Aisea 19 - Vakavakadewa Makawa

Ena ca ko Ijipita, 1-10, ka sese na nodra turaga kei ira na kai Ijipita, 11-17. Era na lotu na kai Ijipita, 18-22, ka tovata ko Ijipita, kei Asiria, kei Isireli, 23-25.

¹ Na vosa ni parofisai bibi kei Ijipita. Raica, sa vodo tu ko Jiova e na o totolo, ka sa lako mai ki Ijipita; a sa yavala na kalou lasu ni Ijipita e matana, ka sa waicala e lomana na yalo i Ijipita.

² Ia ka'u na vakaveimecakitaki ira na kai Ijipita kei ira na kai Ijipita: ka ra na dui veivala na veitacini, kei na veitokani; na veikoro, kei na veimatanitu.

³ Ia ena oca sara na yalo i Ijipita e lomana; ia na kena vuku ka'u na vakaotia: a ra na la'ki taroga na kalou lasu, kei ira na daulawaki, kei ira na daucurumi, kei ira na rairai.

⁴ Ia ka'u na soli Ijipita ki na ligana e dua na turaga yaloca; ena lewai ira e dua na tui yalokaukauwa, sa kaya na Turaga, ko Jiova ni lewe vuqa.

⁵ Ia ena di na wai mai na wasawasa, ka yali na wai mai na uciwai ka na di sara.

⁶ Ia ena boi ca mai na veiuciwai; ena maca ka di sara na soniwai ni Ijipita; ena malai yani na gasau kei na kuta.

⁷ A veico mai na uciwai, mai na bati ni uciwai, kei na were ni sila kecega mai na uciwai, ena malai, ka cagina tani, ka yali sara.

⁸ Ka ra na tagi na gonedau, ka osima kecega era dausiwa ena uciwai, ka ra oca sara ko ira era dauviritaka na lawa ki dela ni wai.

⁹ A ra na taqaya ko ira era daucakacaka e na laino matailalai, kei ira era dautali sulu vulavula.

¹⁰ A kena duru era na ramusu, ko ira kece talega sa dauvoli na nodra cakacaka ena sa rarawa na lomadra.

¹¹ Era sa yalolialia sara na turaga ni Soani, ko ira sa vuku vei ira na lewe ni bose nei Fero sa qai druma sara mai na nodra lewa: dou sa kaya vakacava vei Fero, Au sa luvedra na vuku, na luvedra na tui eliu?

¹² Sa evei ko ira? sa evei na nomu tamata vuku? me ra tukuna mada vei iko, ia me ra kila mai na ka sa lewa ko Jiova ni lewe vuqa e na vuku i Ijipita.

¹³ Era sa lialia mai na turaga ni Soani, era sa vakacalai na turaga ni Nofi; ka ra sa vakacalai Ijipita ko ira na duru ni kena veimataqali.

¹⁴ Sa solia ko Jiova ki lomadra na yalovakatani, ka ra sa vakacalai Ijipita e na kena cakacaka kecega, me vaka ni sa yatayata na daumateni e na nona lua.

¹⁵ Ia ena sega na cakacaka mai Ijipita, me sa cakava rawa na uluna, se na buina, se na tabana, se na kena taria.

¹⁶ E na siga ko ya ena vakataki ira na yalewa ko Ijipita: ia ena rere ka sautaninini e na mata i Jiova ni lewe vuqa, ni sa laveta na ligana, o koya sa laveta kina ko koya.

¹⁷ Ia na vanua ko Juta ena ka rerevaki ki Ijipita, ko ira kece era sa cavuta era na rere, e na vuku ni lewa i Jiova ni lewe vuqa, oqori sa lewa ko koya me yacova.

¹⁸ E na siga ko ya ena lima na koro mai na vanua ko Ijipita ena vosataka na vosa vaka-Kenani, ka bubului vei Jiova ni lewe vuqa; ena vakatokai e dua, Na koro ni veivakarusai.

¹⁹ E na siga ko ya ena dua nai cabocabo-ni-soro vei Jiova e na loma ni vanua ko Ijipita, ka dua na duru vei Jiova mai na kenai yalayala.

²⁰ Ia ena yaco oqori mei vakatakilakila kai vakadinadina vei Jiova ni lewe vuqa e na vanua ko Ijipita: ni ra na tagi vei Jiova e na vukudra na dauveivakasaurarataki, ia ena tala vei ira ko koya e dua nai vakabula, io e dua sa kaukauwa, ka na vakabulai ira ko koya.

²¹ Ia ko Jiova ena kilai mai Ijipita, ka ra na kilai Jiova ko ira na kai Ijipita e na siga ko ya ka ra na vakacaboi soro kei nai madrali, ka ia na bubului vei Jiova, ka vakayacora.

²² Ia ena yaviti Ijipita ko Jiova, ena yavita ka vakabula: ka ra na lesu mai vei Jiova, ia ena vakamasuti e na vukudra ka na vakabulai ira.

²³ E na siga ko ya ena dua na salatu mai Ijipita ki Asiria, a ra na veilakovi na kai Asiria kei na kai Ijipita, ka ra na lotu vata ko ira na kai Ijipita kei na kai Asiria.

²⁴ E na siga ko ya sa na kenai katolu kei Ijipita kei Asiria ko Isireli, io na ka e veivakalougatataki e loma ni vanua:

²⁵ ko koya sa vakalougatataka ko Jiova ni lewe vuqa, ka kaya, Sa kalougata ko Ijipita na noqu tamata, kei Asiria na cakacaka ni ligaqu, kei Isireli na noqu i votavota.