Aisea 24 - Vakavakadewa Makawa

Sa cudruva na vanua ko Jiova e na vuku ni valavala ca, 1-12. Ko ira sa vo, era vakasevi ki na veivanua, era na vakavinavinaka vua, 13-16. Ni sa cudruva na vanua ko Jiova ena vakalevulevuya na nona matanitu, 17-23.

¹ Raica, sa vakalalataka na vanua ko Jiova, sa vakatoboicutaka, ka sa dui vakasevi ira era tiko kina.

² Ia ena yaco vua na bete, me vaka sa yaco vei ira na tamata; vua talega na turaga, me vaka vua na nona tamata; vua na marama, me vaka vua na nona vada; vua sa volitaka, me vaka vua sa volia; vua sa solia me talevaki, me vaka vua sa kerea; vua sa taura na kenai kere me vaka vua sa solia na kenai kere.

³ Ena vakalalataki sara na vanua, ka vakacacani sara: ni sa cavuta na vosa oqo ko Jiova.

⁴ Sa tagi na vanua, ka sa malai yani; sa ceguoca ko vuravura, ka sa malai yani; ko ira era turaga e vuravura, era sa ceguoca mai.

⁵ Sa vakadukadukalitaki talega ko vuravura e na vuku ni lewena; ni a sa talaidredre ki na vunau, era sa vakatanitaka nai lesilesi, era sa vakacataka na veiyalayalati tawa mudu.

⁶ O koya oqo sa kani vuravura kina na cudru, a ra sa vakacalai ko ira era sa tiko kina; o koya oqo sa vakamai kina na lewe i vuravura, ka ra lewe lailai na tamata sa vo tiko.

⁷ Sa tagi na waini vou, sa malai na vaini, ko ira na yalodaureki era sa vutugu.

⁸ Sa mudu na vakamarautaki ni tibereli, sa oti na kedra rorogo na daumarau, sa mudu na vakarekitaki ni api.

⁹ Era na sega ni ia vata na gunu waini kei na meke; ena gaga na yaqona vei ira sa gunuva.

¹⁰ Sa basuki sobu na koro sa lala: sa sogo tu na veivale kecega, me sega e curu kina.

¹¹ Sa ra tagi e na saqata ni koro e na vuku ni waini: sa dromu kecega na reki, sa yali na marau ni vanua.

¹² Sa vo ga na rusa e loma ni koro, ka sa basubasuki sara na matamata-ni-koro.

¹³ Ia ena vakaoqo e loma i vuravura e na kedra maliwa na veimatanitu, ena vaka ni sa kurei na olive, ka vaka ni sa tomitomiki na vua ni vaini ni sa oti na vula i vaini.

¹⁴ Era na tabalaka na domodra, era na ia na sere e na vuku ni nona tiko vakaturaga ko Jiova, era na kaikaila mai waitui.

¹⁵ O koya oqo dou vakavinavinakataki Jiova kina mai na tu-i-cake io na yaca i Jiova na Kalou ni Isireli, e na veiyanuyanu ni wasawasa.

¹⁶ Mai nai yalayala kei vuravura eda sa rogoca na sere, io na vakavinavinaka vua na yalododonu. Ia ka'u a kaya, Ulei koi au, ulei koi au, au sa ca! era butako na daubutako; io, era butako vakalevu ko ira na daubutako.

¹⁷ A rere, kei nai keli, kei nai cori, sa qai yacovi iko, na lewe ni vanua.

¹⁸ Ia ena yaco, ko koya sa na dro mai na nodra qoqolou era rere ena lutu ki nai keli; ko koya talega sa cabe cake mai nai keli ena coriti e nai cori; ni sa tadola nai sogo kei lomalagi, ka sa yavala na yavu kei vuravura.

¹⁹ Sa basubasuki ko vuravura; sa katela sara ko vuravura; sa vakayavalataki vakalevu ko vuravura.

²⁰ Sa yatayata ko vuravura me vaka na daumateni, ka sa tautauwalili me vaka nai mocemoce lilili: ia sa bitaki koya na kena talaidredre; ena bale, ka sega ni tu cake tale.

²¹ Ia ena yaco e na siga ko ya, ena qai cudruva ko Jiova nai vavakoso cecere sa tiko e na tikina cecere, kei ira na tui kei vuravura e dela i vuravura.

²² A ra na vakasoqoni vata me vaka na bobula e nai keli, a ra na sogolati e na vale ni veivesu, ia ni sa oti na bogi vuqa era na qai talevi.

²³ Ena qai taqaya na vula, ka madua na mata-ni-siga, ni na lewa ko Jiova ni lewe vuqa mai na ulu-ni-vanua ko Saioni, kei Jerusalemi, me vakarokorokotaki e matadra na kena qase.