Aisea 29 - Vakavakadewa Makawa

Sa tukuni ni na cudruvi Jerusalemi eliu na Kalou, ena qai cudruvi ira sara emuri na nodra meca, 1-7. Sa vu ni nodra cudruvi ira na Juta ni ra guilecava na vunau, ka lotu vakailasu, 8-16. Era na vinaka tale ni ra sa qai saumaki dina vua na Kalou, 17-24.

¹ Ulei ko Erieli, io ko Erieli, na koro ka tiko kina ko Tevita! dou kuria tiko na yabaki e na yabaki; me ia tiko na so levu.

² Ia ka'u na vakararawataki Erieli, ena tiko kina na lomabibi kei na tagi; ia ena vakataki Erieli dina vei au.

³ Ia ka'u na viribaiti iko e nai valu, ka buku na druadrua ni nomu koro, ka cakava na kemu suva.

⁴ Ia ko na vakabalei sobu, ena ia mai na qele na nomu vosa; ia ko na vosa e ra mai na kuvu-ni-soso; a domomu ena vaka na domo ni daucurumi mai na loma ni qele, ia mai na kuvu-ni-soso ena domo lailai na nomu tagi.

⁵ Ia na nomu meca era lewe vuqa era na vaka na kuvu-ni-qele matailalai, a ra na vaka na qa ni sila e cagina ko ira nai soqosoqo rerevaki, ia ena ka vakasauri ka vakidacala na kena yaco.

⁶ Ena talevi iko ko Jiova ni lewe vuqa e na kurukuru, kei na tavuki ni vanua, kei na domo levu, e na covulaca kei na cava, kei na yameyame ni bukawaqa sa kana voli.

⁷ Ena qai vaka na tadra se na raivotu e na bogi na nodra i soqosoqo na lewe ni veivanua era sai valu mai ki Erieli; io ko ira kecega era sa vala kaya kei na nona koro kaukauwa, ka sa vakararawataki koya.

⁸ Ia ena vaka sa tadra e dua sa viakana, ka raica, sa kana; ia sa yadra mai, ka sa lala na yalona: ka vaka sa tadra e dua sa viagunu, ka raica, sa gunu; a sa yadra mai, ka raica, sa malumalumu, ka sa gagaro na yalona: ena vakakina ko ira na kedra lewe vuqa ni veivanua, era sai valu mai ki na ulu-ni-vanua ko Saioni.

⁹ Dou tu vakadua, ka kidacala mada! dou marau, ka bobo! era sa mateni, ka sega e na waini; era yatayata tu, ka sega e na yaqona.

¹⁰ Ni sa sovaraka vei kemudou ko Jiova na yalo daumocelutu, ka sa vautabonaka na matamudou: ko ira na parofita, io na ulumudou na rairai, sa puloutaka ko koya.

¹¹ Ia na raivotu kecega sa qai tautauvata vei kemudou kei na vosa ni vola sa dregati, era sa solia vua e dua sa kila na wili vola, ka ra kaya, Mo wilika mada oqo; a sa kaya ko koya, Au sa sega ni rawata; ni sa dregati tu:

¹² ka sa qai soli nai vola vua sa sega ni kila na wili vola, a ra kaya, Mo wilika mada oqo, a sa kaya ko koya, Au sa sega ni kila na wili vola.

¹³ O koya oqo sa kaya kina ko Jiova, Ni ra sa toro voleka vei au ko ira na tamata oqo e na gusudra, a ra sa vakarokorokotaki au e na tebenigusudra; ia na yalodra era sa vakayawataka vei au, kei na nodra rerevaki au sa vunau ga era vulica walega vei ira na tamata;

¹⁴ o koya oqo raica, ka'u na ia mada e dua na cakacaka vakurabui vei ira na tamata oqo, io e dua na cakacaka vakurabui vakaidina sara: ia ena yali na nodra vuku na nodra tamata vuku, ka na tabonaki na nodra yalomatua na yalomatua.

¹⁵ Ulei! ko ira era segata matua me ra vunia tani vei Jiova na nodra bose, a ra ia na nodra cakacaka e na butobuto, a ra sa kaya, Ko cei sa raici keitou? ia ko cei sa kilai keitou?

¹⁶ A kena levu na nomudou yalotakelo! Me vakatautauvatataki li na dautuli kuro kei na qele ni kuro, me kaya kina na ka sa tuli vua sa tulia, Sa sega ni tuli au ko koya? se me kaya na ka sa buli vua ka bulia, Sa sega ni vuku ko koya?

¹⁷ Sa vo e lailai, se sega, me qai vuki ko Lepanoni me were bulabula, kei na were bulabula me okati me veikau?

¹⁸ Ia e na siga ko ya ena rogoca na vosa ni vola ko koya sa didivara, ka rai rawa mai na kabukabu kei na butobuto na mata i koya sa mataboko.

¹⁹ Ko ira talega na yalomalumalumu, era na kuria na nodra marautaki Jiova; kei ira na tamata dravudravua, era na rekitaki Koya na Yalosavasava ni Isireli.

²⁰ Ni sa vakawaletaki na dauveivakasaurarataki, ka sa oti na dauveivakalialiai, ka sa muduki tani ko ira kecega era dauyadra me ia na ka e sega ni dodonu:

²¹ era sa vakacala na tamata ni sa vosa walega, ka biri dai vei koya sa ia na veivunauci e na matamata-ni-koro, ka vakasukai koya tani walega na yalododonu.

²² O koya sa kaya kina vakaoqo ko Jiova, ko koya ka vakabulai Eparaama, e na vuku ni mataqali i Jekope, Ena sega mada ni madua ko ira na Jekope ena sega mada ni matacea na matadra.

²³ Ni sa qai raici ira na luvena, na cakacaka ni ligaqu, e na kedra maliwa, era na qai vakarokorokotaka na yacaqu, ia era na vakarokorokotaki Koya na nodra Yalosavasava na Jekope, ka rerevaki koya na nodra Kalou na Isireli.

²⁴ Ko ira talega ka daucala na yalodra, era na qai kila na vuku; kei ira na daudidi, era na qai vulica nai vakavuvuli.