamarautaki ira e na noqu vale ni masu; a nodra i soro kama kei na nodra i madrali ena vakadonui e na noqu i cabocabo-ni-soro; ni na vakatokai na noqu vale me nodra vale ni masu na tamata kecega.

⁸ Sa kaya na Turaga ko Jiova, ko koya sa vakasoqoni ira vata mai na Isireli era vakasevi, Ka'u na ia tale me'u vakasoqoni ira na tani vei koya, me kedrai kuri era sa vakasoqoni rawa mai.

⁹ Koi kemudou kece na manumanu ni vanua, dou mai kana, io koi kemudou kece na manumanu ni veikau.

¹⁰ Ko ira na nodra i vakatawa era sa mataboko kecega, era sa sega ni vuku; ko ira kecega era sa koli galu, era sa sega ni osooso rawa; era tadra, era koto, era vinakata na moce.

¹¹ Ia na koli oqo era sa daukana, era sa sega ni mamau rawa; ia ko ira sai vakatawa era sega ni vuku rawa; ko ira kece era sa dui gole ga ki na nona sala, na tamata yadua ki na nonai yau, era sa vakakina ko ira kecega.

¹² Era sa kaya, Tou ia, ka'u na la'ki kauta mai na waini; ia me tou gunuva vakalevu sara na yaqona; ena vaka na siga edaidai na siga e na mataka, ia ena vinaka vakalevu cake sara ga.