Aisea 31 - Vakavakadewa Makawa

Sa tukuna na nodra lialia ni ra vakararavi ki Ijipita, ka biuti koya na Kalou, 1-5. Sa vakarota na veivutuni, a sa vakatakila na kena ca ko Asiria, 6-9.

¹ Ena ca ko ira era sa lako sobu ki Ijipita me kerea na veivuke; ka vakararavi ki na ose kei na qiqi-ni-valu, ni ra sa ka levu; kei na tamata i valu e dauvodo ose, ni ra sa kaukauwa sara; a ra sa sega ni golevi Koya na Yalosavasava ni Isireli, a ra sa sega ni qaravi Jiova!

² Ia ka sa vuku talega ko Koya ka na vakayacora na ca, ena sega ni biuta na nona vosa; ia ena tu cake vakaivalu ko koya ki na mataqali sai valavala ca, kei na nodra i vukevuke na daucaka cala.

³ Ia na kai Ijipita era sa tamata ga, ka sega ni Kalou; a nodra ose talega sa vakayago, ka sega ni vakayalo. Ni sa qai dodoka yani na ligana ko Jiova, ena qai bale ko koya sa veivuke, kei koya talega sa vukei, ka ra na ca vata kecega.

⁴ Ni sa kaya vakaoqo vei au ko Jiova, me vaka na laioni, io na luve ni laioni sa kudruva na kena e taura, ni sa kailataki mai nai vakatawa e vuqa me mai vala kaya, sa sega ni rerevaka na domodra, se vakamalumalumu e na vuku ni nodra kaila: ena lako sobu vakakina ko Jiova ni lewe vuqa me mai vala e na vuku ni ulu-ni-vanua ko Saioni, kei na kena ulu-ni-koro.

⁵ Me vaka na manumanu vuka sa vakaruruga na luvena ena vakarurugi Jerusalemi vakakina ko Jiova ni lewe vuqa; ni sa vakaruruga, ena vakabula; ni sa lakova voli, ena maroroya.

⁶ Dou lesu mai vei koya era sa vuki tani vakalevu kina na Isireli.

⁷ Ni ra na dui biuta na tamata yadua e na siga ko ya na nona matakau siliva, kei na nona matakau koula, na ka ka cakava na ligamudou dou sa cala kina.

⁸ Ena qai bale ko Asiria ka segai e na nonai seleiwau na qaqa; ena kani koya ga nai seleiwau ka sega ni nona e dua na tamata: ena dro tani ga ko koya mai nai seleiwau, ia ko ira na nona cauravou era na rawai.

⁹ A nona koro ni valu talega ena biuta ki muri ko koya ni sa rere; a kena turaga era na rerevaka na kuila, sa kaya ko Jiova, ko koya sa tu mai Saioni na nona bukawaqa, kei na nona lovo mai Jerusalemi.