Aisea 16 - Vakavakadewa Makawa

Ai vakaro vei ira na Moapi me vakamalumalumutaki ira vua na tui Juta, 1-5. Era sa viavialevu ga, 6; ka sa lewa na Kalou me ra cudruvi ga, 7-14.

¹ Dou vakauta na lami vua na tui ni vanua, io mai Sela e lekutu ki na ulu-ni-vanua ni goneyalewa ni Saioni.

² Me vaka na manumanu sese sa vakasevi mai na kena sova, era na vakakina na goneyalewa ni Moapi mai nai vutovuto ni wai ni Erimoni.

³ Dou ia na bose lewa vakadodonu; cakava na nomudou i vakaruru e na siga levu me tautauvata kei na bogi; vunitaki ira sa se mai; kakua ni tukuni ira na tiko se.

⁴ Me tiko kei iko, Moapi, ko ira na noqu era sa se mai, mo nodra i vakaruru mai na matana na dauvakacaca; ni sa takali na daukovekove, sa mudu na dauvakacaca, sa vakarusai tani e na vanua ko ira ka dauvakasaurara.

⁵ Ena qai vakataudeitaki e na loloma nai tikotiko ni tui: ena tiko dei kina ko koya e na vale i Tevita, me ia na lewa, ka segata na lewa dodonu, ka vakusarawataka na kena caka dodonu.

⁶ Eda sa rogoca oti na viavialevu i Moapi; ko koya sa viavialevu sara: io na nona yalolevu, kei na nona dokadokai koya, kei na nona daucudru: ia na nona bolebole ena sega ni dina.

⁷ O koya oqo ena tagicaki Moapi kina ko Moapi, era na tagi kecega: dou na tagi dula ni sa rusa ko Kiri-ereseci; ni sa yaviti sara:

⁸ ni sa qai malai na veiwere ni Esiponi kei na vaini ni Sipima: ko ira na turaga ni veimatanitu era sa vakabalea sobu na tabana talei, sa la'ki yala ki Jaseri, ka lako sese ki lekutu; sa tete yani na tabana, ka lakova na wasawasa.

⁹ O koya oqo ka'u na tagicaka na vaini ni Sipima, me vaka ka'u a tagicaki Jaseri: au na vakasuasuataki kemudrau, Esiponi, kei Elale, e na wai ni mataqu: ni sa rogo na kaila ni valu mai na nomu vuata kei na nomu yabaki.

¹⁰ A sa vakayalitaki mai na veiwere vakalewe na reki kei na marau; ena sega na sere se na kaila e na were-ni-vaini; ia na waini e nai keli-ni-waini ena sega ni sikaraki; ka'u sa muduka laivi na kena kailavaki.

¹¹ O koya oqo ena rorogo kina na ketequ me vaka na api e na vuku i Moapi, kei na lomaqu e na vuku i Kiri-ereseci.

¹² Ia ena yaco, ni sa rairai mai ni sa oca ko Moapi e na yasana cecere, ena qai curuma na nona bure-kalou me soro; ia ena sega ga ni yaga.

¹³ Oqo na vosa sa cavuta eliu ko Jiova e na vuku i Moapi.

¹⁴ Ia sa qai vosa ko Jiova, ka kaya, Ena sega ni oti e tolu na yabaki, me vaka na yabaki ni tamata voli, ena beci mada na lagilagi i Moapi, kei ira kecega na lewe vuqa ko ya; ia na kedra vo era na lewe lailai sara ka malumalumu ga.