Aisea 35 - Vakavakadewa Makawa

Ena ka bulabula sara na matanitu ni Mesaia, 1,2. Era sa vakaukauwataki na yalolailai e na vuku ni ka vinaka sa yalataki vei ira era vakabauti koya nai Vakabula, 3-10.

¹ Ena reki e na vuku ni ka oqo na lekutu kei na vanua dravuisiga; ia na vanua liwa lala ena marau, ka se me vaka na rose,

² Ena se ka beta, ena reki talega, ka na marau ka ia na sere: ena soli kina nai ukuuku vaka-Lepanoni, ka na lagilagi vakataki Kameli ka vakataki Seroni: era na raica nai ukuuku i Jiova, kei na kena vinaka sara ni noda Kalou.

³ Dou vakaukauwataka na ligadra era malumalumu, ka vakataudeitaka na durudra sa tuninini.

⁴ Dou kaya vei ira era yalolailai, Dou kaukauwa, dou kakua ni rere: raica na nomudou Kalou; ena yaco mai na veisausaumi, na veisausaumi sa ia na Kalou; ena lako mai ko koya ka vakabulai kemudou.

⁵ Ena qai rai na matadra na mataboko, ka rogo na daligadra na didivara.

⁶ Ena qai ladelade na lokiloki me vaka na me kila, ka sere na yamedra na galu: ni na vure cake mai na wai e na lekutu kei na uciwai e na vanua dravuisiga.

⁷ Ia na nuku kata ena yaco me drano, kei na qele mamaca mei vurevure ni wai: na nodra tikina na wolifa, era daukoto kina, ena vanua veigasau ka veikuta.

⁸ Ia ena dua kina na sala cecere, kei na salatu: ka sa na vakatokai Na sala tabu; ena sega ni lakova e dua sa sega ni savasava; ena lako vata ko Koya kei ira era sa muria na sala, ia ko ira na tamata sesewa era na sega ni lako sese kina.

⁹ Ena sega kina e dua na laioni, se dua na manumanu daukata me cabeta, se me kune kina: ko ira ga era sa vakabulai era na lako tu kina.

¹⁰ Ia ko ira sa vakabula ko Jiova era na lesu mai, ka tadu mai ki Saioni ka sere lako ia ena sa nodra tiko na reki tawa mudu: era na taukena na reki kei na marau, ia na rarawa kei na tagi ena dro tani yani.