Aisea 26 - Vakavakadewa Makawa

A nodra sere ni vakavinavinaka na Isireli vua na Kalou e na vuku ni nona cudruvi ira na nodra meca, kei na nona vakabulai ira, 1-19. Sa vakaroti ira me ra vakararavi tikoga vei Jiova me vakayacora mada na ka oqori, 20,21.

¹ E na siga ko ya ena seretaki na sere oqo e na vanua ko Juta; Sa dua na noda koro kaukauwa; ena lesia ko Koya na veivakabulai me bai kei na bai ni valu.

² Dou dolava na matamata-ni-koro, me curu kina na matanitu yalododonu sa taura tiko na dina.

³ Ko koya sa lomadei vei kemuni ko ni na vakacegui koya dina sara: ka ni sa vakararavi vei kemuni.

⁴ Dou vakararavi vei Jiova ka sega ni mudu, ni sa uluvatu e sega ni oti rawa na TURAGA ko JIOVA.

⁵ Ni sa vakabalei ira sobu ko koya era a tiko e cake; sa biuta sobu na koro cecere; sa biuta sobu sara ki na qele; sa vakabalea ki na kuvu-ni-soso.

⁶ Ena butuki sobu e na yavadra; io na yavadra na luveniyali kei na yavadra na dravudravua.

⁷ A nodra sala na yalododonu sa dodonu sara: koi kemuni, na Yalododonu sara, ko ni na vakadodonutaka na nodra sala na yalododonu.

⁸ Io, e na sala ni nomuni lewa dodonu, Jiova, keimami a waraki kemuni; sa gadreva na yacamuni na yalo i keimami, kei na ka ko ni sa nanumi kina.

⁹ E na vu ni lomaqu ka'u sa gadrevi kemuni e na bogi; io, e na vu ni yaloqu ka'u sa qarai kemuni e na mataka: ia ni kemuni sa cudruvi vuravura, era na qai vulica nai valavala dodonu na lewe i vuravura.

¹⁰ Kevaka sa lomani na tamata ca, ke sega ni vulica nai valavala dodonu ko koya: e na vanua daucaka dodonu ena caka vakatawadodonu ga kina ko koya, ka sega ni via raica na ka vakaturaga i Jiova.

¹¹ Kemuni Jiova, sa dulaki cake na ligamuni, a ra sa bese ni raica; ia era na raica ga na nomuni lomakatakata e na vukudra na nomuni tamata, ka madua; io, na bukawaqa ena kani ira na nomuni meca.

¹² Kemuni Jiova, ko ni na lewa me neimami na vakacegu: ni kemuni sa cakava kecega vei keimami na cakacaka me yaga vei keimami.

¹³ Kemuni Jiova, ko ni sa neimami Kalou, ia era a lewai keimami ko ira na turaga tani; ia e na vukumuni duaduaga keimami na vakacaucautaka na yacamuni.

¹⁴ Era sa ciba, era na sega ni bula; Era sa mate, era na sega ni tu cake tale: O koya kemuni sa talevi ira ka vakarusai ira, ka vakaotia na ka kece era sa nanumi kina.

¹⁵ Ko ni sa vakalewevuqataka na matanitu, Jiova; ko ni sa vakalewevuqataka na matanitu; ko ni sa dokai: ko ni sa vakarabailevutaka nai yalayala kecega ni vanua.

¹⁶ Kemuni Jiova, ni ra sa rarawa, era sa qai qarai kemuni; era sa sova na masu vuni ni kemuni sa cudruvi ira.

¹⁷ Me vaka na yalewa bukete e voleka ni vakasucu, sa yaluma, ka qoqolou ni sa taratara tiko; keimami a vakakina e matamuni, Jiova.

¹⁸ Keimami a bukete, keimami a yaluma, sa vaka ni keimami a vakasucuma na cagi: keimami a sega ni vakabula rawa na vanua; ka ra sa sega ni lutu na kai vuravura.

¹⁹ Ena bula ko ira na nomu mate, ia ko ira na noqu mate era na tu cake tale. Dou yadra ka sere, koi kemudou ka tiko e na kuvu-ni-soso, ni sa vaka na tegu e na co na nomu tegu, ia na qele ena biuti ira tani na mate.

²⁰ Koi kemudou na noqu tamata, dou lako mai ka curuma na nomudou yasana vuni, ka sogota na nomudou katuba; dou vunitaki kemudou vakalailai ga me takali mada na veicudruvi.

²¹ Ia dou raica, sa lako mai ko Jiova mai na nona yasana me cudruvi ira na kai vuravura e na vuku ni nodra i valavala ca; ia ko vuravura ena vakaraitaka na kena dra, ka sega ni ubi ira tiko na nona moku mate.