Aisea 13 - Vakavakadewa Makawa

Sa vakasoqona vata na nonai valu na Kalou, me ia na veicudruvi, 1-5; sa soli ko Papiloni vei ira na kai Mitia, 6-16. Ena rusa sara ko Papiloni, 17-22.

¹ Na vosa ni parofisai bibi kei Papiloni, oqori ka raica ko Aisea na luve i Emosi.

² Dou vakarewataka na drotini e na ulu-ni-vanua cecere; tabalaka na kaci vei ira; yalovaka na ligamudou; me ra curuma na nodra matamata-ni-koro na turaga.

³ Au sa vakaroti ira ka'u sa vakatabuya, io ka'u a kacivi ira na noqu qaqa, na liga ni noqu cudru, ko ira era marautaka na ka ka'u na rogo kina.

⁴ Na rorogo ni valu levu e na veiulu-ni-vanua, sa vaka era sa lewe vuqa; a domo ni nodra ue na veimatanitu na lewe ni veivanua era sa soqoni vata: ko Jiova ni lewe vuqa sa vakasoqoni ira vata na nona mataivalu.

⁵ Era sa lako mai na vanua yawa, mai na vu ni lomalagi, io ko Jiova, kei nai yaragi ni nona cudru levu, me vakarusa na vanua taucoko.

⁶ Dou qoqolou; ni sa voleka na siga i Jiova; ena yaco me vaka na veivakarusai maivei Koya na Kaukauwa.

⁷ Ena malumalumu kina na ligadra kecega, ka waicala na yalo ni tamata kecega:

⁸ A ra na sautaninini; na yaluma kei na rarawa ena tauvi ira; era na yaluma me vaka na yalewa sa taratara; era na dui kidacala e dua vua e dua; ia na matadra ena vaka na yameyame ni buka.

⁹ Raica, sa toro mai na siga ni Jiova, sa ka rarawa dina sara e na cudru levu kei na cudru waqawaqa, me vakarusa na vanua: ia ena vaqeavutaka ko koya na kena tamata i valavala ca.

¹⁰ Ni na sega ni cila mai na kalokalo ni lomalagi kei na veikalokalo era vakayacani vata; ena butobuto na mata-ni-siga ni sa lako tu, kei na vula ena sega talega ni cila mai.

¹¹ Ia ka'u na cudruvi vuravura e na vuku ni kena ca, kei na tamata caka cala e na vuku ni nodra i valavala ca; ka'u na muduka talega na nodra viavialevu na yalolevu, ka vakasivoya na nodra viaviaturaga era daurerevaki.

¹² Ka'u na cakava me dredre na tamata ka rawarawa na koula dina; io me dredre e dua bauga na tamata ka rawarawa na koula ni Ofa.

¹³ Ia ka'u na vakayavalataki lomalagi, ko vuravura talega ena tavuki tani mai na kena yasana, e na cudru levu i Jiova ni lewe vuqa, kei na siga ni nona cudru waqawaqa.

¹⁴ Ia ena vaka na teira sa vakasavi, kei na sipi sa sega e vakasoqona; era na dui lesu vei ira na kai nona, ka dui dro ki na nona vanua.

¹⁵ O koya yadua sa kune ena lausua; kei koya yadua sa tauri ena mate e nai seleiwau.

¹⁶ A nodra gone ena botobotolaki ki na vatu e matadra; a nodra veivale ena yanaki, ka na yarataki na watidra.

¹⁷ Raica, ka'u na vakauqeti ira na kai Mitia me nodra meca, era na sega ni nanuma na siliva, ka ra na sega ni marautaka na koula.

¹⁸ A nodra dakai titi ena vakabalei ira na cauravou ki na vatu; na vua ni kete era na sega ni lomana; ena sega ni loloma na matadra vei ira na gone.

¹⁹ Ia ko Papiloni, ka rogo vei ira na veimatanitu, na nodra ka lagilagi era dokai ira kina na kai Kalitia, ena tautauvata kei Sotoma kei Komora ni sa vukica na Kalou.

²⁰ Ena sega ni tawa tale, ena sega tale ni tiko kina e dua nai tabatamata: ena sega ni birika maikea na kai Arepea na nona vale laca; ko ira talega nai vakatawa era na sega ni vakadavora maikea na nodra qele ni sipi.

²¹ Ia ena koto ga maikea na manumanu kila ni lekutu; ena tawa na nodra veivale e na manumanu dautagi vakaloloma; ena tiko maikea na luve ni ositereji; ena qito maikea na me kila:

²² ena tagi na wolifa e na nodra veivale vakaturaga; kei na gata lelevu e na nodra bure vinaka: ka sa voleka ni yaco na kena gauna, ia na kena siga ena sega ni vakaberaberataki.