Aisea 44 - Vakavakadewa Makawa

Na Kalou, sa vakacegui ira na lewe ni lotu e na nona vosa ni yalayala, 1-5. Sa sega sara ni yaga na matakau, a ra sa tamata lialia era sa taya ka sorova, 6-20. Sa vakaroti ira me ra ia na vakavinavinaka vua na Kalou, ni sa vakabulai ira vakaukauwa, 21-28.

¹ Ia oqo mo vakarorogo, Jekope na noqu tamata; ia ko iko talega Isireli, ka'u sa digitaka:

² sa vosa vakaoqo ko Jiova ka cakavi iko, ka buli iko mai na kete, ena vukei iko ko koya; Mo kakua ni rere, Jekope, na noqu tamata; ko iko talega Jesuruni, ka'u sa digitaka.

³ Ni'u na sovaraka na wai vua sa viagunu, kei na wai drodro ki na qele mamaca: au na sovaraka na Yaloqu ki na nomu kawa, kei na noqu ka ni veivakalougatataki kivei ira sa tubu maivei iko:

⁴ ka ra na tubu me vaka e na loma ni veico, me vaka na veiwilou e na bati ni wai drodro.

⁵ Ena kaya e dua, Koi au na nei Jiova; e dua tale ena vakatokai koya e na yaca i Jekope; e dua tani tale ena vola ki na ligana, A nei Jiova, ka vakatokai koya e na yaca i Isireli.

⁶ Sa kaya vakaoqo ko Jiova na nodra tui na Isireli, kei na nodra i Vakabula ko Jiova ni lewe vuqa: Koi au na kenai liuliu, koi au na kenai murimuri talega; ka sa sega tale na Kalou, koi au ga.

⁷ Ia ko cei me na kaciva, ka tukuna, ka tusanaka mai na ka ena yaco me vakataki au mai na gauna ka'u a vakatikori ira kina na tamata eliu? ia na ka sa bera ni yaco, kei na ka ena yaco maimuri, me ra tukuna mai.

⁸ Dou kakua ni domobula, se taqaya: au a sega beka ni dautukuna vei iko mai na gauna ko ya, ka dauvakaraitaka? sai kemudou beka ga ena noqu i vakadinadina. Sa dua tale beka na Kalou, se koi au ga? io, sa sega tale na Uluvatu; ka'u sa sega ni kila e dua.

⁹ Ko ira era cakava na matakau ceuceu era sa ka wale kecega; sa sega ni yaga na nodra ka daudomoni; era sa tukuni ira vakataki ira; era sa sega ni rai, se kila rawa, me ra madua kina.

¹⁰ Ko cei sa cakava na kalou, ka ceuta na matakau sa sega ni yaga e na dua na ka?

¹¹ Raica, na kenai tokani era na madua kecega; ko ira na matai, era sa tamata ga: me ra soqoni vata kecega, me ra tu cake; era na rere, era na madua vata ga.

¹² Na matai ni aironi sa taura e dua na matau, ka sa cakacaka e na qilaiso sa waqa, ka sa tulia e nai tukituki, ka sa qai kitaka e na kaukauwa ni ligana; io, sa viakana mai, a sa yali na nona kaukauwa; sa sega ni gunuva na mena wai, ka sa malumalumu mai.

¹³ Na matai ni kau sa dreta na nona wa i vakarau; sa vola e na peni kau; sa qai civia e na veleko, ka sa vola enai vakarau me momokiti, ka sa cakava me ucuya na tamata, me matavinaka vakatamata; me tu ga e na vale.

¹⁴ Sa taya sobu na sitari me nona, ka sa kauta na nokonoko kei na oki, sa vakaukauwataka me yaga vua na kau ni veikau: sa tea e dua na paini, ia na uca sa vakatubura:

¹⁵ ena qai yaga ki na tamata me buka; a sa kauta mai e dua, ka sa tatalai kina: io, sa vakawaqa, ka sa vavia kina na madrai; io, sa cakava na kalou, a sa rokova; sa cakava me matakau ceuceu, ka sa cuva kina.

¹⁶ E dua na tikina sa vakama e na bukawaqa; e na dua na tikina sa kania na lewe ni manumanu; sa tavuna na kena, ka sa mamau; sa tatalai talega, a sa kaya, vinaka, ka'u sa katakata, ka'u sa kunea na bukawaqa:

¹⁷ ia na tikina sa vo sa cakava ko koya me kalou, io me nona matakau ceuceu: sa cuva sobu kina, ka sa sorova, ka masuta, ka sa kaya, Mo vakabulai au, ni sai iko na noqu kalou.

¹⁸ Era sa sega ni kunea, era sa sega talega ni kila: ni sa boroi na matadra, me ra sega ni kunea; kei na lomadra, me ra sega ni kila.

¹⁹ Ka sa sega e dua sa vakasara ki lomana, ka sa sega ni vuku se yalomatua me kaya mai; E dua na tikina ka'u sa vakama e na bukawaqa; ka'u sa vavia talega na madrai e na kena qilaiso; ka'u a tavuna na lewe ni manumanu, ka kania: me'u sa qai cakava li na kena vo me ka vakasisila? me'u cuva sobu li ki na dulumi ni kau?

²⁰ Sa kana dravu ko koya; sa vakaisini na lomana, ka sa vakacalai koya tani, a sa sega ni vakabulai koya rawa, se kaya mada, Sa sega li ni tiko e na ligaqu i matau e dua na ka lasu?

²¹ Mo nanuma na ka oqo, ko iko Jekope, kei Isireli, ni ko sa noqu tamata; ka'u a buli iko, sai iko na noqu tamata; i Isireli, ka'u na sega ni guilecavi iko.

²² Au sa vakaseavutaka na nomu talaidredre me vaka na o loaloa, kei na nomu i valavala ca me vaka na o; mo lesu mai vei au, ni'u a voli iko.

²³ Mo ia na sere, na lomalagi; ni sa vakayacora ga ko Jiova; dou kaikaila, na yasana vakavuravura era; dou lagata mai na sere, na veiulu-ni-vanua, na veikau, kei na kau yadua sa tu kina: ni sa voli Jekope ko Jiova, ka sa vakarokorokotaki koya e na vuku i Isireli.

²⁴ Sa kaya vakaoqo ko Jiova, na nomu i Vakabula, kei koya ka buli iko mai na kete; Koi au ko Jiova ka'u a cakava na ka kecega, ka tevuka duaduaga na lomalagi, ka tevuka talega vakataki au ga na vuravura:

²⁵ ka'u sa vakatawayagataka na nodra ka mana na daulasu wale, ka'u sa vakalialiai ira na rairai, ka vakalesui ira ki muri na vuku, ka vukica na nodra vuku me lialia:

²⁶ ka'u sa vakadinadinataka na nona vosa na noqu tamata; ka vakayacora na nodra i vakavuvuli na noqu i talatala; ka'u sa kaya ki Jerusalemi, Ko na tawa; ki na veikoro talega vaka Juta, Dou na tara; ia na kena tikina sa ca ka'u na vakavinakataka tale:

²⁷ ka'u sa kaya ki na wasawasa, Mo di mai, ia ka'u na vakadiva na nomu veiuciwai:

²⁸ ka'u sa kaya e na vuku i Sairusi, Sai koya na noqu i vakatawa, ia na ka kece ka'u sa vinakata ena vakayacora ga ko koya, io ena kaya ki Jerusalemi, Ko na tara; ki na vale tabu talega, Ko na tauyavutaki.