Aisea 20 - Vakavakadewa Makawa

Sa vakatakarakarataki na nodra veivakabobulataki na kai Ijipita kei na kai Kusi.

¹ E na yabaki sa lako mai kina ko Taritani ki Asitoti, (ni sa talai koya ko Sarikoni na tui Asiria,) ka sa vala ki Asitoti, ka rawa;

² io e na gauna ko ya sa vosa ko Jiova vei Aisea na luve i Emosi, ka kaya, Mo la'ki sereka tani nai sulu taga mai na tolomu, ka luvata tani nai vava mai na yavamu. A sa kitaka vakakina ko koya, ka sa lako luvawale voli ka sega ni vakaivava.

³ A sa kaya ko Jiova, Me vaka sa lako voli ko Aisea na noqu i talatala ka luvawale ka sega ni vakaivava ka yabaki tolu, mei vakatakilakila kai vakatakarakara e na vuku i Ijipita kei Iciopea;

⁴ ena vakakina ko tui Asiria, ena kauti ira na kai Ijipita era sa bobula, kei na kai Iciopea era vulagi, na gone kei na qase, ni ra luvawale ka sega ni vakaivava, ka sega ni vakaisulu na rubudra, a ka ni veivakamaduataki ki Ijipita.

⁵ A ra na rere, ka maduataki Iciopea, oqori era a vakararavi kina, kei Ijipita, era a dokai ira kina.

⁶ Ia ko ira sa tiko e na tai oqo era na kaya e na siga ko ya, Raica, sa vakaoqo na ka eda a vakararavi kina, na ka eda a dro me vukei kina ka me da vakabulai mai vua na tui Asiria: ia eda na bula vakaevei koi keda?