Aisea 51 - Vakavakadewa Makawa

Me vaka ni ra tubu me lewe vuqa mai na lewe ni lotu e na gauna eliu, era na tubu tale me vaka talega kina e na gauna ni Mesaia, 1-3. Era na lotu e lewe vuqa vei ira na lewe ni veivanua, 4-6. Ko ira era ia na veivakacacani era na cudruvi, me vaka ka cudruvi ko Ijipita, ni sa dauvakabulai ira na nona tamata ko Jiova, 7-23.

¹ Dou rogoci au, koi kemudou sa muria na yalododonu, ka sa qaravi Jiova: dou vakaraica na vatu dou a ta maikina, kei na qara ni keli dou a keli maikina.

² Dou vakaraici Eparaama na tamamudou, kei Sera ka vakasucumi kemudou: sa lewe dua ga ni'u a kacivi koya, ka'u a vakalougatataki koya ka vakalewevuqataki koya.

³ Ni na vakacegui Saioni ko Jiova; ena vakaceguya na nona veiyasana lala; ena cakava na nona talasiga me tautauvata kei Iteni, kei na nona veikau me tautauvata kei na were i Jiova: ena kune mai kina na reki kei na marau, na vakavinavinaka kei na domo ni sere.

⁴ Dou vakarorogo vei au, na noqu tamata; ka vakatu daligamudou vei au, na noqu matanitu: ni na lako yani maivei au na vunau, ia na noqu lewa ka'u na vakataudeitaka me nodra rarama na veimataqali.

⁵ Sa voleka na noqu lewa dodonu, sa lako yani na veivakabulai ka'u sa cakava, ia na ligaqu ena lewai ira na veimataqali; era na waraki au na veiyanuyanu, ka ra na vakararavi ki na ligaqu.

⁶ Ta cake mada ki lomalagi, ka vakaraici vuravura ki ra; ni na seavu yani na lomalagi me vaka na kubou, ka madra mai na vuravura me vaka nai sulu, ka ra na mate vakakina na lewena: ia na bula sa maivei au ena sega ni mudu, kei na noqu yalododonu ena sega ni takali.

⁷ Dou vakarorogo vei au, koi kemudou sa kila na yalododonu, na tamata sa tiko e lomamudou na noqu vunau; kakua ni dou rerevaka na nodra vosa ca na tamata, ia ni ra ia na veivakalialiai, kakua ni dou yalolailai kina.

⁸ Ena kani ira na sarasara, me vaka era kania nai sulu, Ka na kani ira na yavato me vaka era kania na vutika ni sipi; ia na noqu yalododonu ena sega ni mudu kei na bula sa maivei au ena ia tikoga e na veitabatamata kecega.

⁹ Mo ni yadra, mo ni yadra, mo ni vakaisulu e na kaukauwa, koi kemuni na liga i Jiova; mo ni yadra, me vaka e na gauna eliu, e nai tabatamata makawa. Sai kemuni, se segai, ka tamusuki Rakapi, ka vuetaka na gata levu?

¹⁰ Sai kemuni, se segai, ka vakadiva na wasawasa, na wai ni wasa levu? ka cakava na dreke ni wai titobu me nodra sala me lako yani kina ko ira era vakabulai?

¹¹ Ia ko ira sa vakabula ko Jiova era na lesu mai, ka tadu mai ki Saioni ka sere tiko, ia na reki sa sega ni mudu ena tauca na uludra: ena nodra na reki kei na marau, ia na rarawa kei na tagi ena dro tani yani.

¹² Koi au, io koi au, ka'u sa vakacegui kemudou: ko cei ko iko, mo rerevaka na tamata ena mate, kei na luve ni tamata ena vukici me co;

¹³ ka sa guilecavi Jiova ka Buli iko, ka tevuka yani na lomalagi, ka tauyavutaki vuravura, ka sa rere tikoga e na veisiga, e na vuku ni nona cudru na dauveivakasaurarataki, ni sa vakarau me ia na veivakarusai? ia sa evei na nona cudru na dauveivakasaurarataki?

¹⁴ Sa kusakusa na bobula me sereki, ia ena sega ni mate e nai keli, na kena kakana talega ena sega ni yali.

¹⁵ Ni sai au ko Jiova na nomu Kalou, ka vakamaravutaka na wasawasa, ni sa vadugu na kena biau: ko Jiova ni lewe vuqa na yacana.

¹⁶ Ia ka'u sa vakacuruma na noqu vosa ki na gusumu, ia ka'u sa ubi iko e na yaloyalo ni ligaqu, me'u tea na lomalagi, ka tauyavutaki vuravura, ka kaya vei ira mai Saioni, Koi kemudou na noqu tamata.

¹⁷ Mo yadra, mo yadra mai, tu cake, Jerusalemi, ko sa gunuva mai na liga i Jiova na bilo ni nona cudru katakata, ko sa gunuva na kena soko e na bilo e dauveivakamateni, ka lobaka.

¹⁸ Sa sega e dua vei ira kecega na luvena sa vakasucuma me sa tuberi koya; sa sega e dua vei ira kecega na luvena ka susuga, me sa taura na ligana.

¹⁹ A ka ruarua oqo sa yacovi iko; ko cei me tagicaki iko? na veivakalalataki kei na rusa, na viakana kei nai seleiwau: me'u vakacegui iko vakaevei?

²⁰ Sa waicala na yalodra; ko ira na luvemu era sa koto e na mua ni saqata ni koro kecega, me vaka na pulumokau tagane kila e na lawa; ni sa ka levu sara na nona cudruvi ira ko Jiova, kei na nodra vunauci mai vua na nomu Kalou.

²¹ Ia mo rogoca mada na ka oqo, ko iko sa rarawa, ko iko sa mateni, ka segai e na waini:

²² sa kaya vakaoqo na nomu Turaga ko Jiova, kei na nomu Kalou o koya ka totaki ira na nona tamata, Raica, ka'u sa kauta tani mai na ligamu na bilo e dauveivakamateni, io na kena soko e na bilo ni noqu cudru katakata; ko na sega ni gunuva tale;

²³ ka'u na solia ga ki na ligadra era sa vakararawataki iko, era kaya ki na yalomu, Mo koto sobu me keitou lakobutuki kemudou: ia ko sa vakatautauvatataka na dakumu kei na qele, ka vaka na sala, vei ira era lakovi kemudou.