Aisea 43 - Vakavakadewa Makawa

Na Turaga, sa vakacegui ira na nona tamata e na nona vosa ni yalayala, 1-7. Ni ra sa kunea na nona kaukauwa kei na nona loloma eliu, sa dodonu me ra tukuni koya, 8-13. Sa qai vakatakila vei ira ni na vakarusai Papiloni, ka vakabulai ira, 14-21. Sa vunauci ira e na vuku ni nodra vakatitiqa, 22-28.

¹ Ia oqo sa qai vaka ko Jiova, ko koya ka cakavi iko, Jekope, ka buli iko, Isireli: Kakua ni ko rere; ni'u a voli iko, au a kacivi iko e na yacamu: ko sa noqu.

² Ni ko sa lako e loma ni wai, ka'u na tiko kei iko; kei na loma ni veiuciwai, ena sega ni luvuci iko: ni ko sa lako e loma ni bukawaqa, ena sega ni kani iko; ena sega talega ni kati iko na yameyame ni buka.

³ Ni sai au ko Jiova, na nomu Kalou, na Yalosavasava ni Isireli, na nomu i Vakabula, ka'u a soli Ijipita me kemui voli, kei Iciopea talega kei Sepa e na vukumu.

⁴ Ni ko sa qai talei e mataqu, ko sa dokai kina, ia ka'u a lomani iko: ia ka'u na soli ira na tamata me kemui sere, kei na veimatanitu mei voli ni nomu bula.

⁵ Kakua ni ko rere, ni'u sa tiko vata kei iko: au na kauti ira na nomu kawa mai na tu-i-cake, ka'u na vakasoqoni ira na kai nomu mai ra talega:

⁶ ka'u na kaya ki na mata ni tokalau, Mo soli ira mai; ki na mata ni ceva talega, Kakua ni ko bureitaki ira; kauti ira mai na luvequ tagane mai na vanua yawa, kei ira na luvequ yalewa mai nai yalayala kei vuravura;

⁷ ko ira yadua era sa vakayacani e na yacaqu; ia ka'u a cakavi koya me'u vakarokorokotaki kina; ka'u a buli koya; io, ka'u a cakavi koya.

⁸ Dou kauti ira mai na tamata mataboko, era sa vakamatana; kei ira na didivara, era sa vakadaligana:

⁹ me ra soqoni vata na veimatanitu kecega, ia me ra vakasoqoni mai na veimataqali: ko cei vei ira me na tukuna rawa na ka oqo, ka tukuna mai vei keda na ka ni gauna eliu? me ra kauti ira mai na nodra dauvakadinadina, me ra vakadonui kina: se me ra rogoca, ka vakadinadina kina.

¹⁰ Sa kaya ko Jiova, Sai kemudou na noqu dauvakadinadina, kei na noqu tamata ka'u sa digitaka: mo dou sa kunea ka vakadinati au, ka kila ni sai au ko Koya: sa sega na kalou ka buli eliu ka muri koi au, ka na sega e dua me na taravi au.

¹¹ Koi au, io koi au ga ko Jiova ka sa sega tale nai Vakabula, koi au ga.

¹² Koi au ka'u a tukuna, ka ia na veivakabulai, ka vakatakila, ni sa sega vei kemudou na kalou tani: ia sai kemudou ga dou na tukuni au ni'u sa Kalou, sa kaya ko Jiova.

¹³ Io, mai na gauna oqo, sai au ga; ka sa sega e dua me vakabula rawa mai na ligaqu; au na cakacaka tiko, ia ko cei me na vakadaroya?

¹⁴ Sa kaya vakaoqo ko Jiova, na nomudou i Vakabula, na Yalosavasava ni Isireli; E na vukumudou ka'u a talaki ki Papiloni, ka vakauti ira kece sara ga era sa dro; io kei ira na kai Kalitia, era daukaila e na waqa.

¹⁵ Koi au ko Jiova, na nomudou Kalou Yalosavasava, o koya ka Buli ira na Isireli, ka'u sa nomudou Tui.

¹⁶ Sa kaya vakaoqo ko Jiova, ko koya sa cakava na sala e na wasawasa, kei na salatu e na wasa titobu;

¹⁷ ko koya sa kauta mai na qiqi-ni-valu kei na ose, nai valu kei na qaqa; era na koto sobu vata, era na sega ni tu cake tale; era sa suibokoci, era sa bokoci me vaka na wa ni cina.

¹⁸ Dou kakua ni vakananuma na ka makawa, se vakasama na ka eliu:

¹⁹ raica, ka'u na cakava na ka vou; ena tubu ga oqo dou na sega beka ni kila? Io, ka'u na cakava na sala e loma ni lekutu, kei na uciwai e na vanua talasiga:

²⁰ ena dokai au na manumanu kila, kei na gata lelevu kei na ositereji: ka ni'u sa solia na wai mai na lekutu, kei na uciwai mai na vanua talasiga, me'u vagunuvi ira na noqu tamata, ka'u a digitaka.

²¹ Ko ira na tamata oqo ka'u sa bulia me noqu; era na tukuna na noqu vinaka sara.

²² Ia ko a sega ni masuti au, Jekope; ko sa oca ni qaravi au, Isireli.

²³ Ko sa sega ni kauta mai vei au na sipi me nomu i soro kama; ko sa sega talega ni vakarokorokotaki au e na nomuni madrali. Au a sega ni lavaka vei iko mo ia na vakacaboi soro se'u vakaocataki iko e na cakai madrali boi vinaka.

²⁴ Ko sa sega ni volia na noqu kalamo e nai lavo, ko sa sega talega ni vakamamautaki au e na uro ni nomu i soro: ia ko sa bitaki au ga e na nomu i valavala ca, ka vakaocataki au e na nomu caka cala.

²⁵ Koi au, io koi au ga, ka'u sa bokoca na nomu talaidredre e na vukuqu, ka'u na sega ni nanuma tiko na nomu i valavala ca.

²⁶ Mo vakananumi au: me daru ia na veilewai; mo tukuni iko mai, mo vakadonui kina.

²⁷ Sa caka cala na tamamu ka liu, ka ra sa talaidredre vei au ko ira talega na nomu i vakavuvuli:

²⁸ o koya oqo ka'u sa vakacacani ira kina na turaga ni vale tabu, ka soli ira na Jekope me cudruvi, kei ira na Isireli me vakarogocataki.