Aisea 38 - Vakavakadewa Makawa

Sa tauvi mate ko Esekaia, ka sa vakabulai tale ni sa masu, 1-8. A nona sere ni vakavinavinaka ni sa bula, 9-22.

¹ E na gauna ko ya sa tauvi mate ko Esekaia ka sa vakarau ciba. Ka sa lako mai vua ko Aisea na parofita na luve i Emosi, ka sa kaya vua, Sa vosa vakaoqo ko Jiova, Mo tatau mada vei ira na nomu lewe-ni-vale; ni ko na mate ga, ka sega ni bula.

² Sa qai gole ki lalaga ko Esekaia, ka masu vei Jiova,

³ ka sa kaya, Au masuti kemuni, Jiova, mo ni nanuma mada na noqu lako voli e matamuni e na yalodina kei na yaloqu taucoko, kei na noqu caka vinaka e matamuni. Ka sa tagi vakalevu ko Esekaia.

⁴ Sa qai yaco mai na vosa i Jiova vei Aisea, ka kaya,

⁵ Mo la'ki kaya vei Esekaia, Sa kaya vakaoqo ko Jiova na Kalou i Tevita na nomu qase, Au sa rogoca na nomu masu, au sa raica na wai ni matamu: raica, ka'u na kuria na nomu gauna mo bula yabaki tinikalima tale:

⁶ ia ka'u na vakabulai iko kei na koro oqo mai na ligai tui Asiria; ia ka'u na vakaruruga na koro oqo.

⁷ Ia oqo na kenai vakadinadina vei iko maivei Jiova, ni na cakava ko Jiova e dua na ka oqo sa cavuta ko koya:

⁸ raica, ka'u na vakasuka tale ki muri na yaloyalo, sa lako sobu e nai vakatakilakila ni mata-ni-siga nei Easi, me tini na tikina. A sa suka tale ki muri na mata-ni-siga me tini na tikina, a tikina oqori ka sa lako sobu kina.

⁹ Ai vola i Esekaia na tui Juta, ni sa tauvi mate, ka sa bula tale mai na nona mate.

¹⁰ Au a kaya, Ni sa siga levu tutu na noqu siga ka'u na curuma na mata ni katuba kei etesi; Sa yali vei au na noqu yabaki sa vo.

¹¹ Au a kaya, Au na sega tale ni raici Jiova, io ko Jiova, e na nodra vanua na bula; Au na sega ni kunea tale na tamata, kei ira na kai vuravura.

¹² Sa cavuti tani na noqu vale, ka sa kau tani vei au me vaka na vale laca ni vakatawa ni sipi; Au sa drutia laivi na noqu bula me vaka na nona wa na dautali sulu: Sa druti au tani ko koya mai nai musumusu ni ka ni tali sulu; Ko ni na vakaotia na noqu bula e na mataka ka bogi.

¹³ Au a vakasama koto ga ka mataka mai, ni na musuka vaka na laioni, na suiqu kece: Ko ni na vakaotia na noqu bula e na mataka ka bogi mai.

¹⁴ Au a tagi me vaka na kakabace se na belo; Au a tagi vakararawa me vaka na ruve; sa oca na mataqu e na rai ki cake: Kemuni Jiova, ka'u sa bitaki sara; mo ni vukei au mai.

¹⁵ A cava me'u kaya? sa vosa mai vei au ko koya, ka sa vakayacora talega ko koya: Au na lako malua tiko e na noqu veiyabaki kecega, e na vuku ni rarawa ni yaloqu.

¹⁶ Kemuni Jiova, e na ka vakaoqo era bula kina na tamata; Ia e na vuku ni ka kecega oqo sa bula na yaloqu: Kemuni na vakabulai au, me'u sa bula kina.

¹⁷ Raica, sa vuki na noqu rarawa me'u vakacegu: Ia ko a lomana na yaloqu ka vakabula mai nai keli ni rusa; Ni kemuni sa biuta ki dakumuni na noqu i valavala ca kecega.

¹⁸ Ni na sega ni vakavinavinaka vei kemuni nai bulubulu, se vakacaucautaki kemuni na mate, Ko ira sa lako sobu ki nai keli era na sega ni nuitaka na nomu vosa dina.

¹⁹ Ko koya sa bula, io ko koya sa bula, ena vakavinavinaka vei kemuni, me vakataki au e na siga oqo: Ena tukuna ko ira na qase vei ira na gone na nomuni vosa dina.

²⁰ Sa mai vakarau ko Jiova me vakabulai au: Ia na noqu sere eda na ia vata kina kei nai qiriqiri E na vale i Jiova e na veisiga ni noda bula.

²¹ Ia sa kaya oti ko Aisea, Me ra kauta e dua nai buli lolo, ka botana kina na kasi, ena qai bula kina ko koya.

²² Ka sa kaya talega ko Esekaia, A cava na kenai vakadinadina ni'u na lako cake ki na vale i Jiova?