Aisea 17 - Vakavakadewa Makawa

Na vosa ni parofisai bibi sa tau ki Siria kei ira na Isireli, 1-6. Ena veivutuni eso, ka cudruvi eso, 7-11. Ena ca sara ko ira na nodra meca na Isireli, 12-14.

¹ Na vosa ni parofisai bibi kei Tamasiko. Raica, ko Tamasiko, sa vakaoti sara me kakua ni koro, ka sa yaco me yavu wale ni koro sa rusa.

² Sa biu na veikoro ni Aroeri: ena nodra na qele ni sipi, era na koto kina, ka sega e vakarerea.

³ Ena oti talega na koro ni valu i Ifireimi, kei na matanitu ni Tamasiko, kei na kedra vo na kai Siria: ena tautauvata na nodra lagilagi kei na nodra lagilagi na Isireli, sa kaya ko Jiova ni lewe vuqa.

⁴ Ia ena yaco e na siga ko ya, ena qai lailai mai nai ukuuku i Jekope, ka na yago ca mai na nona yagolevu.

⁵ Ena vaka e dua sa kumuna na sila ni yabaki, ka sa kumuna na sola ni sila e na ligana; ia, ena vaka e dua sa kumuna na sola ni sila ena buca i Refeimi.

⁶ Ia ena vo ga kina e vica na vuana, me vaka ni sa kurei na vua ni olive, e rua se tolu e na vuso ni tabana ki cake sara, e va se lima e na tabana sa dauvua, sa kaya ko Jiova na Kalou ni Isireli.

⁷ E na siga ko ya ena gole na tamata vei Koya ka Buli koya, ka rai na matana vei Koya na Yalosavasava ni Isireli.

⁸ Ia ena sega ni goleva ko koya nai cabocabo-ni-soro, na cakacaka ni ligana, se rai ki na ka sa cakava nai qaqalo ni ligana, se na matakau i Aseteroci, se na matakau ni mata-ni-siga.

⁹ E na siga ko ya ena tautauvata na nona veikoro kaukauwa kei na kau sa vo mai na veikau lailai, kei na taba ni kau ki cake sara, o koya era sa biuta e na vukudra na Isireli: ia ena lala na vanua.

¹⁰ Ni ko sa guilecavi koya na Kalou ni nomu bula, ka sa sega ni nanumi koya na Uluvatu ko sa kaukauwa kina, o koya ko sa tea kina na kau domoni, ka sa tea nai sulisuli e kau mai na vanua tani:

¹¹ e na siga ko sa tea kina ko na viribaita, e na mataka ko na cakava na nomu i teitei me seraki: ia na vuata e na siga sa tauci kina ena dua nai binibini wale kei na rarawa ni mate.

¹² Ulei! na domo ni veimatanitu e vuqa! era rorogo me vaka na vadugu ni wasawasa; kei na nodra cici vakaivalu na veimataqali! era sa ue me vaka na vadugu ni wai kaukauwa!

¹³ Era sa ue na veimatanitu me vaka na vadugu ni wai levu: ia ena vunauci ira ko Koya, ka ra na dro tani vakayawa, a ra na vakasavi me vaka na qa ni sila e na veiulu-ni-vanua e na mata ni cagi, ka vaka na ka e vakatatoqitoqi e na mata ni covulaca.

¹⁴ Raica, e na yakavi era sa domobula mai; ia ni sa sega ni kida na mataka, sa yali sara ko koya. Oqo na kedrai votavota era sa vakacacani keda, kei na ka sa lesi me nodra era butakoci keda.