Aisea 28 - Vakavakadewa Makawa

Ena ca ko ira na Ifireimi e na vuku ni nodra viavialevu kei na nodra daumateni, 1-4. Ko ira na nona tamata sa vo era na tiko vinaka e na matanitu ni Mesaia, 5,6. Era sa vunauci e na vuku ni nodra i valavala vakatani, 7-13. Kevaka era sa vakabauti Karisito, na yavu dina, era na bula, kevaka e segai, era na cudruvi ga, 14-22. Sa vuku sara na lewa ni Kalou, 23-29.

¹ Ena ca na nodra i sala lagilagi na daumateni ni Ifireimi, kei na se-ni-kau ni nonai ukuuku sa malai, o koya sa vakaisala kina na ulu ni nodra buca bulabula era sa rawai e na waini!

² Raica, sa le dua vei Jiova sa qaqa ka kaukauwa, ka sa vaka na uca cevata e tau bi, kei na cava sa dauveivakarusai, ka sa vaka na dobui sa vuabale, sai koya ena biuta vakaukauwa ki na qele na ligana.

³ Ena buturaki na nodra i sala lagilagi na daumateni ni Ifireimi.

⁴ Ia na se-ni-kau malai, sa nona ka ni ukuuku, ka sa vakaisala kina na ulu ni buca bulabula, ena vaka e dua na lolo taumada ni sa bera na vula i lolo kevaka e dua sa kunea dina, ni sa taura tu e ligana sa tiloma sara.

⁵ E na siga ko ya ena yaco ko Jiova ni lewe vuqa mei sala vakaiukuuku, kei nai sala talei vei ira na nona tamata sa vo,

⁶ kei na Yalo ni lewa vua sa tiko me lewa, kei na nodra kaukauwa era sa vakasava tani nai valu mai na matamata-ni-koro.

⁷ Io ko ira talega oqo sa vakacalai ira na waini, ka sa vakasesei ira na yaqona: koi rau na bete kei na parofita, erau sa vakacalai e na yaqona; sa rawai rau na waini; erau sa vakasesei e na yaqona; erau sa cala e na raivotu, erau sa yatayata e na lewa.

⁸ Ni sa sinai e na lua kei na duka na tepeli kecega, sa sega na tikina e savasava.

⁹ Me vakavulici cei ko koya me vuku mai? se me vakavukui cei me kila nai tukutuku? ko ira sa qai kali mai na wai-ni-sucu, ka kau tani mai na sucu i tinadra.

¹⁰ Ni sa daukuri na vunau e na vunau, na vunau e na vunau; na vosa e na vosa, na vosa e na vosa; vakalailai eke, vakalailai maikea.

¹¹ Ia e na tebenigusu kaka kei na vosa ni tani ena vosa kina ko koya vei ira na tamata oqo.

¹² O ira oqo ka kaya kina ko koya, Oqo nai vakavakacegu; dou vakacegui ira kina era sa oca: ia oqo na ka ni veivakacegui: a ra sa bese ga ni rogoca.

¹³ Ia na vosa i Jiova ena vaka dina vei ira na vunau sa kuri e na vunau, na vunau e na vunau; na vosa e na vosa, na vosa e na vosa; vakalailai eke, ka vakalailai maikea; me ra la'ki bale ki muri, ka mavoa, ka coriti, ka tauri.

¹⁴ O koya oqo dou rogoca kina na vosa i Jiova, oi kemudou na dauveivakalialiai, sa lewai ira na tamata oqo mai Jerusalemi.

¹⁵ Ni dou a kaya, Keitou a veiyalayalati kei mate, ka veisorosorovi kei etesi; ni sa lako voli mai na ca sa vuabale, ena sega ni yacovi keitou; ni keitou sa cakava na lasu me neitou i vakaruru, ka vunitaki keitou e nai lawaki.

¹⁶ O koya oqo sa kaya kina na Turaga ko Jiova, Raica, au sa viritaka mai Saioni na vatu ni yavu, na vatu sa vakatovolei, na vatu ni tutu-ni-vale sa talei, na yavu sa dei sara; ko koya sa vakabauta ena sega ni taqaya.

¹⁷ Ia ka'u na tauca na lewa dodonu me dali i vakarau, kei na cakacaka dodonu me vatu i vakarau; ia na uca-cevata ena vakayalia sara nai vakaruru lasu; kei nai vunivuni, ena luvuci e na wai.

¹⁸ Ia na nomudou veiyalayalati kei mate ena sega ni dei kei na nomudou veisorosorovi kei etesi ena sega ni vakabau; ka ni sa lako voli mai na ca sa vuabale, dou na qai butuki kina.

¹⁹ Ni sa qai lako voli mai, ena kauti kemudou tani; ni na lako voli ga mai e na veimataka, e na siga kei na bogi; ia ena ka ni rarawa walega me kila na kenai tukutuku.

²⁰ Ni sa ka ni leqa nai mocemoce vua sa via dodo kina, ka rabailailai nai tutuvi vua sa via tutuvitaki koya kina.

²¹ Ni na tu cake ko Jiova me vaka na nona tu mai na ulu-ni-vanua ko Pirasimi, ena cudru ko koya me vaka e na buca i Kipioni, me kitaka na nona cakacaka, na nona cakacaka sa dua tani; ka vakayacora na nonai valavala, na nonai valavala sa dua tani.

²² Ia dou kakua mada ni veivakalialiai, de kaukauwa mai kina na kemudoui vesu; Ni ka'u a rogoca mai vua na Turaga ko Jiova ni lewe vuqa, sa dua na veivakarusai sa lesi me rawai vuravura taucoko.

²³ Dou vakatu daliga, ka rogoca na domoqu; vakadirorogo, ka rogoca na noqu vosa.

²⁴ Sa cuki were tiko beka ko koya sa daucuki me kabukaburaki kina? sa cukita ka logana tiko beka na nona were?

²⁵ Ni sa logana vakavinaka na delana, sa sega beka ni duibiubiuta kina na kumini loa, ka biuta voli na kumini dina, ka kaburaka vakayatuni na witi kei na parile e na tikina e vakarautaki kina, kei na sila vuti e na bati ni were?

²⁶ Ia sa vakavulici koya vakadodonu kina na nona Kalou, ka sa vakavukui koya.

²⁷ Ni sa sega ni samuti na kumini loa e nai samu-yara, ka sega ni toqici na yava ni qiqi-ni-sila e na kumini dina; ia sa samuti na kumini loa e nai ike, kei na kumini dina e nai titoko.

²⁸ Sa daubutuqaqi na witi, ni na sega ni via samusamuta tikoga ia ko koya ke sa toqica na yava ni nona qiqi-ni-sila kei na yava ni nona ose, sa na sega ni via vurumemeataka ko koya.

²⁹ A ka talega oqo sa taka maivei Jiova ni lewe vuqa; ko koya sa vakurabui na nona lewa, ka sa ka levu na nona vuku.