Aisea 30 - Vakavakadewa Makawa

Era cala na Isireli ni ra sa vakararavi ki Ijipita, 1-7. Ni ra sega ni muria na Kalou, sa vakavulici ira e na ka rarawa, 8-26. Ka sa qai cudruvi Asiria na nodra meca, 27-33.

¹ Sa kaya ko Jiova, Ulei! ko ira na gone talaidredre, era sa vakarorogo, ka sega vei au; ka ra sa ubia e na dua nai ubi, ka sega ni vaka na Yaloqu, me ra kuria kina na ca e na ca:

² era sa lako sobu ki Ijipita, ka ra sa sega ni taroga vei au; me ra vakaukauwataki ira e na kaukauwa i Fero, ka vakararavi ki na yaloyalo i Ijipita!

³ Ia na kaukauwa i Fero ena yaco me ka dou na madua kina, kei na vakararavi ki na yaloyalo i Ijipita me ka dou na rogo ca kina.

⁴ Ni ra sa yaco ki Soani ko ira na nodra turaga, ka ra sa vakatadu mata ki Anesi.

⁵ Ko ira kece, era sa maduataka na lewe ni vanua sa sega ni yaga vei ira, ka sega talega ni veivuke, se ra vinaka kina, sa rawa ga na madua kei na veivakalialiai talega.

⁶ Na vosa bibi ni parofisai kei na manumanu ni ceva e na vanua ni oca kei na rarawa, sa lako maikina na laioni yalewa kei na laioni daukata, na gata loa kei na gata vakabukawaqa sa vuka; era sa kauta lako na nodra i yau e na dakudra na luve ni asa, kei na nodra kamunaga e na dakudra na kameli, me nodra na lewe ni vanua ena sega ni yaga vei ira!

⁷ Sa sega na betena se dua na kena yaga na nodra veivuke na kai Ijipita: o koya oqo ka'u sa vakatokai koya kina, Na daubole sa Dauguca.

⁸ Mo la'ki vola mada e matadra na ka oqo e na papa ni volavola, ka vola e nai vola me tu ka yacova na gauna emuri, me sega ni mudu rawa:

⁹ ka ni ra sa tamata dautalaidredre oqo, na gone daulasu, na gone sa bese ni rogoca na vunau i Jiova.

¹⁰ Era kaya vei ira na rairai, Dou kakua ni raica tiko; vei ira talega na parofita, Dou kakua ni vunautaka na ka dodonu e na vuku i keimami, vunau vakamalumalumu vei keimami, raica ga na ka lasu:

¹¹ dou lako tani e na sala, vakatikitiki tani mai na salatu, me kua so ni tu e na mata i keimami ko Koya na Yalosavasava ni Isireli.

¹² O koya sa kaya kina ko Koya na Yalosavasava ni Isireli; Ni dou sa beca na vosa oqo, ka vakararavi ki na veivakasaurarataki kei na ka veve, ka ravita:

¹³ ia nai valavala ca oqo ena sa tautauvata kina vei kemudou kei na tiki ni bai vatu cecere sa ca, ka voleka ni bale, ka vakalakala tu, ena sa kabasu vakasauri mai.

¹⁴ Ia na kena kabasu ena vaka na bilo ni dautuli bilo sa voroti, sa vorolaki vakaca sara; a sa sega kina ni kune e na kenai caca e dua na tikina me lavi buka kina mai na matadravu, se me taki wai kina mai nai keli.

¹⁵ Ni sa kaya vakaoqo na Turaga ko Jiova, ko Koya na Yalosavasava ni Isireli; Ni dou sa lesu mai ka tiko malua, dou na vakabulai kina; ni dou sa vakacegu ka vakararavi ga, dou na kaukauwa kina: ia dou a bese ga.

¹⁶ Dou a kaya, E segai; keimami na dro e na ose; ia dou na dro ga: Keimami na vodo lako e na ose totolo; ia era na totolo ko ira sa vakasavi kemudou.

¹⁷ Ni sa bole mai e dua ena dro e le dua na udolu; ia ni sa bole mai e le lima, dou na dro sara ga, ka malua, dou na laivi tu me vaka e dua nai vana e na dela ni ulu-ni-vanua, ka vaka na kuila e na dela ni koro.

