Aisea 50 - Vakavakadewa Makawa

A nodra i valavala ca na tamata ni Kalou na vu ni nodra ca, 1. Sa kaukauwa na Kalou me vakabulai ira, 2,3. Ko Koya na nonai Talatala sa rawata sara na cakacaka sa lesi kina, ni sa vosota rawa sara na veivakacacani, 4-9. A vakabauta na vu ni bula, na vakatitiqa na vu ni rusa ni tamata, 10,11.

¹ Sa kaya vakaoqo ko Jiova: Sa evei nai vola ni veibiu nei tinamu, ka'u sa vakatalai koya kina? se ko cei ka'u sa dinau vua ka'u sa volitaki iko kina. Raica, e na vuku ni nomudou i valavala ca dou sa volitaki kina: e na vuku talega ni nomudou talaidredre sa veibiu kina na tinamudou.

² A cava, ni'u a lako mai, sa sega kina e dua na tamata? a cava, ni'u a kaci, sa sega e dua me rogo mai? Sa lekaleka li na ligaqu, me dredre kina ni ia na veivakabulai? se sa sega beka vei au na kaukauwa, me'u sega kina ni vakabula rawa? raica, ni'u sa vunauca, ka'u sa vakadiva kina na wasawasa, ka vukica na uciwai me talasiga: ni sa yali na wai, sa bona na kena ika ka mate sara e na viagunu:

³ ka'u sa vakaisulutaka na lomalagi e na butobuto, ka ubia e nai sulu taga.

⁴ Sa solia vei au na Turaga ko Jiova na yame sa vakavulici rawa, me'u vuku i tokona e a vosa na tamata sa ceguoca: sa vakayadrati au ko koya e na veimataka, sa vakaturorogo na daligaqu, me'u vakarorogo me vakataki ira era sa vakatavulici.

⁵ Sa basuka na daligaqu na Turaga ko Jiova, ia ka'u a sega ni beca, ka'u a sega ni vakanadakuya.

⁶ A dakuqu ka'u a solia vei ira na dauveiyaviti, kei na baluqu vei ira na dauveivuti; ka'u a sega ni tabonaka na mataqu maivei ira na veivakamaduataki kei na veikasiviti.

⁷ Ia na Turaga ko Jiova ena vukei au, o koya oqo ka'u sa sega kina ni taqaya; ia ka'u sa vaqaqataka kina na mataqu me vaka na qiwa, ka'u sa kila ni'u na sega ni madua.

⁸ Sa voleka mai ko koya sa vakadonui au; ko cei me na ia na veilewai kei au? me keirau tu cake vata mada; ko cei sa bolei au? me toro mai vei au ko koya.

⁹ Raica, ena vukei au na Turaga ko Jiova; ko cei me na vakacalai au? raica, ko ira kece era na madra mai me vaka nai sulu; ena kani ira na sarasara.

¹⁰ Ko cei vei kemudou sa rerevaki Jiova, ka sa vakarorogo ki na vosa ni nonai talatala, ka sa lako e na butobuto, ka sa sega vua na rarama? me vakararavi ko koya ki na yaca i Jiova, ka ravita na nona Kalou.

¹¹ Raica, koi kemudou kece sa tutuvaka na buka, ka vauci kemudou e na lidi ni bukawaqa: dou lako voli ga e na rarama ni nomudou bukawaqa, kei na lidi ni bukawaqa dou sa tutuvaka. Dou na rawata na ka oqo; mai na ligaqu; dou na koto sobu ga e na rarawa.