Aisea 48 - Vakavakadewa Makawa

Na Kalou, ni sa kilai ira na Juta ni ra dauvakararavi ki na kalou lasu, sa tukuna eliu vei ira na ka ena yaco emuri, 1-8. Sa dauvakabulai ira e na vukuna ga, 9-11. Sa vakaroti ira me ra talairawarawa vua ni sa kaukauwa ka vuku na nona lewa, 12-15. Sa vakavulici ira, 16-19; a sa tukuna tale ni ra na vakabulai mai na nodra tiko se mai Papiloni, 20-22.

¹ Dou rogoca na ka oqo, na mataqali i Jekope, na tamata sa vakatokai e na yaca i Isireli, ka sa lako mai na mata-ni-wai nei Juta, ka sa bubului e na yaca i Jiova, ka sa daucavuta na Kalou ni Isireli, ka segai e na yalodina, se na yalododonu.

² Ni ra sa tukuni ira ni ra lewe ni koro tabu, ka vakaraviti ira vua na Kalou ni Isireli; ko Jiova ni lewe vuqa na yacana.

³ Na ka makawa ka'u a tukuna e na gauna eliu sara; ka sa lako yani mai na gusuqu ga na ka oqori, ka'u a vakatakila talega; ka'u a cakava vakasauri, ka sa yaco ga.

⁴ Ni'u a kila ni ko sa yalokaukauwa, ni sa dali aironi na domomu, ka parasa na yadremu;

⁵ o koya ka'u a tukuna kina vei iko e na gauna eliu sara; ni sa sega ni yaco, ka'u a vakatakila vei iko; de ko kaya, A noqu matakau ga sa vakayacora, ia na noqu matakau ceuceu, kei na noqu matakau sa vakawaicalataki, ko koya ga sa vakarota me yaco.

⁶ Ko sa rogoca oti, ia mo raica mada na ka kece oqo; ia dou na sega beka ni via tukuna talega? ka'u sa qai vakatakila vei iko na ka vou, io na ka vuni, ko a sega ni kila.

⁷ Sa qai caka edaidai, ka segai eliu; e na gauna eliu ko a sega ni rogoca; de ko kaya, Raica, ka'u a kila ga.

⁸ Io, ko a sega ga ni rogoca; ko a sega ga ni kila; sa sega talega ni rogo mailiu na daligamu: ni'u a kila ko na cakacaka vakailasu sara, ka ni ko sa vakatokai na dautalaidredre mai na siga ko sucu kina.

⁹ E na vuku ni yacaqu ka'u na vakaberaberataka na noqu cudru, kei na vuku ni noqu i rogorogo ka'u na tarovi au ga, me'u kakua ni muduki iko laivi.

¹⁰ Raica, ka'u a vakatovolei iko e na buka, ka sa sega ni vaka na siliva; ka'u a digitaki iko e na kuro qele ni veivakararawataki.

¹¹ E na vukuqu, io, e na vukuqu ga, ka'u na cakava; ni sa vinaka li me vakadukadukalitaki na yacaqu? ia na vakarokoroko sa dodonu me ia vei au, ka'u na sega ni solia vua e dua tani.

¹² Rogoci au mada ko iko Jekope, ko iko talega Isireli, ka'u a kaciva; sai au oqo: sai au na kenai liuliu; sai au na kenai murimuri talega:

¹³ na ligaqu ga ka tauyavutaki vuravura, ia na ligaqu i matau ka tevuka na lomalagi: ni'u sa kaciva, ka sa tu vata mai:

¹⁴ koi kemudou kece dou vakasoqoni vata ga, ka vakarorogo; ko cei vei ira era sa vakatakila mai na ka oqori? Sa lomani koya ko Jiova: ena cakava ga na nonai naki ki Papiloni, ia na ligana ena tarai ira na kai Kalitia.

¹⁵ Koi au, ka'u sa cavuta; ka'u sa kacivi koya; ka'u sa kauti koya mai; ena vakayacora na nona cakacaka ko koya.

¹⁶ Dou toro voleka mai vei au, dou rogoca na ka oqo; sa sega ni ka'u vosa vuni mai nai vakatekivu, ni sa qai tubu na ka oqori ka'u a tiko maikina; ia oqo sa qai talai au mai na Turaga ko Jiova, kei na Yalona.

¹⁷ Sa kaya vakaoqo ko Jiova, na nomu i Vakabula, ko Koya na Yalosavasava ni Isireli; Koi au ko Jiova na nomu Kalou ka'u sa vakavulici iko mo vinaka kina, ka'u sa tuberi iko e na sala mo lakova.

¹⁸ De ko a vakarorogo ki na noqu vunau! sa na qai vaka na uciwai na nomu vakacegu, ka vaka na ua ni wasawasa na nomu cakacaka dodonu:

¹⁹ na nomu kawa sa na vaka na nuku, kei na luvemu era na vaka na mata ni nuku; ena sa sega ni muduki se bokoci na yacana mai na mataqu.

²⁰ Dou lako tani e Papiloni, dro tani mai vei ira na kai Kalitia, e na domo ni marau dou tukuna yani na ka oqo; dou vakarogoya, vakauta nai rogorogo ki nai yalayala kei vuravura; dou kaya, Sa vakabula ko Jiova na nona tamata ko Jekope:

²¹ ka ra sa sega ni viagunu ni sa kauti ira voli ko koya e loma ni lekutu; sa vakadavea ko koya na medra wai mai na vatu; ka sa tasea na vatu ko koya ka sa tovure maikina na wai.

²² Sa kaya ko Jiova, sa sega na vakacegu vei ira na tamata i valavala ca.