Aisea 5 - Vakavakadewa Makawa

A loloma ni Kalou vei ira na nona tamata, kei na nodra sega ni loloma vua, 1-7; era na cudruvi e na vuku ni nodra domo-ni-koco, 8-10; kei na nodra daugunu yaqona, 11,12; kei na nodra sega ni kila na Kalou, 13-17; eso tale na ka era ca kina, 18-23; kei na nodra biuta na vunau ni Kalou, 24,25; ai valavala ni nodra cudruvi, 26-30.

¹ Au na seretaka mada vua ka'u sa daulomana na sere ka baleta na nona were-ni-vaini nei koya ka'u sa lomana. E dua na were-ni-vaini nei koya ka'u sa daulomana, ka no mai na dua na ulu-ni-vanua qele bulabula:

² ka sa viribaita, ka biuta tani na kena veivatu, ka tea kina na vaini vinaka sara, ka sa tara e dua na vale-cecere e loma, a sa kelia kina nai keli-ni-waini: ka sa qai nuitaka me vuataka na vuana, a sa vuataka na vua ca.

³ Ia koi kemudou na kai Jerusalemi, kei na tamata ni Juta, dou lewa mada vei keirau kei na noqu were-ni-vaini.

⁴ A cava tale me caka ki na noqu were-ni-vaini, ka'u a sega ni cakava kina? ia e na vuku ni cava, ni'u a nuitaka me vuataka na vua ni vaini, sa qai vuataka ga na vua ni vaini ca?

⁵ Ia oqo; ka'u na tukuna mada vei kemudou na ka ka'u na cakava ki na noqu were-ni-vaini: au na kauta tani na kena bai soni, ena qai laukana; au na talaraka sobu na kena bai vatu, ena qai buturaki:

⁶ Au na biuta ga me lekutu: ena sega ni samaki se wereci; ena tubura ga na kau vakavotona kei na soni: ia ka'u na lewa na o me kakua ni tau maikina na uca.

⁷ Ia na were-ni-vaini i Jiova ni lewe vuqa na veimataqali i Isireli, kei ira na tamata ni Juta era sa nonai teitei daudomoni: a sa nanuma ena ia na caka dodonu, ka raica! sa ia ga na veivakamatei; kei nai valavala dodonu, ka raica na qoqolou.

⁸ Era na ca ko ira era dauvakaikuritaka na vale ki na vale, ka daukuria na were ki na were, me kakua na vanua e vo, mo dou qai tiko vakataki kemudou ga e na loma ni vanua!

⁹ Sa kaya tiko e na daligaqu ko Jiova ni lewe vuqa, E dina ena lala mai na veivale e vuqa, na veivale lelevu ka vinaka, ka me sega e tiko kina.

¹⁰ Io, na were-ni-vaini sa tini na eka ena dua kina na paca waini, kei na omeri sila e dua ena dua kina na efa.

¹¹ Era na ca ko ira era souta na gunu yaqona e na mataka caca; ka bogicaka, me ra mateni e na waini!

¹² Ia na api, kei na vaioli, na tibereli, kei na bitu-ni-vakatagi, kei na waini, sa ka ni nodra so yaqona: ia na cakacaka i Jiova era sa sega ni veinanuyaka, kei na ka sa cakava na ligana era sa sega ni nanuma kina.

¹³ O koya oqo era sa kau vakabobula tani kina na noqu tamata, ni sa sega na nodra vuku; ia na nodra tamata rogo, era sa mate e na viakana; kei na nodra lewe vuqa, era sa mate e na viagunu.

¹⁴ O koya oqo sa vakalevutaki koya kina ko bulubulu, ka sa dalaga vakalevu sara: ka sa lako sobu kina ko ira era sa rogo, kei na kedra lewe vuqa, kei na kedra totoka, kei koya sa marautaki koya.

¹⁵ A sa vakamalumalumutaki na tamata wale, ka vakasivoi na tamata turaga, ena matamadua talega ko ira na mataviavialevu:

¹⁶ ia ko Jiova ni lewe vuqa sa vakalevulevui e na lewa dodonu, a sa vakarokorokotaki na Kalou yalosavasava e nai valavala dodonu.

¹⁷ Ena qai kana voli na lami me vaka e na kedra vanua veico, ia na nodra vanua lala na vutuniyau ena kania ko ira na kai tani.

¹⁸ Era na ca ko ira era yarataka mai nai valavala ca e na dali ni ka lasu, ka caka ca me vaka e na dali kaukauwa:

¹⁹ O ira era kaya, Me tei kusarawa ko koya, ka me vakusakusataka na nona cakacaka me da raica; ia na ka sa bosea ko koya na Yalosavasava ni Isireli, me toro mada mai ka yaco, me da kila!

²⁰ Era na ca ko ira era vakatoka na ca me vinaka, kei na vinaka me ca; era kaya sa rarama na butobuto, ka butobuto na rarama; era kaya sa kamikamica na ka gaga, ka gaga na ka sa kamikamica!

²¹ Era na ca ko ira era nanumi ira ni ra vuku, ka vakasami ira ni ra yaloqaseqase!

²² Era na ca ko ira era gumatua ni gunu waini, kei ira era tamata kaukauwa ni caka yaqona:

²³ era vakadonui koya sa cala me nodra kina nai solisoli, ka ra sa kauta tani maivua na tamata dodonu na nona dodonu.

²⁴ Ia me vaka sa kama na vu-ni-sila e na yameyame ni bukawaqa, ka sa yavu sara na co madu ni sa caucaudre, ena vuca sara vakakina na wakadra, ia na sedra ena vuka cake me vaka na kuvu-ni-soso: ka ni ra sa biuta tani na vunau i Jiova ni lewe vuqa, ka beca na vosa i Koya na Yalosavasava ni Isireli.

²⁵ O koya oqo sa waqa kina na cudru i Jiova vei ira na nona tamata, ka sa dodoka yani na ligana vei ira, ka cudruvi ira: ka sa sautaninini na ulu-ni-vanua, ia na yagodra ka mate no sa vaka na soqosoqo e loma ni saqata ni koro. Ia ni sa caka kece oqo sa sega ni mudu kina na nona cudru, sa dodo tikoga na ligana.

²⁶ Ia ena vakarewataka ko koya na kuila vei ira na veimatanitu vakayawa, ka kaluvi ira mai nai yalayala kei vuravura: ka raica, ena vakusakusa ka vakatotolo na nodra lako mai:

²⁷ Sa sega vei ira sa malumalumu se tidara; sa sega ena sosovu se moce; ia nai vau ni tolodra ena sega ni tasere, kei na wa ni nodra i vava ena sega ni cavuka.

²⁸ Sa gata na nodra gasau, ka sa loka tu na nodra dakai titi kecega, a ququ ni nodra ose sa nanumi ni sa vaka na qiwa, kei na yava ni nodra qiqi-ni-valu sa vaka na covulaca:

²⁹ Era na tagi me vaka na laioni, era na tagi me vaka na luve ni laioni: io era na kudru, ka toboka na kedra, ka kauta vakavinaka, ka na sega me vakabula.

³⁰ A ra na qolouvaki ira e na siga ko ya me vaka na vadugu ni wasawasa: ia ni sa rai ki vanua e dua, raica, sa butobuto! sa ka rarawa! ka sa tabonaki na rarama e na kena o.