Aisea 53 - Vakavakadewa Makawa

Ni sa lako mai na Mesaia ena sega ni vakabauti, ni sa lako vakamalumalumu mai, 1-3. Sa vakararawataki e na vukuda, ka segai e na vukuna, 4-9. Ni sa oti na gauna ni nona rarawa, ena qai yaco na gauna ena vakarokorokotaki kina, ni sa sorovaki keda na tamata, 10-12.

¹ Ko cei sa vakabauta na neitou i tukutuku? ia sa vakatakilai vei cei na liga i Jiova?

² Ni sa tubu cake ko koya me vaka na coke e matana, ka vaka na waka ni kau mai na qele mamaca: sa sega ni vinaka na matana ka sa sega ni vatukai vinaka na yagona; ia ni da sa raici koya, sa sega ni matavinaka ko koya me da qoroi koya kina.

³ Sa beci koya ka biuta ko ira na tamata, sa tamata e daurarawa na lomana, ka sa daukila ka rarawa: ka sa vaka e dua eda sa tabonaka na matada maivei koya; sa beci, ka da a sega ni dokai koya.

⁴ E dina sa colata ko koya na noda rarawa, ka sa colata na rarawa ni lomada: ia eda a vakalewa vua ni sa yaviti ka cudruvi mai vua na Kalou, ka vakararawataki:

⁵ sa vakamavoataki ko koya e na vuku ni noda talaidredre, ka sa qaqi e na vuku ni noda caka cala: sa tau vua na cudruvi sa vu ni noda veivinakati tale; ia e na we ni kena kuita eda sa vakabulai kina.

⁶ Koi keda kece eda sa sese ga me vaka na sipi; eda sa dui lesu tani ki na noda sala koi keda yadua; ia ko Jiova sa vakatauca vei koya na noda caka cala kecega.

⁷ Sa vakasaurarataki, ka sa vakamalumalumu ga ko koya, ia sa sega ni vosa mai ko koya; me vaka na lami sa tuberi me vakamatei, ka vaka na sipi sa galu e na mata i koya sa kotiva, sa galu vakakina ko koya.

⁸ Na veivakararawataki kei na veilewai sa kau tani kina ko koya; ia ko cei vei ira na nonai tabatamata me ra vakananuma kina? Ni sa muduki tani ko koya mai na vanua ni bula: ka sa yaviti e na vuku ni nodra talaidredre na noqu tamata.

⁹ A ratou sa buluti koya vata kei ira na tamata ca, kei ira na vutuniyau ni sa mate dina ko koya; ka sega ga e na vuku ni sai valavala vakaukauwa, ka sa sega na veivakaisini e na gusuna.

¹⁰ Ia sa vinakata ko Jiova me qaqi koya, ka sa vakararawataka ko koya; ni sa cakava na yalona mei soro e na vuku ni valavala ca, ena qai kunea na nona kawa, ena vakadedetaka na nona gauna, ia na ka e vinakata ko Jiova ena vakayacora ga ko koya.

¹¹ Ena kunea ko koya na vua ni veivakaocataki ni yalona ka na vakacegui ga: ni ra sa kilai koya na noqu i talatala yalododonu, ena vakadonui ira kina na lewe vuqa ko koya; ni na colata ko koya na nodra caka cala.

¹² O koya oqo ka'u na votai koya kina kei ira na lewe vuqa, ia ena votai koya vata kei ira na qaqa e nai toki ni valu; ka ni sa solia oti na nona bula ki na mate: ka sa wili vata kei ira na dautalaidredre; ka sa colata ko koya na nodra i valavala ca na lewe vuqa, ia e na vukudra na dautalaidredre sa ia na veimasulaki.