Aisea 34 - Vakavakadewa Makawa

A ka ca sa lewai me yacova na veimatanitu sa veimecaki kei nai soqosoqo lewe ni lotu, era na vakarusai sara, 1-15. Ena yaco dina na ka sa tukuni, 16,17.

¹ Dou toro mai, na lewe ni veimatanitu, mo dou rogoca; ia dou vakarorogo, na veimataqali: me rogoca ko vuravura, kei na ka sa sinai kina; na veivanua, kei na ka kece sa tubu maikina.

² Ni sa cudru sara ko Jiova vei ira kecega na veimatanitu, a sa lesavi ira na nodra mataivalu kecega: sa lesi ira me ra rusa sara, sa soli ira me ra vakamatei.

³ Ena biu ki tautuba na nodra moku mate, ena kuvu cake na bona ni yagodra; ia na veiulu-ni-vanua ena waicala e na kedra dra.

⁴ Ena waicala yani na kalokalo kecega ni lomalagi, ka na vivigi vata na lomalagi me vaka nai vola balavu sa vivigi tu: ena lutu mai na kalokalo kecega, me vaka sa mira mai na drau ni vaini, ka vaka sa qeqera mai na vua ni lolo.

⁵ Ni sa lomoci mai lomalagi na noqu i seleiwau; raica, ena tauci Itomi, kei ira na mataqali ka'u sa lesia me rusa.

⁶ Sa mamau nai seleiwau i Jiova e na dra; sa boro e na uro, e na dra ni lami kei na dra ni me, e na uro ni ivi ni sipi tagane: ni sa dua nai madrali vei Jiova mai Posira, kei na veivakamatei levu mai na vanua ko Itomi.

⁷ Ia na iunikoni ena bale vata kei ira, kei na pulumokau sa sele kei na pulumokau tagane; ena to na nodra vanua e na dra, ka uro mai na nodra kuvu-ni-soso e na uro.

⁸ Ni sa kena siga ni nona veicudruvi ko Jiova, na yabaki ni veisausaumi e na vuku i Saioni.

⁹ Ia na kena uciwai ko Itomi ena vuki me makadre, kei na kena kuvu-ni-soso me sulifure, ia ena yaco me makadre sa waqa tu na kena qele.

¹⁰ Ena sega ni bokoci e na siga se na bogi; ena kuvu cake na kena kubou ka sega ni mudu: ena lekutu tu e na veitabatamata kecega; ena sega ni lako voli kina e dua e na dua na gauna.

¹¹ Ena qai kenai taukei na pelikani kei na belo; ena tiko kina na lulu kei na reveni: ena dreta e delana ko koya na dali i vakarau ni veivakarusai, kei na vatu i vakarau ni veivakalalataki.

¹² A kena turaga era na kacivi mai ki na matanitu, ka na sega kina e dua; a ra sa yali kecega na nona gone vakaturaga.

¹³ Ena tubu e na kena vale vakaturaga na wa-vakavotona; na salato kei na soni e na kena veikoro ni valu: ena nodra i tikotiko na wolifa, kei na nodra rara na ositereji.

¹⁴ Ena sota kina na manumanu ni lekutu kei na koli kila; ena tagica na kenai sa na me kila; ena tiko talega maikea na lulu, ka na kunea na nonai vakavakacegu.

¹⁵ Ena cakava maikea na nonai oviovi na lulu levu, ka vakalutulutu, ka saulaka, ka ovica; ena soqoni talega maikea na vulituri yadua kei na kenai sa.

¹⁶ Dou qara e nai vola i Jiova, ka wilika: ena sega ni yali e dua vei ira oqo; ena sega e dua me yali na kenai sa: ni sa vakarota na gusuqu, ia na Yalona sa vakasoqoni ira mai.

¹⁷ A sa ia na vakawiri madigi vei ira ko koya, a sa vota vei ira na ligana e na dali i vakarau: era na taukena ka tawa mudu, era na tiko kina mai nai tabatamata ka yacova nai tabatamata.