Aisea 54 - Vakavakadewa Makawa

Ni ra sa qai lotu mai na lewe ni veimatanitu ena lewe vuqa kina na lewe ni lotu, 1-10. Ni sa takali nai valavala ni lotu makawa, ena qai vinaka sara na lotu e na gauna ni Mesaia, 11-17.

¹ Mo ia na sere, ko iko na yava, sa sega ni vakasucu; lagata mada na sere, ka ia na kaila, ko iko sa sega ni taratara: ni ra sa lewe vuqa na luve i koya sa biu, ka lewe lailai na luve i koya sa vakawati, sa kaya ko Jiova.

² Vakalevutaka na tikina sa tu kina na nomu vale laca, ia na kenai lati ni nomu i tikotiko me dre ga yani; kakua ni ko maninitaka; vakabalavutaka na nomu dali, ka vakadeitaka na nomu i vako;

³ ni ko na tete yani vaka ki nai matau kei nai mawi: ia na nomu kawa ena taukena na veimatanitu tani, ka vakatawa na veikoro ka rusa tu.

⁴ Mo kakua ni rere, ni ko na sega ni madua; ia mo kakua ni taqaya, ni ko na sega ni vakamaduataki: ni ko na guilecava na ka ni nomu veivakamaduataki ni ko a goneyalewa, ia na ka ko rogo ca kina ni ko sa yada ko na sega ni nanuma tale.

⁵ Ni sa watimu ko koya ka Buli iko, ko Jiova ni lewe vuqa na yacana; sai koya na nomu i Vakabula na Yalosavasava ni Isireli; ena vakatokai ko koya na Kalou ni vuravura taucoko.

⁶ Ko sa vaka na yalewa biu ka rarawa na lomana ni sa kacivi iko ko Jiova, ka vaka na watina e dua sa cauravou, ni sa biu ga, sa kaya na nomu Kalou.

⁷ Sa vakalekaleka wale na noqu biuti iko; ia e na loloma levu ka'u na vakasoqoni iko.

⁸ E na noqu cudru, ka'u a tabonaka mada vakalailai na mataqu maivei iko; ia e na loloma sa sega ni mudu ka'u na lomani iko kina, sa kaya na nomu i Vakabula ko Jiova.

⁹ Ni sa vaka na waluvu e na gauna i Noa na ka oqo vei au: ka'u a bubului me kakua ni luvuci vuravura tale na waluvu i Noa; ka'u sa bubului vakakina me'u kakua ni cudruvi iko, se vunauci iko.

¹⁰ Ni na takali na veiulu-ni-vanua, ka yavavala na veiulu-ni-koro; ia na noqu yalololoma ena sega ni takali vei iko, ka na sega talega ni yavavala na noqu veiyalayalati ni sautu, sa kaya ko Jiova, ko koya sa lomani iko.

¹¹ Ko iko na daurarawa, na daucagina e na cava, ka sega ni vakalecataki, raica, ka'u na viritoka na nomu veivatu e na dregai qumu, ka tauyavutaki iko e na safaia:

¹² ka'u na cakava na nomu bai ni valu e na rupi, kei na nomu matamata-ni-koro e na kapuquli, kei na nomu i yalayala e na vatu daudomoni.

¹³ A luvemu kecega e na vakavulici ira ko Jiova, ena ka levu talega na nodra vakacegu na luvemu.

¹⁴ Ni sa tu mai na ka dodonu ko na vakataudeitaki kina; ena yawa ga vei iko na veivakararawataki, ni na sega na ka mo rerevaka; kei na taqaya, ni na sega ni torovi iko.

¹⁵ Raica, era na soqoni dina mai, ia ena sega ni vu vei au: ko koya ena soqoni vakaivalu mai vei iko, ena vuki ga vei iko ko koya.

¹⁶ Raica, koi au ka'u a bulia na matai sa iriva na qilaiso waqa, ka sa cakava mai nai yaragi e na nona cakacaka; koi au talega ka'u a buli koya na dauvakacaca me ia na veivakacacani:

¹⁷ nai yaragi kecega sa caka me kemu ena sega ga ni yaco; kei na yame kecega ena mai veilewai kei iko ko na vakacala ga. Oqo na nodra i votavota na tamata i Jiova, kei na nodra veivakadonui maivei au, sa kaya ko Jiova.