Aisea 55 - Vakavakadewa Makawa

Sa tukuna ko Aisea na ka vinaka vakayalo sa vakarautaka ko Jiova me nodra na tamata kecega era vakabauti koya na Mesaia, 1-5. Sa vunautaka na veivutuni kei na vakabauta, me rawa kina na bula; ka sa vakatakila ni na tubu e na loma ni tamata na ka dina, e na vosa ni Kalou, kei na cakacaka ni Yalo Tabu, 6-13.

¹ Oi kemudou vakaaduaga sa viagunu, dou lako mai ki na wai; io ko koya sa sega vua nai lavo, dou lako mai, mai volia na kemudou, ka kania; io dou lako mai, mai volia, ka segai e nai lavo se nai voli, na waini kei na wai-ni-sucu.

² A cava dou sa volitaka kina na nomudou i lavo e na ka sa sega ni kakana; kei na nomudou cakacaka e na ka dou sa sega ni mamau kina? dou vakarorogo sara vei au, ka kania na ka sa yaga, ia na yalomudou ena qai marautaka na ka sa uro.

³ Dou vakatu daligamudou, ka lako mai vei au; dou rogoca, ena qai bula na yalomudou; ka'u na ia kei kemudou na veiyalayalati e sega ni mudu, io na ka vinaka sa yalataki dina vei Tevita.

⁴ Raica, ka'u sa soli koya me nodra dautukutuku na veimataqali, me nodra turaga ka vu-ni-vunau na veimataqali.

⁵ Raica, ko na kaciva na matanitu ko a sega ni kila, kei na matanitu sa sega ni kilai iko, ena cici mai vei iko, e na vuku i Jiova na nomu Kalou; e na vuku i Koya talega na Yalosavasava ni Isireli, ni sa dokai iko ko koya.

⁶ Dou vakasaqarai Jiova ni sa kune rawa; dou masuti koya ni sa voleka tiko:

⁷ me biuta mada na nonai tovo na tamata ca, kei na nona vakanananu na tamata daucaka cala; ka me lesu mai ko koya vei Jiova, ena yalololoma vua, io vei koya na noda Kalou, ni na gugumatua ni lomana:

⁸ ni sa dua tani na noqu vakanananu ka dua tani na nomudou vakanananu, ka sa dua tani na noqu i valavala ka dua tani na nomudou i valavala, sa kaya ko Jiova.

⁹ Me vaka na kena cecere cake na lomalagi ki vuravura, sa cecere cake vakakina na noqu i valavala ki na nomudou i valavala, kei na noqu vakanananu ki na nomudou vakanananu.

¹⁰ Ka me vaka sa tau sobu na uca, kei na uca-vulavula mai lomalagi, ka sa sega ni lesu tale yani kina, ia sa vakasuasuataka mada ga na qele, ka vakabulabulataka ka me kubu, me vuataka kina na sila vua sa kaburaka, kei na madrai vua sa kania:

¹¹ ena vaka talega kina na noqu vosa ka'u sa vosataka yani; ena sega ni lesu tale wale vei au, ena vakayacora mada ga na ka ka'u sa vinakata, ka daucaka yaco e na ka ka'u a tala kina.

¹² Ni dou na marau, ni dou sa lako yani; ka vakacegu, ni dou sa tuberi yani; na veiulu-ni-vanua kei na veiulu-ni-koro ena lagata na sere e matamudou, ia na kau kecega ni vanua ena ia na cobo.

¹³ Ena tubu mai na damanu me kenai sosomi ni soni, ka na tubu mai na mateli me kenai sosomi ni salato, ia na ka oqo ena rogo kina na yaca i Jiova, ka na kenai vakananumi e sega ni mudu ena sega ni takali rawa.