Aisea 49 - Vakavakadewa Makawa

Sa tukuni na Mesaia ni sai talatala ni Kalou ni sa talai mai me nodra i Vakavuvuli kai Vakabula na lewe ni veivanua, 1-13. Ko ira na lewe ni lotu era sa vakaukauwataki me ra vakararavi e na loloma ni Kalou vei ira, 14-23; kei na nona kaukauwa me cudruvi ira na nodra meca, ka vakabulai ira ga, 24-26.

¹ Dou rogoci au, na veiyanuyanu; dou vakadirorogo mai na vanua vakayawa, na veimataqali; Sa kacivi au ni'u sa sucu ko Jiova; mei na kete i tinaqu sa cavuta na yacaqu.

² Ka sa cakava na gusuqu me tautauvata kei nai seleiwau gata; sa tabonaki au e na yaloyalo ni ligana; ka sa cakavi au me'u gasau makamakalivata; sa vunitaki au e na nona taga ni gasau;

³ ka sa kaya vei au, ko iko na noqu i talatala, ko iko, Isireli, ka'u na vakacaucautaki kina.

⁴ Ia koi au ka'u a kaya, Sa sega ni yaga na noqu oca, ka'u sa vakaotia wale na noqu kaukauwa ka sa sega dina ni yaga: ia sa tu vei Jiova na noqu veivakadonui, kei na noqu cakacaka sa tu ga vua na noqu Kalou.

⁵ Ia oqo, sa qai kaya ko Jiova, ko koya ka buli au ni'u sa sucu me'u nonai talatala, me'u saumaki ira na Jekope vua, ia kevaka ena sega ni vakasoqoni mai ko ira na Isireli, ka'u na dokai ga e na mata i Jiova, ka sa noqu kaukauwa talega na noqu Kalou.

⁶ Ia sa kaya ko koya, Sa ka lailai mo noqu i talatala mo vueta cake na veimataqali i Jekope, ka vakalesui ira mai na Isireli era maroroi tiko: Ka'u sa soli iko talega mo nodra rarama na veimatanitu, mo yaco talega mo vu ni bula e na vukuqu ki nai yalayala kei vuravura.

⁷ Sa kaya vakaoqo ko Jiova, ko koya nai Vakabula ni Isireli, kei na nona Yalosavasava, vua sa beci sara, vua era sa vakasisilataka na lewe ni vanua, vua na nodra tamata na turaga, Era na raica ko ira na tui ka tu cake, ko ira talega na turaga, a ra na cuva, e na vuku i Jiova ko koya sa daudina, ko Koya na Yalosavasava ni Isireli, ko koya sa digitaki iko.

⁸ Sa kaya vakaoqo ko Jiova, E na gauna ni vinakati ka'u a rogoci iko, e na siga ni bula ka'u a vukei iko; ka'u na maroroi iko, ka soli iko mo veiyalayalati kei ira na tamata, mo vueti vuravura, me vakatawa tale na veiyasana lala;

⁹ ka mo kaya vei ira sa vesuki, Dou lako mai; ka vei ira ka tiko e na butobuto, Dou vakaraitaki kemudou mai. Era na kana voli e na sala, ia na kedra vanua veico ena tu mai na veiyasana cecere kecega.

¹⁰ Era na sega ni viakana se viagunu; ena sega ni kati ira na nuku kata se na mata-ni-siga; ni na tuberi ira ko koya sa lomani ira, ka na tuberi ira e na bati ni wai vure.

¹¹ Ka'u na cakava kecega na noqu ulu-ni-vanua me gaunisala, ia ena cecere na noqu salatu.

¹² Raica, ko ira oqo era na lako vakayawa mai; ka raica, ko ira oqo mai na tokalau, ka mai ra talega; kei ira oqo mai na vanua ko Sainimi.

¹³ Dou ia na sere, na lomalagi; mo marau, na vuravura; dou lagata vata mai na sere, na veiulu-ni-vanua: ni sa vakacegui ira na nona tamata ko Jiova, ena lomani ira na nona era sa rarawa.

¹⁴ Ia sa kaya ko Saioni, Sa biuti au ko Jiova, ka sa guilecavi au na Turaga.

¹⁵ E dua li na yalewa me na guilecava na luvena sa sucu, me kua ni lomana na luve ni ketena? io, ena sa guilecava beka, ia koi au ka'u na sega ni guilecavi iko:

¹⁶ raica, ka'u sa ceuti iko e na qeteqete ni ligaqu; a nomu bai sa tikotiko ga e mataqu:

¹⁷ ko ira na luvemu era sa kusarawa mai; ko ira era vakacacani iko ka vakalalataki iko era na lako tani vei iko:

¹⁸ mo ta cake ka veiraiyaki; ko ira kecega oqo, era sa soqoni vata mai, era sa lako mai vei iko. Me vaka na kena dina ni noqu bula, sa kaya ko Jiova ko ira kecega oqo ko na vakaisulutaki iko kina, me vaka na ka ni ukuuku, ka vauca vei iko, me vaka sa ia na yalewa sa qai vakawati.

¹⁹ A nomu veiyasana ka rusa ga ka lala, kei na nomu vanua ka vakarusai, io sa qai osooso sara mai e na vuku ni lewena; a ra na yawa tani sara ko ira era sa tilomi iko:

²⁰ era na baci kaya tale e daligamu ko ira na luvemu, era a yali vei iko, Sa oso sara na noqu tikina; mo toro yani, me'u tiko rawa:

²¹ ko na qai kaya e lomamu, Ko cei ka vakatuburi ira oqo me ra noqu, koi au ka yali na luvequ, ka'u sa yava, ka bobula, ka biu tu? ia ko ira oqo ko cei beka ka susugi ira? Raica, koi au ka'u a biu laivi: ko ira oqo, sa ra tiko beka maivei?

²² Sa kaya vakaoqo na Turaga ko Jiova, Raica, ka'u na dodoka na ligaqu vei ira na veimatanitu, ka vakaduria na noqu kuila ki na veimataqali; ka ra na keveti ira na luvemu tagane ka kauta mai, kei ira na luvemu yalewa era na kauta mai e na domodra.

²³ Ko ira na tui era na susugi ira na luvemu, ia ko ira na nodra marama era na ia na veisusu vei iko: ni ra na cuva vakalotulotu vei iko, ka dramica na kuvu-ni-soso ni yavamu: ia ko na kila ni sai au ko Jiova, ka ra na sega ni madua ko ira era sa waraki au.

²⁴ Me na kovei li nai toki ni valu mai vua sa qaqa? se ko ira era vakabobulataki vakadodonu, me na vakabulai?

²⁵ Ia sa kaya vakaoqo ko Jiova. Ena kovei ga ko ira na bobula mai vua sa qaqa, ka kaliraki nai toki ni valu mai vua sa rerevaki; ka'u na vala kei ira era veivala kei iko, ka vakabulai ira na luvemu:

²⁶ ka'u na vakani ira era vakasaurarataki iko e na lewedra dina; era na mateni e na kedra dra dina, me vaka e na waini vou; ia na tamata kecega era na kila ni sai au ko Jiova na nomu i Vakabula, ni sai au ka voli iko, koi au na Kaukauwa i Jekope.