Aisea 12 - Vakavakadewa Makawa

A nodra sere ni vakavinavinaka na lewe ni lotu e na vuku ni yalololoma ni Kalou.

¹ Ia ko na kaya e na siga ko ya, Au na vakavinavinaka vei kemuni, Jiova, ko ni a cudruvi au eliu, ia sa qai takali tani na nomuni cudru, ia ko ni sa vakacegui au.

² Raica, sa noqu i vakabula na Kalou; au na vakararavi tiko, ka sega ni rere: ni sa noqu vu ni kaukauwa kei na noqu vu ni sere ko Ja Jiova; ka sa yaco ko koya me noqu i vakabula.

³ Ia dou na takiva e na reki na wai mai na mata-ni-wai ni bula.

⁴ Ia dou na kaya e na siga ko ya, Dou vakavinavinaka vei Jiova; masuta na yacana; vakatakila vei ira na lewe ni veivanua na nona cakacaka, dou tukuna ni sa cecere na yacana.

⁵ Dou sere vei Jiova; ni sa cakava na ka sa uasivi sara me kilai na ka oqo e vuravura taucoko

⁶ Dou qoqolou ka kaila, na kai Saioni: ni sa levu e na kemudou maliwa ko Koya na Yalosavasava ni Isireli.