Aisea 36 - Vakavakadewa Makawa

Sa mai kabai Jerusalemi ko Senakaripi, 1-3. Ko Rapisake, ni sa talai koya mai ko Senakaripi, sa vakamasuti ira na kai Jerusalemi e na vosaveicavilaki, me ra vuki, 4-21. Ka sa tukuni na nona vosa vei Esekaia, 22.

¹ Ia e na kenai katinikava ni yabaki i Esekaia na tui, sa qai lako cake ko Senakaripi na tui Asiria me kaba na veikoro kecega i Juta sa viribai, ka sa rawa.

² Ia ko tui Asiria sa talai Rapisake kei nai valu levu mai Lakisi ki Jerusalemi kivei Esekaia na tui: ka sa la'ki tu voleka ko koya ki na salisali ni drano maicake ki na salatu e na nodratou vanua na dausavai sulu.

³ A ratou sa lako yani vua ko Elaiakimi na luve i Ilikaia, ko koya sa lewa na vale levu, kei Sepina na vunivola, kei Joa na luve i Esafa, ko koya sa dauvola na ka ni matanitu.

⁴ Ka sa kaya vei iratou ko Rapisake, Dou tukuna mada vei Esekaia, Sa kaya vakaoqo na tui levu, na tui Asiria, A ka cava oqo ko sa vakararavi kina?

⁵ Au sa kaya, sa vosa wale na nomu vuku kei na nomu kaukauwa me ia nai valu: ia ko sa vakararavi vei cei, ko sa vuki tani kina vei au?

⁶ Raica, ko sa vakararavi ki nai titoko gasau oqo e bibivoro, io ki Ijipita, o koya kevaka sa ravita e dua, ena lauta na ligana, ka suaka: sa vakakina ko Fero na tui Ijipita kivei ira kecega era vakararavi vua.

⁷ Ia kevaka ko sa kaya vei au, Keimami sa vakararavi vei Jiova na neimami Kalou: sa sega li ni ko koya ka taukena na veitikina cecere kei nai cabocabo-ni-soro ka biuta tani ko Esekaia, ka kaya vei ira na Juta kei ira mai Jerusalemi, Dou soro ga e na mata ni cabocabo-ni-soro oqo?

⁸ Ia oqo, mo solia mada vua na noqu turaga na tui Asiria nai vakadinadina, ka'u na qai solia vei iko e rua na udolu na ose, kevaka ko sa rawata na tamata me vodo kina.

⁹ Ko na qai vakasuka tani vakaevei e dua na turaga ni valu lailai vei ira na tamata ni noqu turaga? ka sa qai la'ki vakararavi ki Ijipita me so maikina na nomu qiqi-ni-valu kei na nomu tamata e dauvodo ose?

¹⁰ Ia ka'u sa qai lako cake beka mai vakataki au ga, ka sa sega ni keirau lako vata mai kei Jiova, me vakarusa na koro oqo? Sa kaya ga vei au ko Jiova, Mo lako cake ki na vanua oqo, ka vakarusa.

¹¹ Sa qai kaya vei Rapisake ko Elaiakimi na luve i Ilikaia, kei Sepina, kei Joa, Mo vosa mada vei keitou na nomu tamata e na vosa vaka-Siria, ni keitou sa kila oqori: ia mo kakua ni vosa vei keitou e na vosa vaka-Jutia me ra rogoca ko ira na tamata era toka e na dela ni bai.

¹² A sa kaya ko Rapisake, Sa talai au beka na noqu turaga, me'u tukuna na ka oqo vei kemudrau ga kei na nomu turaga? ka sega ni talai au vei ira talega na tamata era sa toka e na dela ni bai, me ra kania na nodra benu ka gunuva na nodra suasua koi kemudou vata ga?

¹³ Ka sa tu ko Rapisake, ka kaci vakadomoilevu e na vosa vaka-Juta, ka kaya, Dou rogoca mada na nona vosa na tui levu, na tui Asiria.

¹⁴ Sa kaya vakaoqo na tui, Me kakua ni vakaisini kemudou ko Esekaia, ni na sega ni vakabulai kemudou rawa:

¹⁵ ia me kakua ni rawa na yalomudou ko Esekaia mo dou vakararavi vei Jiova, e na nona kaya tiko, Ena vakabulai keda vakaidina ko Jiova: ka na sega ni soli na koro oqo ki na ligana na tui Asiria.

¹⁶ Dou kakua ni vakarorogo vei Esekaia: ni sa vaka ko tui Asiria, Dou soro mada mai vei au, ka ucu mai ki tautuba vei au, ka me kania tiko na tamata yadua na nona vua ni vaini, kei na nona vua ni lolo, ka gunuva na tamata yadua na wai mai na nona mata-ni-wai;

¹⁷ ka me'u qai lako malua mai, ka kauti kemudou yani ki na vanua sa vaka na nomudou vanua, a vanua ni sila kei na waini, a vanua ni madrai kei na were-ni-vaini.

¹⁸ Dou lewai kemudou vinaka de rawai kemudou ko Esekaia, ni kaya, Ena vakabulai keda ko Jiova. Sa dua li vei ira na kalou ni veivanua sa vakabula na nona vanua mai na liga i tui Asiria?

¹⁹ Sa evei na kalou i Emaci kei Apati? sa evei na kalou i Sifaveimi? era sa vakabulai Samaria li mai na ligaqu?

²⁰ Ko cei vei ira kece na kalou ni veivanua oqori, era sa vakabula na nodra vanua mai na ligaqu, me sa vakabulai Jerusalemi kina ko Jiova mai na ligaqu?

²¹ A ra sa galu ga, ka sega ni cavuta vua e dua na vosa: ni sa vakaoqo nai vakaro ni tui, Dou kakua ni vosa vua.

²² Eratou sa qai lesu vei Esekaia ko Elaiakimi, na luve i Ilikaia, ko koya sa lewa na vale levu, kei Sepina na vunivola, kei Joa na luve i Esafa, ko koya sa dauvola na ka ni matanitu, ka sa dresulaki tu na nodratou i sulu, a ratou sa tukuna vua na vosa i Rapisake.