¹⁸ O koya oqo ena wawa kina ko Jiova me yalovinaka vei kemudou, io, e na ka oqo ena tu cake kina ko koya me lomani kemudou; ni sa lewa vakadodonu na Kalou ko Jiova: era kalougata ko ira kecega era sa waraki koya.

¹⁹ Kemudou ka tiko mai Saioni e Jerusalemi; ko na sega ni tagi tale: ni sa rogo na domo ni nomu tagi, ena lomani iko sara ko koya; ni sa qai rogoca ko koya, ena vosa sara mai vei iko.

²⁰ Ia na Turaga ena solia vei iko na madrai ni rarawa, kei na wai ni veivakasaurarataki, ia ko ira na nomu i vakavuvuli era na sega ni vunitaki tale, ko na raici ira tikoga na nomu i vakavuvuli.

²¹ Ia ni dou gole tani vaka ki nai matau se ki nai mawi, dou na qai rogoca e dua na vosa mai dakumudou ka vaka, oqo na sala, dou mai lako tu ga kina.

²² Dou na qai vakacacana nai botani siliva ni nomu matakau siliva, kei nai ukuuku koula ni nomu matakau koula; ko na biuta laivi me vaka na ka velavela; ko na kaya kina, Mo lako tani.

²³ Ena qai solia ko koya na uca ki na nomu sore ni kau, ko sa kaburaka ki na qele; ia na sila madrai, na vu ni qele, ena vakauro ka vakalewe; a nomu manumanu ena kana e na siga ko ya e na vanua veico levu.

²⁴ A pulumokau talega kei na luve ni asa era daucakacaka e na were, era na kania na ka e tuituina, na ka sa vakasavasavataki e nai sivi kei nai iri.

²⁵ Ia e na ulu-ni-vanua cecere kecega, kei na ulu-ni-koro rewa-i-cake kecega, ena qai tu kina na soniwai kei na wai drodro, e na siga ni veimoku levu, ni sa qai bale na veivale cecere.

²⁶ Ia na rarama ni vula ena qai tautauvata kei na rarama ni mata-ni-siga, kei na rarama ni mata-ni-siga ena qai vakavitu, me tautauvata kei na rarama ni siga e vitu, e na gauna sa vauca kina ko Jiova na nodra mavoa na nona tamata, ka vakabula na we ni kedra kuita.

²⁷ Raica, na yaca i Jiova sa lako vakayawa mai, sa waqa tu na nona cudru, a sa kuvu cake na kena kubou: a tebenigusuna sa cudru vakalevu, ia na yamena sa kana voli me vaka na bukawaqa.

²⁸ Ia na nonai cegu, me vaka na uciwai sa vuabale, ena yala ki domodra; me tauvuloni na veimatanitu e na vulo lasu; ena dua talega nai tarovi e veivakacalai e na gusudra na tamata.

²⁹ Ena qai dua na nomudou sere, me vaka e na bogi sa ia kina na so levu tabu; kei na reki vakayalo me vaka e dua sa uvu bitu ni sa lako tiko mai ki na ulu-ni-vanua i Jiova, kivei koya na Uluvatu ni Isireli.

³⁰ Ia ena vakarogoya ko Jiova na domona vakaturaga, ena vakarairaitaka ko koya na ligana ni sa tau mai, e na cudru waqawaqa, kei na yameyame ni bukawaqa sa kata voli e na veiseyaki, kei na cava, kei na uca-cevata.

³¹ Ni sa qai rogo na domo i Jiova ena qai yaviti Asiria sobu, ko koya e nai titoko.

³² Ia na tikina kece ena tau kina nai titoko sa lesia, ena vakatauca vua ko Jiova, ena ia vata kei na tibereli kei na qiri api: ia e nai valu rerevaki ena vala kaya ko koya.

³³ Ni sa vakarautaki mailiu ko Tofeci: io, sa vakarautaki oqori me nona na tui; sa cakava me titobu ka rabailevu; a kenai binibini bukawaqa kei na buka droka sa levu; ai cegu i Jiova me vaka na sulifure sa dave tu, ena tutuvaka.